Där Blog vam Webmaster

 

Fasnachtswucha Part I

 

Ja äs cha sträng si so än Fasnacht. Vor allum wenn’s de richtig los geit und d’Fasnachtswucha startut. Wemu de halt zwischundri sogar nu sellti z’Hirni ischaltu und schaffu, bliebt halt eim nimme wahnsinns viel Zit vär du Porretschblog aktuell z’haltu. Ich äntschuldigu mich. Chunt nu därzüä, dasmu, äbu gad wäg dum schaffu, am Gätschdonnstag nur gad bis am halbi zähni cha bliebu und schich somit redaktioniell uf d’Üssage va de värschiedunstu Quelle müäss värla und die hent an dem offusichtlich feuchfröhlichu Abu öi nit wirklich seriösi Recherche chännu betriebu. Und da der Blog hiä sälbschtvärständlich schich niä würdi ärlöibu Unwahrheite in Umlöif z’bringu, welle wär doch ischi redaktionielli Glöibwürdigkeit öi nit uf z’Spiel setzu. Drum halti mi bim Umzug Leigg und dum Gätschdonnstag mit mine Üsfiährige churz und tüä nur schnäll d’Fakte uf du Tisch leggu, bevori de üsfiährlich zum Balianosball chumu, wani sälber öi wieder voll ha chännu därbi si. Drum hiä nur churz und bündig:

 

Fäkts, Umzug Leigg-Suschtu:

Där Vispär Fasnachtsäröffnig is z’värdanku, dass d’Chnätschära am Umzug Leigg-Suschu, öi wennär immär sehr umstrittu isch, praktisch komplett sind awäsund gsi, abgseh vam eintu odär andru Hirni, wa inär Zwischuzit zu Brei zärmatscht isch, vor lüüter Fasnacht. Dank där Fasnachtsäröffnig het nämlich niämer Nahtag ka, da öi nu niämmär im Nahtag isch gsi, will alli kei Schlaf gfundu hent. So hent schich alli Chnätschär plus 2 flugunfähigi Spächta (äs isch ja küm ämal drigläggu, dasch grad uf zwei Bei chännent stah, also värgiss erscht rächt z‘fleigu) rächtzitig z’Schuschtu bim Bahnhof igfundu. Öi där greschtusch Kritikär va dem Alass, ische Duli, het du Wäg uf Suschtu gfundu. Mu värmüätut allärdings, är sige öi nur darum cho, will mu schini Fröindin deheimu bereits värsprochu het, är därfe de nam Umzug inu Mc Donalds ga fufzäh Happymeals ässu. Ich an miner Stell hami natirlich wiedär sehr uf denu Üftritt gfröit. Was gits schöners als Sunnuschii und Biär und de ersch Rächt nu, wemus in Kombination darf gniässu. Äs sind ämil alli Üftritta an dem Tag, viär anär Zahl, güät värluffu und nit wenigi va de Chnätschära hent, küm du Bus bistiegu, nu ufum Bahnhof öi scho wiedär värlah, vär anu Napisunntag gad ga witär z’fäschtu. Lustig is gsi, und de heissets immär da selle wär doch nimme ga, also ich cha das nit värstah.

 

Fäkts, Feiste Donnschtag Sängärma und Brig

Hiä müässi mi leider, abär begründut ä Spur zrug näh bi där Brichtärstattig, hani doch gad nummu du Namittag so richtig chännu mitärläbe. Chnätschär wiedärum komplett bis uf eis odär zwei Mitgliedär, da isch mu schi uneis gsi. Abär di Bilanz vär än Donnschtag Namittag ämil sehr güät. Das isch de abär öi wichtig gsi, isch doch d’Schüäl, wiä solls öi annärsch si an dem Tag am Schgiifahru gsi. Tschuld isch natirlich där Staat, wa mittlärwiil sogar äbu die Schgiitäg tüät harmonisiäru, so das de Sängärmanerschiälär gar nix annärsch isch ubrig gibliebu. Ob schich ächtig da där eint odär annär Staatsrat ab z’Sittu, iär wisset welle, der mit du Hippiehaar, ab und züä z’fescht ubär die Brichtärstattige uber schich ine Fasnachtszitige üfgregt het und mit dem Handlu de Walliser Fasnachtszünft eis het wellu üswischu sei dahingestellt. Dank där Unnärstützig va där Dorfbevölkrig is doch nu än flotte Namittag wordu , wohl öi Dank dum Wättär wa nisch mit puurum Sunnuschii schis Wohlwollu gizeigt het. Ischi Bevölkrig hei wär mitume Umzug und drii Platzkonzärti därfu beglücku und dank dum zahlrichu Ärschienu het das öi rächt aständig gitent, bis uf du TNT, abär denu Fauxpas nimmi ganz älleinizig uf mich. Küm isch de abär d’Sunna värschwundu, hent schich öi d’Lit langsam heim bigä und die Guggumüsig richtig Jugendväreinslokal zum „Vorglühen“ wiä d’Jugend hittu nöierdings so schön seit. Vorgiglüht hei wär de vor allum mit warmum Wii wawär nu va dum MUKI värcho hei, Biär und eine sogar mit Unmängine Whiskey. So isch das gad gläggu cho, das nisch d’Mama und där Vorstand nu gad eppis z’Nacht organisiärt hent. Merci där Väreinskassa an dieschär Stell. Gstercht mit Spagetti Bolones vam Werni, wa übringesn eins A al dente gsi sind mmmmhhhhh, hent nachär wiedär alli richtig mägu, vär am Gätsch nu eine ga durch z’gäh. Da hei wiär nähmli de scho am nini (gottseidank) ische Üftritt vor där Sebastianskapälla därfu zum beschtu gäh, bevor, und das isch am Gätsch immär so, äs gheissu heit, fäschtu, fäschtu, fäschtu und immär schön zämu bliebu dasmu änand nit värliärt. Letschteres isch nit alle glich eifach gfallu, wiä där Porretschtschät laht la värmüätu. Ich vär mine Teil müäss an dischär Stell üfheru, han ich doch du letschtusch Zug Richtig Bäru därfu näh, so dasi am andru Tag in allter frische, viär Paarlini hat därfu ins (Un)glück stürzu. Abär ich bi ja nit där einzige gsi, wa das Fäscht nit het chännu fäschtu. Öi vorzitig värabschiedut het schi där Viki, der het schini Gemahlin mim grossu Exzäss nit wellu ärläbe, där Diego het immär nu Nahwehe vam Militer ka, där Mitscho het schi du Abschturz vär am Samstag uf z’Sita gita und där Xandi het unbedingt heim miässu gad Transformärs lüäge vär du ärwachsu Schaia LaBuff chännu z’begüätachtu (ACHTUNG, Insider). Minu Quelle, wiä gseit öi nimme gad unbedingt ganz bi Sinne und där Blick inu Porretschtschät lehnt abär la värmüätu äs sige ziemlich viel Biär gflossu im Himmil, wa angäblich jedi Rundi gizahlti isch. Där Stefanus und schine Bro Sämy hent schi im Värlöif vam Abu mal wiedär inänand värliäbt und där hert Chäro het schich zum Schluss öi nu gitroffu. Obwohl das ich mich ja bi dem Ablick gfregt ha, wer um Himmelswillu di Liit näbs und vor dum Saschi sind? Abär lüägtet sälbsch, viellie wissets iär.

Soviel zär Brichtärstattig va Leigg und dum Gätsch, chämewär witär zum Fasnachtssamstag, wawär wiä scho gigwohnt z’Gast bi de Balianos in Baltschiädär sind gsi. Die üblichu Diskussione va wägu, wer macht scho währund dum Gätsch äs Fäscht sind schnäll z’Änd gsi, wa z’ersch Biär vor isch gstandu isch und där Abu het chännu startu. Voräwäg äs het wiedär Träne gäh, abär das Thema hei wär ja scho ka, die Mäss isch mittlärwil gläsni J

Die Balianos, wiä immär, mit dum beschtu Guggumüsigässu va där Fasnachtssaison hent das Jahr zum 25. Jubliäum igladu. Sind also sozäge ischu Zwilinga. Die Iladig hei wär natirlich gäru äntgägu gnu vär mit de Balianos ische letschtusch Üftritt va der Saison im Wallis z’fiiru. Anschienund, so zumindest d’einhellig Meinig vam Vorstand, gegi wär ja de nu in d’Üssärschwiz, wa weiss wahrschienlich nu niämmär, nitämal där ganz Vorstand. Nur so viel, d’Wälschu, so sellti de das eiwi Absicht si, sind de zum Teil öi nu Wallisär. Der chlei Geografieexkurs nur so näbubii. Äs isch uf alli Fäll ei Diskussion im Gang, wa wär de da geh. So is de öi vor dum Balianos nit annärsch gsi und nach dum Motto viär Hirnini sind bessär als eis, hent schich 4 Chnätschär im Vorfäld vam Fäscht zumene Online-Üskundschaftär-Apèreo gitroffu zum die Porretschchnätschär inär Üssärschwiz z’findu. Äs isch depremiärund gsi, nit ämal Googil weiss wa die Porretschchnätschär z’negsch Wuchunänd wärdend fäschtu. Hä nu, zrug zum Fäscht. Mit där Üftrittszit hei wär dasmal änz leid värloru. Als letschti Guggumüsig am eis hei wär z’spielu ka. Beschi Zunge behöiptent ja, di Balianos hei das äxtra gmacht, will wiär schi an ischum Fäscht als erschti hei la üfträttu, abär ich gibu dene Grüchti mis Värtruwu nit. Där Musikus het de gad va Afangsch a schis Amtji la waltu und alli ärmahnt, de doch bitte zwischudurch mal äs Coca z’bschellu, bevor är de gad sälbär du erschtusch Shot uf denu Üftrittszitschock glescht het. Shotbar va de Balianos isch ja, und das weiss mittlärwil öi z’letschtusch Gommi, legendär. So legendär, dass mittlärwil, so hani mitvärcho, bis zu 12000 Shots miässent bschellt wärdu, damit öi alli Gäscht komplett chännent mit Shots befriedigt wärdu. Miär het eis därfa glängt, bevor ich mich ab ins Fäschtzält ha bigä, wa d’Chnäschära bereits ei Stehtisch vär schich hent reserviärte ka. Där räschtlich Abu het schich de mehrheitlich um denu Stehtisch um abgspielt. Coca hani zwar niä eis gseh, wäder bi miär nu bi andre, abär darfär viel, z’viel Biär, zwei Banane, än du ganz abu du Wältfriedu stolz värkündundi Prinzässin Melanie und äs paar ganz güäti Üftritta va de andru Guggumüsige. So isch de die Ziit öi unglöiblich schnäll wiedär värbii gigangu, abär so is halt, wemu mit de Chnätschär unnärwägs isch. Als güäte Muskus gahn ich natirlich vor dum Üftritt nu ga z’Gländ abchecku und da wiär ische Üftritt ja inär Turnhalla hei sellu ha, bini nach appa viär Stund z’erscht mal wiedär üs dem Zält üs. Iner Halla het mi de fasch där Schlag gitroffu. Nit willi ischi Mama fasch liggundu uf där Shotbar ha agitroffu und du Mitsch halb wägdämmrund ubär dum Plätzli, nei viel schlimmär, üssär die zwei grad ärwähntu sind praktisch kei Lit in der Halla gsi. Där letschtusch Üftritt va de Porretschchnätschär im Wallis (angäblich), und das vor leere Publikumsräng, das darfi de Chnätschära nit atüä.  Güät hani ja nu fasch zwänzg Minüte Zit und än Vizepräsidänt wo sehr güäti Connections zu de Balianos het. Danke Raoul hei wär schlussändlich doch nu im Fäschtzält chännu üfträttu, wanisch än värruckti Meuta an Züäschauer scho ärwartet het. Und nach dum Applaus nachum erschtu Stuck bini scho fasch ubäzigte gsi, äs weri värmüätli nit schlimm gsi, weri wär doch inär Halla gsi, de weri eifach z’Publikum zu isch cho. Will offusichtlich will mu die Porretschchnätschär tatsächlich kehru. Gstercht va der Ärkänntnis hei wär de als letschti Guggumüsig va dem Abu nu wellu zeigu, dass die bescht Guggumüsig äbu öi nu am eis ämorgu än solide, nei än sehr güäte Üftritt cha uf z’Parkett bringu. Gidankt hent nisch das die Balianos mimene Balianosstiefil und dum scho längschtens ubärfälligu Jubliäumsgscheich alässlich va ischum 25Jährigu. Die Porretschchnätschär, ja bekanntlich nit bekannt dasch nachträgundi sind, hent natirlich öi äs Gscheichji vär die Balianos ka. Äs Chitschtji vollär Shots, nur vär du Fall vamene Notfall, sellti die 12000 wasch scho hent de appa doch nit längu. Mu cha ja niä wissu, schliässlich isch ischi Madame la Presidente in Sache Shots kippu momentan gad ufum Höhepunkt va irusch Karriera.

 

Nach dum Üftritt isch vor dum Üftritt, das, so isch nisch de alle iglüchtut chänne wär das Jahr nimme allzu vielmal säge und so hei wär nisch churzärhand därzüä äntschiedu im Instrumäntudepot nu grad du Blues zum beschtu z’gäh, woll öi darum, und ich hetti fasch nimme dra giglöibt, will ischärs Sousi schine zweitusch Jokär de doch nit gibrücht het. Dum Sämy het das gad där kompletti Räscht gigä und är het schich, vo alle unbemärkt, vär 20 Sekunde värabschiedut. Nach dem strängu Fasnachtsmarathon wan är hinnär schich het, het schine Körper miäss neu gebootut wärdu. Är het also schini Festplatta gweiput und alls zämu nöi üfgstartut. Z’Ziggizäggi vam Raoul, vär inu wiä z’Intro va Windows 2000 het nu de abär wiedär anär hiäsig Wält la teilnäh. Und wer schich jetzt der Neustart nit cha vorstellu, vär denu hanis hiä nu bildlich zär Väraschaulichung. Äs isch allärdings meh odär wenigär gstellt, isch doch das Foto de ganz am Schluss ersch z’Sängärma äntstandu, wanär allärdings öi nu mal än churze Üssetzär het ka. Aha ja, das lings isch de übrigens ische Sämy, das rächts schine empfärnt australisch Vettär Walter Wombat. D’Ähnlichkeit isch doch eifach värblüffund, nit wahr.

 

Abgseh va dem Foto het’s natirlich öi nu eis vam hertu Chäru gigä, wa schich vär das Mal nit mime WC-Stöpsil imene warmu Hüüs het chännu träffu, sondern wiedär inär troschtlosu Garage va de Imsängjini. Immärhin hets nu äs volls Gascho Biär da ka, das het abär de öi nimme alle sehr gmundut und so het där hert Chäru nimme die Üsdüür und Kadänz ka wiä an de vodru Fäschti, abär immärhin vär eis Biär und äs Foto hets glängt.

Natirlich ärwähnt soll öi nu där Stägär hert Chäro si. Die hent anstatt uf Biär inäre dunklu, chaltu Garage, meh uf warmi frischi Gipfla bim Beck gitippt. Welle hert chäru dass jetz där bessre isch gsi liegt allein im Auge des Betrachters, aber ei hert Chäro het royali Beteiligung ka.

Ja d’Fasnacht zeichnut langsam abär sichär irusch Spure ine Körpera und ine Gsichtär va de Chnätschära und dara isch nit numu z’Landi mit schinär Airbrushmaschina tschuld. Nenei, geichti siwär mittlärwil so sehr, dass Nahtag scho gar keis Thema meh isch und schminku tiänt schi die eintu öi länger je meh, äso dasmu die dicku Tränusäck nit gseht. Abär was nimmt mu nit alls uf schich, vär än Teil va där beschtusch Guggumüsig va där Wält z’si. Ischä Luki värpasst darfär sogar sit drii Jahr z’ersch mal än Üswärtschschlegärii, ui pardo ich meinu natirlich Matsch.  Z’Sämy lüägt scho gar nimme uf Warnzeichu vam Körper und het mittlärwil nu zwei züsätzlichi Blase ane Händ, z’Päddy verzichtut uf schine heissgliäbt Gätschsamstag und die Königin Melanie bhaltut där ganz Abu tropfniächtärs die Meuta im Ubärblick. Ja ich darf säge, ich bi öi stolz Teil därfa z’si das isch bis jetz nämlich wiedär än super Fasnacht gsi, und ich värzellu jetz öi nu nit meh, will schi isch ja nu grad nit fertig.

 

So lüägi vorwärts uf du inoffizielli, offiziell Abschluss am Giggelitsischtag und wünschu alle än ärholsame Sunntag, dum Joni än güäte Start ini Driessgär, ah und natirlich – Weltfrieden -.

Ewe iär wisst scho.

Bäru, 15. Februar 2015

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX 

Fasnacht Hoch 2

 

Nu immär ä biz greddrut vom emotionalu Üsbruch va vor einär Wucha (abär das Thema hei wär jetz durch) hei wär das Wuchunänd grad an zwei Fäschti därfu ga fäschtu. Und so is cho wiäs het miässu cho, eis Fäscht isch quasi nahtlos ins annär Fäscht ubärgigangu. Abär feh wär va vorna a. D’Mama la Presitente het isch Sängärmaner, Familie wiä wär mittlerwil alli zämu si, höchstpersönlich zum Stäg ans Sanpanchos gfahru. Und das bereits ganz früäh an dem Fritag. Isch ja klar, Stäg heisst öi immär fein Apperölu bi Brägys iner Garage. Und da laht schich z’Päddy und d’Mela gar nit la lumpu. Schi hent öi das Jahr wiedär üfgitischt, ald gäbis keis Moru, äs isch äs wahrs Schlaraffuland gsi. Nach Päddy‘s Absacker va vor einer Wucha hei wär scho befürchtut äs sige de appa nur Mineralwasser ufum Büffet. Aber oho, so schnäll git isch Päddy nit üf und isch öi jetz scho wiedär vorna därbi gsi. Vär alli was värpasst hent, hiä is no väraschaulicht J (Müäss si Päddy sorry)

Diär und där Mela uf alli Fäll äs riesu Merci vär z’jählich Apèro wa wär ganz sicher niä meh welle värmissu. So voll im Gnuss hei wär de du Üftakt vam Umzug doch glatt värpasst. Isch abär nit schlimm. D’Mama het alls im Griff und weis genau wenn wär wirklich am Start miässe si. Ob schi schich Sorge gmacht het, wiär ärcheltegi nisch im Jahr vär Jahr wieder furchtbaru Stägärwätter oder ob’s isch gsi, will öi schi z’Apèro bis zär letschtusch Minüta het wellu gniässu, uf alli Fäll si wär so knapp zum Umzugsstart, daswär grad fasch hei chännu afa spielu bis alli sind da gsi. Gitriebu vam mittlärwil wohlbekanntu Piärvärlangu hei wär där längschtusch Umzug inär Oberwallisär Fasnacht tapfer uf isch gnu und bis zum Schluss hent einigi Chnätschära gspielt, äso das z’Instrumänt nit gfreert. Das Jahr, und das isch scho fasch wiedär än Premiere hei wärs’s öi mal wiedär ans Nachtässu gschafft. Abär öi nur will z’Präsidäntupaar mittlärwil nimme ufum Wäg wohnt. Wie dem auch sei am Ässu zum Sanpanchos het schich sit eh und je nix gändrut. Abär ich will nit wieder afa Chochleffla z’värteilu, die Ranglista isch durch und wiär wisse alli wer da jedes Jahr z’Rännu macht. Ämil nit d’Stäger.

Uf du Üftritt, vär eis mal, und ich sägu wiär chämme immer besser mit dä Zite, scho fasch z’früäh, nämlich im zwänzg vor zähni, hei wär alli druf gwartet. Hei wär doch nit wenigär wa äs gfühlst Nuklearbombuarsenal va du Amis, an Konfettiknüller köift. Das het doch hiä zum Stäg grad miässu giteschtut wärdu. Där perfekti Platz vär du Knall hei wär öi scho ka. Där Voulez-vous anärbiätut schi ja darfär richtig. Die Posüüne hetti schich abär gschiedär ämal di Zit gnu di Bidiänigsaleitig vor dum Üftritt z’läsu und nit ersch währund. So is de cho, dass tatsächlich kei einzige Knaller, wenn ubärhöipt, zär richtigu Zit abgigangu isch. Där letschtusch Spätzünder sogar nu bim Abgang va där Bühna. Abär Übung macht den Meister und wiär hei ja nu gnüäg Knallär, also auf ein Neues. So wiä di Knallär sind z’spaat abgigangu, isch de mines Ärachtu öi där ganz Üftritt gsi. Solid, giknallte hets ämil, abär wiär hei scho Bessärs uf z’Parkett gibrungu. Liegt abär wohl öi ä biz am Musikus. Am Schluss du Schlüpfer wellu asäge und Ständer gseit, där Solist isch schiär ärbleichut, abär het öi die Härüsfordrig grandios gmeistrut. (Tschuldigung Steff). Um än Ärfahrig in Sache Pyrotechnik und äs Biärfass richär hei wär ämil di Bühna öi dasmal mim Rammlär värlah und denu nacher nu vär isch im Instrumäntudepot zum beschtu gigä, bevor dass wär z’gscheicht Biärfass ubärstürzt agstochu hei und z’oglibat Ziggizäggi gipfäffrut isch wordu. Das het de an dem Abu nu än träguni Rolla gspielt, abär das chunt nu. Gstercht, odär bessär gseit gfillt si wär zrug an die Bare. Die eintu hets mal wiedär zu de Shots gschreckt där Räscht isch liäbär bi de altbekanntu, värgliichswis ungfehrlichu Gitränkt gibliebu, im Wissu drum, moru isch de öi nu än Tag. Und so het öi der Abu schine Löif gnu und isch alles in allum drus bestandu, z’fäschtu, fäschtu, fäschtu. So das d’Mama im füfi ab dri die letschtu Chnätschär üs dum Instrumäntudepot regilrächt het miässu üssaschrecku und inu Bus värfrachtu. Abär was willt, wenn d’Leiggibrothers mitm chleinu Balianosxandi anär Box stehnt, git’s keis haltu und kei Zit meh J Die Carfahrt zrug, vär eis Mal wiedär bedröhnt gsi, va de schreegu Kläng zum ABC-Liädji. Ob’s am Alkoholpegil liegt, daswär zwei Mal du N oder is jetz scho wiedär där D gsi, ich weiss doch öi nimme, durchgla hei leh wär la offu stah, wichtig isch nur, dass nisch där heilig Alain öi dasmal engelsgleich und sanft wiä uf Wolke gibettut zrug heim het gibrungu und das bi dene Strassuzüäständ.

Und siehe da, äs git nu nu. Ich ha scho gmeint är sige ine ewigu Anaale va där Porretschchnätschärgschicht unüffindbar värschwundu. Abär wennär mal zrug chunt de chlepft är voll dri. Ja liäbi lit, där hert Chäru isch wiedär da. Z’Rezäpt wiä wär du hert Chäru ab jetz wiedär jedes Mal finde hani mär de also öi grad gmärkt. Man nehme äs warums Platzji (am beschtu än ganzi Hitta va güätär Qualität wa alli nit Fasnächtlär feriuhalber üsgfloggu sind), gnüäg Alkoholvorrat, zum züäsätzlich fascht leeru Biärfassji, zwei Leiggini (eis darfa gfillt mir CO2 üs dum mittlärwil leeru Piärfassji, är hets eifach nit wellu glöibu), abär nu bessär drii Leiggini, de hesch än Ärsatz (Das isch wiä mit där Hefemängi, das müäss eifach abgstimmt si), äs gmiätlichs Salzgäbi zum Üsglich und z’Wichtigsta, die Gheiimzüätat, än WC-Stöpsil. Z’Ärgäbnis, wemu de alls richtig gmacht het, än wunderbare güät üfgigangne, und schich ubär Stunde dahinziähunde herte Chäro. Ich fröiu mi, z’hert Chärufoto vam Sampanchos zum Stäg därfu z‘präsentiäru. Wa där Stöpsil susch nu ubärall glandut isch isch zwar dokumentiärt, abär igstuft unnär „Top Secret“ im Peinlich Archiv va ischär Fotografin.  So viel darf gseit si, grüüsigi siwär nit gsi.

So is de halt cho, dass d’Nacht scho wiedär fasch zum Tag isch wordu und där güät chännu gibrücht Schlaaf uf speetär het miässu värschobu wärdu. Das där Grund öi warum dass schich eis fäscht fasch mim andru het värschmolzu. Wa de nämlich d’Leiggini wiedär sind uf de Bei gsi (ämmil meh odär wenigär) und eis därfa immär nu mime CO2-gidehntu Magu, isch där Hungär nit wiit äwäg gsi. Nach Pizza und Pasta hei wär alli Lust ka, also ab zum Italiener. Und där värlorni und inu Sand gsetzti neetigi Schlaf kompensiäre wär doch am beschtu midume Wellnessprogramm im nöiu Brigärbad. Hei leute was het das güät gita und was isch das luuuuuuuuschtig gsi. Där einzig Negativpunkt, äs bizji Ziitdruck. Abär alles nur vär än güäti Sach im halbi füüfi hei wär nämlich wiedär z’Sängis miässu atrabu. Z’Stöpsilsämy het zum „Vorglühen“ mit Chicken-Wings-Festival igladu. Das leh wär nisch doch öi nit la äntgah.

So hei wär nisch cirka viärzig Poulet spetär wiedär im Porretschbus igfundu und si ab Richtig Leigg zu du Schnägguschränzär. Äs Fäscht wa vär gäng ziemlich zeeeh afat, därna abär meistens hammermässig wird. D’erschtusch Blonde 25 Chischta het nisch ämil scho churz nam Umzug im Fäschtzält ärwartet und üs einära sind de bald ämal soviel wordu, dasmu scha an zwei, värgiss einär Hand scho gar nimme chännti abzellu. Obwohl wär in Tat und Wahrheit nur ei Chischta köift hei. Wo än schlaue Fux nämli gmärkt het, das 24 Blonde älleinzig wenigär chostent wa än Chischta mit 24 Blonde, hei wär ischi Porretschvärziärt Chischtan halt immär wiedär mit einzelen 24gär Bstellige üfgfillt. Und die Piär hei wär de öi wirklich alli miässu brüchu. Schliässlich will Piär üfmachu mit dum Stirna giäbt si. Där wahri Meister in der Disziplin isch sichär ische Dulli, abär richtig Idruck gschiintut het ischi Scha9 darmit bi de Balianos wa schi än värdächtig langi Zit irusch Abu värbrungu het. Züägigä ich appa nit wenigär dum Xandi sei Dank. Nitämal där gfeikt Üfrüäf vam Sämy im Porretschchat, vawägu äs gäbe Biär zum halbu Priis im Partyzält, het nisch la zrug riäfu. Äs güäts Intermezzo zwischu dene ganzu Biär und de riesigu Beule mittlärwil uf där Stirna het ische Üftritt z’Mittärnacht im Partyzält gibrungu.

Isch doch churz vorär das Zält nu fasch leer gsi. Het’s schich um die Geistärstund bis fasch uf du letschtusch Platz gfillt und mu munklut tatsächlich, dass wirklich alli die Porretschchnätschär hent wellu kehru. So eppis spricht doch vär isch. Isch abär öi grächtfertigt, si wär doch di sälbstärnännt beschti Guggumüsig uf där Wält und lüt dum Schnägguspeakär das Jahr 30 Jahr alt cho, isch ja öi eifach grächnut wiär si ja im 90gi gigründut wordu J So hei wär de natirli ischi Pflicht öi vollumfänglich wahr gnu und dum Publikum öi där wahri Chnätschärsound wellu biätu. D’Setlist mit alle Porretschevergreens gspickt voll, hei wär die Bühna de öi wiä gigwohnt mit dum Stand up beträttu, gfolgt vam schönstu wa wär hei, dum Ständer. Där Blues und där Schlüpfer sind de scho fasch unnär ferner liefen nimme ärwähnunswärt, hei wär doch mit dum Wälschu wiedär alli chännu värzöibru, mim Värbotnu än perfekte DSDS-leider-Nein värdächtigi Gsangsilag gibotu und, dasmal zär rächtu Ziit mim Voulez-vous di Knallär gizündut und äs Stünu durch d’Mängi la raunu. Z’Tüpfilti ufum i, där Rammlär eis mal durch und äwäg, chännti mu jetz meinu. Abär där Üftritt isch so där Hammär und spassig gsi, das där Musikus alli bim Igang vam Zält numal gstoppt het und där Rammlär vär eismal nu vor dum Publikum het la fertig spielu. Chnätschär ich bi stolz uf ew, isch genial gsi der Üftritt.

Jetz hei wär nisch nu där eint odär annnär Drink värdiänt bevor dass in zweiähalb Stund scho wiedär Heim geit. Ich vär mine Teil hat d’Wiibar vär mich änddeckt. Der Gheimtipp am diesjährigu Schnägguschränzerball. Andri Chnätschär hent nu die Tanzbühna änddeckt und ei Chnätschär än falsch What’s app Chat abär das isch gar keis Problem, wiär si doch schliässlich öi alli Spitz uf dich J Und so het der Abu wiedär viel z’schnäll äs Änd gfundu. Ufum Heimwäg zrug hei wär äs nöis Liäblingsliäd änddeckt, wawär grad sälbsch komponiärt hei und där hert Charo het öi am hittigu Abu wiedär Isatz ka. Schliässlich het ja där Stöpsil deheimu gwartet. Gschlaggne und än värschläppti Ärcheltig im Nacko het dische hiä du hert Chäro als erschte värla. Was abär nit müäss heissu, dass de fertig isch. Nei, chämmentsch nu sogar numal üsum wohlvärdiäntu Schlaaf cho riessu, bevor dasch schich de sälber in d’Fädre leggent.

Nur äs paar Stund und viel zwenig Schlaaf speter vibriärt abär scho wiedär där Chat. Där Üfrüäf ob eppär chämme ga schlittlu isch abär uf ziemlich wenig Resonanz gstossu und där Iniziant het alli schinu Ubärredigskinst und än Cholera miässu isetzu, das immärhin z’Diegi, z’Stöpsilsämy und z’Xandi du Wäg mit ihm uf Blattu gfundu hent. Das Fasnachtswuchunänd hoch 2, so schiints, chännti värmüätlich nu ewigs witärga. Abär irgendwenn müäss tatsächlich alles äs Änd ha und so hent schich öi die hert gsottnu Schlittlär ämabu nachäme letschtu Wiisbiär in eini va de schönschtu Wuchunänddepressione gstürzt. Mit de Gidanke an die letschtu zwei sensationällu Porretschnächt mit där Familie.

Äs sige alle gidankt vär du Isatz und freuet che doch äs bizji uf du negscht Sunntag. Ich uf alli Fäll hoffu uf güäts Wättär und de wird das wiedär än wunderbare Familieüsflug.

Bis de also, ewe Webmaster.  

Bern, 6. im Fasnachtsmonat, 2015

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

 

Hoooooooooochhhhh !!!!

 

Liäbi Chnätschärinne und Chnätschär.

Scho ei Wucha nach ischum Fäscht hei wärs also wieder wellu wissu. Lüäge obwär scho wiedär mäge fäschtu, fäschtu, fäschtu, odär obwär nu ärschlagni si va där 5. Porretschparty. Was tiäti schich fär denu Test bessär ärgä, als d’Mesireccas Night z’Äraro. Äs fahrt keis Bus, also heissts open End. 

 

So hei wiär isch also am spetestens zwänzg vor achti ämabu, was schi d’Madame la Presitente mit der Zit gideicht het isch mär immär nu nit kla, z‘Äraro ufum Dorfplatz igfundu fär an du Umzug z’startu. Där Musikus het de gad scho mal z’erschtusch Härzchriäsi värcho, wanär gseh het, dass nur grad 3 Trompete und 3 Posüne awäsund sind gsi. Immähin, das Rhythmus het kompletts Ärschienu chännu värmäldu, absolut Top. Das het das ganza abär öi nit weniger asträngund gmacht vär isch Bläsär. Aber trotzdem, auf in den Kampf und los mit där Schlampa Richtig Schiibumoos wa z’Fäscht uf isch gwartut het und das isch ja där gross Plan gsi va där Wucha, fäschtu, fäschtu, fäschtu. So hei wär also öi der Umzug meh oder minder durchzogu durchgizogu und d’Instrumänt de schnäll värsorgt, vär scho mal die Bar ga izwiehu. Unisono hei wär nisch also ins Getümmel bigä und äs het niämmär lang miässu warte, scho het jede gwisst wa die Porretschchnätschä stehnt, zwei Kilo Konfetti lehnt schich schliässlich nit wirklich güät la värstecku, vor allum wenn d’Madame la Presitente und där Sämy ständig därmit gschmirrt wärdend. Abär där eignetlich Grund vär di Konfetti, isch än reine SUVA-konforme Isatz gsi. Hent schliässlich die ganzu Biär wa scho churz druf du Bodu ubärschwämmt, Carole mu hockt schich nit uf än Bar, wellu üfgsugu wärdu, so dass das Mesireccas Fäscht unfallfrie cha ubär die Bühna ga. Ihaltu va Sichärheitsvorschrifte also sozäge. Und glöibet mär ich ha minu Ärfahrige mit uf Bare stah und üsgleschte Biär. So hei wär de Mesireccas darmit also eiguntlich öi nu gad än feine Diänst zum Wohle va där Sichärheit ärwiesu. Winterdienst à la Porretschchnätschär J

 

Nur churz druf het d’Madame la Presidente öi scho d’Üftrittszit chännu durchgäh. Dum Ganzkörperisatz va ischum Vize isch z’värdanku, hei wär mit zwänzg ab elfi än sehr än humane Zitrahmu vär ische Bühnuüftritt ärgattrut. Abär va ischum Vize ärwarte wär schliässlich öi nit weniger, als dasär, wenns de mal um Shots geit, in d’Räng chunt. (Vielliecht, und das isch jetz nur värmüätut, hent ja die Balianos mit irusch 12‘000 Shots wasch ja angäblich fär irusch Fäscht bstellt hent, schich doch nit värrächnut, sondern ische Vize uf där Gästelista. Wiär gsehs ja de wenns so wit isch) Wiä öi immär, das alles het du Musikus in dem Momänt jedoch öi nit wirlich chännu berüähigu, het är doch värsüächt än Setlista zämu z’stellu, wa ganz ohni Solist und Sousi (letschters hei wär de doch nu eis ka, jedoch unvärhofft) üschunt und midere starch gmindrutu Bläsärgruppa z’schaffu isch. Nit das där Musikus schine Müsikär keis spielerischus Värtruwu würdi ängägu bringu. Abär in der Situation is sehr gläggu cho, hets än Schottubar am Fäscht ka. Nachäme Whiskey gseht schliässlich alles grad viel besser üs. Und da soll numal eppär säge Alkohol sige öi kei Lösig. Küm inär Whiskeybar acho isch die Entdeckung vom Abu cho, nei, vam letschtu Jahrzänt bessär gseit. Äs git tatsächlich wiedär Hooch, Hooooooooochhhhhh liebe Leute!!! Ob die freudig Äntdeckig där Grund vär denu tränuriich Abu isch gsi (Ui, das därfti glöib gar nit säge, wobi, Freudentränen gent ja wohl nit unnär die präsidiali Zenzur, wani ufärleit ha värcho, odär ob die nassu Tropfe, vär äs annär Wort z'brüchu andri nu schöneri Grind het ka, isch än andri Gschicht wani hiä , äbu wägs där Zensur, nit wellti breitträttu:-) Das Kultgetränk üs Zite wani eiguntlich sowieso nu nit hetti därfu trichu uf all fäll, isch also tatsächlich wieder uf dum Markt. Das le wär nisch öi nit zwei Mal la säge und schittes in raue Mängine ischi Kehla väräbri. So funktioniärt Üftrittsvorbereitig. 

 

 

Ä bitz nervös sindsch de aber trotz all de Hooch doch nu gsi, die Chnätschärinne und Chnätschär, wasch am zwänzg ab elfi uf du Üftritt gwartet hent. Die Nervösität het nisch de öi där Serenas Matzi nit chännu näh, wa schich, und das ungfregt, äntschlossu het ische Hüüfo mit schiner Awäsuheit uf der Bühna z’värgressu. Immärhin hei wär so de doch nu äs Sousi mit isch uf där Bühna ka. Inwiäfärn das z’Zämuspiel üfgwärtut het willi hiä nit ärörtru. Abär merci Matzi vär dine Isatz. Där Lohn isch ja nit wenigär gsi, als dass du mit där beschtusch Guggumüsig vanär Wält bisch gseh wordu, was dinum Fasnachtsimage sichärlich ä riesu Üfwärtig bringt und nit z‘värgässu än warmi Wollchappa want öi nu hesch chännu ärgattru. Chapeu J Där Üftritt sälbär, abgseh va där Spitzuleistig va ischum Ersatzsousaphonist, jederzit wieder, abär mit där Chappa, isch de dasmal halt doch än Mischig zwischu gekonnte Kläng hiä und da und totaler Atumnot sitens de Bläser gsi. So hei wär d’Setlist öi rächt schlank gibhaltu inär Hoffnig, daswär de d'negsch Wucha wiedär zahlricher die Bühna mäge fillu. Trotzdem, eis Highligt hets öi bi dem Üftritt gigä. Värantwortlich dasmal därfir abär wäder än Solist nu Konfettischleudre. Nei ischu ganzu Mitglieder hent z’gsamti Porretschfäscht-OK in d’Sprachlosigkeit gitriebu. Z’mitsch währund dum Üftritt het nämlich d’Scha9 äs Mikrofon värlangt. Ich ha de scho mal värlägu än Schritt zrug gmacht, hani scho gideicht schi chäme uf d’Idee Wanabe z’singu. Abär nei, das is nit gsi. Schi het schich im Namo vam ganzu Värei bim OK vär du Isatz vär ischi 5. Porretschparty bedankt. Das ällei weri ja vär mine Seelufriedu scho vollkommu gnüäg gsi. Alli Strapaze vam Fäscht sind nämlich genau in dem Momänt wiä wäggiblasu gsi, aber zu dene lobundu Wort därzüä het’s nu vär jedes OK Mitglied än Fläscha Wii mit Spezialettiketta gigä.

Z’OK, und da redi glöibi vär alli va isch, isch zutiefst griährt gis. Und ich glöibu öi das darfi im Namu va alle säge, danke vielmal Chnätschär iär sit die Bestu und ich wellti kei andri inär Fasnacht um mich ha. Ich bi sogar gneigt gsi, mich und alli andru vär äs negschtz OK wiedär zär Värfiägig z’stellu (Ui – dass sellti de appa vor dum Väröffentlichu nu leschu).

 

Abär zrug zum Fäscht. Nach der gfühlsgiballtu Ehrärwiesig hei wär de nu va neuum Müät gstercht, ische Üftritt mit dum Värbotnu und dum Rammlär im Abgang, solid, wenn öi nit uf dum Niveau va värgangne Üftritta chännu beändu. Heisst so viel wiä ab jetz gewähr ga fäschtu, fäschtu, fäschtu, fäschtu, fäschtu, fäschtu, fäschtu, fäschtu, fäschtu, fäschtu!!!!! Z’Ziggizäggi, vär eis Mal mit ganz teifum Tiäfgang sitens va ischum Vize het igscheicht und uf einer Sita d’Mitglieder zrug an die Bare und vor allum zum altbekanntu Hooch getriebu und uf där andru Sita än emotionsglatne Füässabdruck hinnärla. Wie dem auch sei, d’Madame la Presitente het mär, wiä scho ärwähnt, an dischär Stell än präsidiale Müülchorb ufgitrickt, also darfi hiä nit z’üsfiährlich wärdu, obwohl, dass doch eiguntlich nur schön weri (Äs herrscht wiedär mal Zenzur). Soviel darf abär gseit si, das Foto hiä isch appa das am wenigstu emotionsglattna angesichts de Umständ wiäs äntstandu isch und scho da gehnt ja einum fasch die Grime. Hettis nit sälber gseh würdis ja öi nit glöibu, abär an dem Abu hetti där eint odär andär Chnätschär nu äs paas Konfetti chännnu brüchu vär äswa eppis la üfzsügu, so um z’Blickfäld drum um.  So das längt jetz abär. Äs isch eifach bittersüss wiä warme Honig richtig Seela gschlittrut. Danke numal jedum einzelnu Porretschchnätschär. 

 

Zrug zär Bar, wa schich d’Chnätschära zruggizogu hent. Z’Hooch het die mentalu Gsprächi de öi nu biz värstercht bevor das knapp na de zwelfe z’letschtusch Fläschi därfa isch ubär du Ladutisch gigangu, äs het miär kehrt :-). (D’Chnätschära, natirlich nur unnär andrum, hent das Gsöff regilrächt iglescht). Abär öi d’Umstellig nah de zwelfe isch nit wirklich schwierig gsi, so hets nach dene mentalu Gspräch mentholie Gspräch gigä will de öi scho glich die erschtu Mördertees hent d’Rundi gmacht J

 

Wiä das de äbu öi so isch am Mesi, jede so lang wiänär mag. Z’Dulli het dum Aschien nah nur nu gad uf du Maccarena gwartet, vär isch Chnätschär z’zeigu wiä mu das richtig tanzt. Churz druf het är nämlich du Blinde gnu und wart nie wieder gesehen. Ob das jetz am Hooch, am Whiskey odär anär Mischig gläggu het. Värmüätlich nix va dem, är isch wahrschlienlich eifach immär nu miäde vadär Porretschparty gsi. Abär öi ich ha am halbi zwei ämorgu miässu die Bei unnär d’Händ näh und du Heimwäg aträttu. Där Grossteil va de Chnätschär het jedoch öi das Jahr anär Mesireccas-Night wiedär Stehvärmögu gizeigt. Mine güät unnärrichtute internu Quelle zufolge,heint d’Chnätschärinne und d’Chnäschär ämil nu sche teif ins Glas glüägt, bevor dass scha de z’Securitas, eis Mal meh nach Üssärbärg, hent miässu üsär Fäschthalla schmeitzu. Z’Sämy het natirli de nu gad äs Iklämps mit uf du Wäg Gnu, Bim ihm geit ja bekanntlich alls durch den Magen. Leidär abär äs Rohs, ja nu, mu cha halt nit immär gwinnu. Festende heisst abär fär die Porreschchnäschär nu lang nicht Fäscht zu Ende. Z’Motto isch ja schliässlich vorgigäs, fäschtu, fäschtu, fäschtu, fäschtu. Gottlob hei wär ja mittlärwil z’Raro än Privatbar. Da gits übrigens, schiints odär hani mär ämil la säge, uvärschämt güäte Baccaradi. Und daz zum Apèro, zum z’Nacht, z’Mittag und zum z‘Abund und natilich öi alls Schlummär. Än absolute Insider Tipp z’neu Rarnär Stunduhotel „Chez Diego“. Die trichfestuschtu unnär isch Chnätschär hent schi hiä de sogar nu bis am Sunntag ämabu igmiätut. Uf d’Värteilig va de Schlafplätz (also wer mit wellum), sigs jetz am Fritag odär Samstag, wellti an dischär Stell nit igah. Abär äs schiint als hetti z’Diegi mit där Värmarktig va schinär Wohnig als Not(schlaf)stell, Getränke und Choscht inklusive (abär Achtung, nur Baccardi) än Marktlücka äntdeckt. Där Schribärling und schiinu Informantu wärdent das mal im Öig bhaltu.

 

Churz zämmugfasst chä wär somit öi va där Mesireccas-Night wiedär säge. Chnätschära äs het ganz fescht Spass gmacht mit ew. Mindär uf där Bühna, darfär mitäre hammer Ubärraschig  und där ärstüntu Feststellig, daswär fähig si, meh Konvetti z‘värteilu als die Bietschichlepfär an irusch beschtusch Täg, hei wiär wiedär ämal gizeigt, ja äs git nisch nu. Und weri nit z’Hooch, ach du Schande, so früäh scho värsiegt, ich glöibu wiär weri hittu nu im Schiibumoos und z’Dulli würdi zur Ändlosschlöifa va YMCA du Trichtakt fär isch agä. So freuu ich mich öi scho uf z’negsch Wuchunänd, wa grad zwei Üftritta agsetzt sind äbri zum Stäg und ambrüf a Leigg.

Wiär gseht nisch und heit än schöni Wucha mit prächtige Ärinnrige

 

Ewe Webmaster.

Bern, 27. Jännär 2015

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Wiär si K.O. aber ubärglücklich

Där Üftritt und z‘Fäscht z’Üssärbärg am Krach am Bärg vor einer Wucha isch z’letschtusch Fäscht gsi, vor ischär eigunu grossu zweitätigu Jubläumsparty zum 25. Giburtstag va isch Porretschchnätschär. Und wenär üfmärksam du letscht Blogitrag gläsu heit, so wissedär öi, daswär da z’Üssärbärg numal richtig Gas hei gigä, im Wissu drum, daswär scho än knappi halbi Wucha spetär in einum Stress wärde si.

 

Und äso is de öi gsi. Am Mittwuch Namittag hets scho gheissu atrabu und afa Üfstellu. Agfangu natirli grad als erschtes mim allärgregstu, mit dum riesu Fäschtzält. Doch die Porretschchnätschär weri nit die Porretschchnätschär, wensch sus nit z’Stand bringti, öi zum 5. Mal innärhalb va de letschtu 25 Jahr äs hammer Fasnachtsfäscht uf die Bei z’stellu. So hei wiär isch öi tatchräftig in die kommundi Arbeit kneiwt und gibuwt und igrümt. (Wobi das där Vik das mit dum Irümu inär där Bar im Zivilschutz wohl zu ärescht gnu het, het är doch Alkohol vär du 3. Wältchriäg in schinum chleinu Depot afa hortu. Hetti mu abär als nix gibrungu, hetär doch nur ei einzigi ärsatz Biärgasfläscha gfundu J. Gottseidank isch de där dritt Wältchriäg doch nit üsgibrochu odär ämil z’mindest nur ganz churz am Schluss vam erschtu Abu. Abär dadärzüä chumi nu. Item, und wiär hei witär giputzt und umgitischt und gstromut, ja was hei wiär nummu gstromut, dum Sämy stehnt nu hittu d’Haar z’Bärg, und wiär hei witärkrampft und gwischt und gidruckt und kläbt und umgstellt und gmalt und gsprayt, än grosse Porretschhasu die Techtär und där Alte het äs Schild mit där Üfschrift „Oldie-Ba“ (Hä, fehlt da nit eppis, Lando? Soll där värzogu si, bisch ja öi nimme där Jungst J). Witär im Üfbuw. Wiär hei organisiärt, umgiplant und ubär du Hüfo gworfu. Zwischundri mal än Pause, äs Biärli hiä und da (Nur d’Madame la Presidente nit, die isch z’nervösi gsi zum laffu, odär bessär gseit, het irusch Läbra vär än spetere passundere Alass wellu schonu, abär dadärzüä spetär meh, freuet che), ä Schluck Wiesse und ä Happo z’Ässu und witär und witär und witär, durch bis am Fritag, wowär Afangsch Namittag äntlich mal hei chännu d’Arma beugu und mit de Händ ine Hüft voll Stolz uf ischärs Wärch hei chännu blicku. Wiär stelle fest, alls isch parat vär die Gäscht, also leht scha la cho. Gschniit hets öi nu nit und där Bischoff het värsprochu das bliebe so bis zum Ändi vam Fäscht, abär giglöibt het mus niämer (Tja Leute, hetär rächt giphaltu odär nit?!). 

 

Äs cha also los ga…

Fehlent nur nu näbs de Guggumüsige, aber die sind sichär scho unnärwägs, die Dorfbevölkrig wa nisch tatchräftig chunt ga unnärstützu. Dum Flyer im Briäfchaschto truwent nit alli, am allärwenigstu d’Macher sälber, also müäss nu än Spontanidee uf z’Parkett. So hent d’Scha9, z‘Stromär/ich weiss nit wiä Vodka-üsscheichu –Sämy, und där Musikus churzerhand Instrumänt und Kostüm gipackt und sind ga proklamiäru. Eis mal ums Dorf und die ganz Bevölkrig müäss wissu was hittu abgeit isch z’Motto gis. Ä knappi Stund, ä schuppu Falschten, zwei gschwollni Lippe und ei Stimm weniger, spetär isch öi die Tat vollbracht gsi, z Fäscht cha afa.

 

Dadruf hei wär de jetz öi tatsächlich nimme lang gwartet. Mit dum Umzug am halbi achti het die 5. Porretschparty agfangu und ine negschtu 48 Stund irusch Löif gnu. Am Fritag bi isch chännu begriässu hei wär

  • Z’Sanpanchos zum Stäg

  • Mangepan va Meril-Filet, mit dum gregschtu Guggumüsikär was git.

  • D’Schattuschlickär wa öi mal gäru uf där Sunnusita gstandu sind

  • und nit z’värgässu d’Illgrabu Chrachär wa unnadurch, so schints ä biz gstauti sind gsi, da will där Präsidänt mim Eddy und där Regina z'glichum und där Musikus unbedingt z’Schosi. Där Speaker het schich da vellig eppis miässu alose, abär das isch ganz än andri Gschicht.

 

Mit dene viär Guggumüsige het das Fäscht ja nimme chännu schiäf ga. Und wawär scho gideicht hei, ui, dass chännti de hittu ä bitz än trochuni Sach si, hei wär feschtgstellt, dass öi andri Guggmüsige so chänt abgah wiä wiär Chnätschära und isch in Sache Barstandfestikeit und Trichvärmägu in nix nahstehnt. Ischu Üsscheicher anär Bar hent ämil gnüäg z’tüä ka und öi inär Kantina hets immär eppis z’wermu gigä. Ja ja, die viär Guggumüsige, äs isch bis am Schluss sichär va alle eppis liggu gibliebu. Abär so isch das inär Fasnacht, ab und züä finde wär sogar nu Lebändigs bim Üfrümu. Momänt – viär Guggumüsige – hani da jetz nit eppis värgässu. Hä ja, die Porretschchnätschär därfent an irusch Jubliäum natirli musikalisch öi nit fehlu. Nit das iär andru schlächt werit, miär chemi im Tröim nit z’Si das z’behöiptu, abär an ischum eigundu Fäscht hei wär öi das Mal wiedär än Glanzleistig vollbracht. Pünktlich am Elfi isch z’Fäschtzält rappevoll gsi und alli gspannt uf du Üftritt va de Chnätschära. Vollzählig, so dafi stolz värkündu, het där Musikus schinu Müsikär grad sofort la dribrätschu vär z’Publikum mit dum Stand up üfzwermu. Gfolgt sind Klassikär und neui Stickär. Natirli där Värbotne, wa die ganz Halla lütstarch het mitgsungu. Z’Solo vam Steffi het wiedär ämal d’Freuwe im Saal la ufär Wolka 9 schwäbu und där Sound va den andru Chnätschär het schi zurg gholt inäs geils Fäscht. Merci dum Publikum dass iär mit isch, ische Jubliäumsüftritt gfierut heit wiä nu niä, äs isch tröimhaft gsi.

 

Vollär Euphorie hei wär nu äs Ziggizäggi darklepft abär nachär hei wär wiedär in d’Hose miässu. D’erscht Schicht het sälber wellu ga fäschtu und so hent schich alli Porretschchnätschär wiedär an irusch Arbeitsplatz bigä und bis ämorgu im viäri durchgschafft, bevor dass schich de z’Fäschtgländ langsam het agfangu liächtu. Zum Schluss hent schich d’Chnätschär und äs paar ganz hertgsottni Fäschtär inär Porretschbar bim Vik gitroffu und nu än letschte Absackär gnu, bim Vik im Depot so wisse wär ja mittlärwil hets immär gnüäg z’trichu (Stichwort: Angscht vor dum drittu Wältchriäg). Der weri de äbu tatsächlich nu fasch üsgibrochu. Z’OK isch langsam ufum Zahnfleisch gluffu, nit so ischu Chnätschär. Wiä wär scha känne hensch keis Üfheru und sind vor där Bar sichär tüüsig mal sterchär als hinnärna dra. Zumindest där Sämy sellti ämel, so hei wär gmärkt, nu lehru wiä Dispänsär z’brüchu sind, abär das chamu immär nu am zweitu Tag machu. So het d’Madame la Presidente appa mal miässu äs Machtwort ärgriffu. Mitäre Diplomatie wiä äs Vollbsuffus und blinds Mammut im Porzelanladu het schi de mal du Tarif durchgigä. Ok het schich där eint odär andre gideicht, va där Madame si wär nisch ja die müättärlichi Strängi gigwohnt. Aber oho de, jetz isch mal z’Joni üfgstandu!!! Inärhalb va Sekunde isch z’Fäschgländ grümt gsi und das het so öi zum Foto vam Abu gfiährt, waniche nit will vorenthaltu. Kreiärt vam Zämmugschissnu sälber.

 

 

Abär spetestens am negschtu Morgu isch alle klar gsi, das z’Joni vollkommu rächt het ka (na ja, zumindest de meiste). Äs paar Stund Schlaf tiänt eifach glich güät, hei wär doch am zwei am Samstag wieder wacker miässu uf där Matta stah um alls vär du zweit Abu vorzbereitu. Där Fritag isch ja afa än supär Abu gsi, värglichu mit dem wa abär jetz uf isch züä chunt isch där Fritag nur än chleini Generalprob gsi, sozäge än Flieguschiss im Universum.

Där Asturm het nit lang uf schich la warte am Samstag. Spetestens wo scho im füfi, än Stund vor dum offiziellu Fäschtbeginn die erschtu Guggumüsige scho inär Zältbar am astah sind gsi isch öi dum hindru und letschtu Porretschchnätschär bewusst wordu, dass hitu sage und schreibe 12 Guggumüsige wellent bespasst wärdu. Chännu begriässu hei wär hittu ganz illustri Gäst üsum ganzu Obärwallis und sogar üs Zürich. Mit därbi gsi sind

  • die Trubadix va Wädenswil, wo unnär där leitig vam Tifil im rotu Chleid du Izug in d’Chuchi nu vor dum Ässu gschafft hent. Darfär het nachär irusch Präsidäntin d’Janine die wohl beschtu Pommes värcho wasch je ka het und än Iladig vär än Cervelat im negschtu Summär. Abär so si wiär Wallisär halt, Gastfreundlich. Apropos Wallisär öi d’Wädenswiler hent eine mit därbi. Zwar nur än Papierwallisär und va dana i dum Telli bim Parkplatz va Zermatt abär immärhin. Lüt Janine müäss äs schich nur nu än Üfschnittmschina züätüä und de ischär än richtige Wallisär. Ich vär mine Teil weiss nit ob da aber dum Martin de doch nu z’eint odär annär Talänt meh fehlend. Talänt het uf all Fäll am Üftritt va de Trubatix ischi Madame la Presidente präsentiärt. Gekonnt het schi schwunvoll du Taktstock bediänt und so zum Tifil im rotu Chleid gad churzerhand d’Show gstohlu.

  • witär sind da gsi, d’Leetschini ine Minireck, abär ohni Alex, der chunt mittlärwil nimme uf Sängerma (schlächti Garageärfahrige?)

  • die Balianos, wa das Jahr öi scho 25 chäment sind öi isch cho gratuliäru. Wiär freue nisch scho uf ewärs Fäscht.

  • öi d’Mesireccas hent nit därfu fehlu, wanisch dank irusch supär Idee mit de Konfettichlepfär mindestens än halb Stund meh Üfrümarbeit kostut hent, abär wartet nur ewärs Fäscht chunt de nu J

  • begriässt hei wär öi di Tschabe va wiit hinnärna dum Dalatelli. Anstatt warums Quellwassär hent schi ä schuppu trichfeschti Fasnächtlär mitgibrungu, und nu hittu wartut äs Obärteil vo einum va ine uf schine rächtmässig Bsitzär.

  • Nit z’värgässu di Grabatzuchlepfär wa scho am Vorabu hinnär där Bar tatchräftig mitgholfu (Ja mitgholfu, nit gsuffu, iär glöibets nit) hent. Da schi nisch ja schliässlich ä schuppu Shotbrättär gsponsrut hent, hensch öi üsgiebig va dene wellu trichu.

  • D’Spinnwahnis, wird ich persönlich lang nimme värgässu. Inne is z’värdanku das miär na irusch Üftritt kei Mänsch me isch in nechi cho, hani doch nam Porretschchnätschu nimme därfu z’Müül üfmachu. Was vär äs Gscheich. Härzlich Dank, äs chunt alles zrugJ

  • Öi d’Schratti-Schränzer sind mit vo där Party gsi. Nit ganz vollzählig abär darfär umso fäschtigär.

  • Nit z’värgässu d’Rafjifägär va Brig. Ine värdanke wär sichärlich än lustigi Busfahrt nechstens in d’Üssärschwitz wawär irusch Gscheich, z Drinkopoli wärde uf Härz und Niäre und Läbra testu.

  • Abär öi die Tinugejitscher va Salgesch hent nisch mit irusch Awäsuheit beehrt. Zum grossu Värdruss va där Speakäri. Schi het vor irusch Üftritt miässu ga äs Angstpissi machu, willsch gmeint het, schi miässe de appa pletzlich nu Wälsch redu.

  • D’Schnägguschränzär va Leigg hent ra da scho wenigär Angst bereitut, die sind z’wiit hoch obina ubär dum Röstigrabu, hent abär wiä alli Guggumüsige öi mit irusch Sound ubärzügt.

  • Där offiziell Abschluss vam Guggumüsigabu hent d’Judäarämplär uf z Parkett gleit mitume sensationellu Üftritt. Und das isch nit z’värachtu vär um die Zit wa schi ka hent, ämorgu am halbi zwei.

 

Ew alle zämu äs ganz äs grooosus Merci. Iär heit du Abu nit nummu muskalisch beriechrut sondärn öi ischär Kassa rächt güät glüägt. Ischi Finänzleri isch ämil immär mitume Strahlu im Gsicht zrug ins Büro gluffu (Nei, gsuffu hetsch nit, das isch de spetär cho bi ischär Finänzleri/Madame la Presidente, ich chumu därzüä).

 

So het schich de öi nu där zweit Abu schliässlich ziemlich in d’längi gizogu. Än ganz än glaffne Gestjär hei wiär Mongä, odär zwischudri öi mal Schwuchtilsehn bzw. Bridä, gmeint, bringe wär nimme wäg, abär öi är het schlussändlich nu nach unändlich viele Beschimpfige du Wäg heim gfundu. Zwar nit in schiis Heim abär, z’Zimmär vam Luki und schinär Fröindin schient anschienund äs ziemlich güäts Obdachlosuasyl z’si. Z’Tini vär schine Teil het schi das Theater ämorgu im sägschi nimme wellu atüä het är schich wohl gideicht und het viel liäber du Wäg richtig Turnhalla zu de Trubadix gsüächt. Schiints heigi är da nu miässu ga än Matratza fillu, was ich ämil so mitvärcho ha. Abär churz druf hetär de doch liäber du Züü giküsst und schich öi heimwärts ins eigund Bett värkrochu. Obär die Matratz äch tatsächlich nu vollgfillt het, wird wohl uf ewig äs Gheimnis bliebu. Darfär hei wär abär üssagfundu, das Knagglu, das nöii Modewort 2015 wird si. Än Mischig üs Knallu und Nagglu, Knagglu haltJ

 

So het öi där zweitusch Abu schlussändlich doch nu än z‘friedne Abschluss gfundu und öi z’Mammut hei wär nimmä miässu üssa lah. Viel z’gross isch d’Angsch gsi, z’Joni chäme susch mit schinum Löibgebläse numal värbi.

 

Wo alli de am Sunntag ämorgu nu wohlig warm ine Fädre gläggu hent isch dische hiä scho wiedär uf Achs gsi. Het är doch du Üftrag ka, die Trubadix ga z’wecku und Früähstuck z’serviäru. Biär hentsch zum grossu Ärstünu ämorgu um die früäh Zit doch nu keis wellu, nit ämal där Martin der Wallisär (schäm di, da hetti wär äs erschts Talänt wa där nu fehlt), darfär Kaffe und vor allum Nutella in rauen Mengen. Eini het där ganz Bächär gad vär schich sälbär gibunkrut. Abär die Trubadix hent öi ä schupu Energie gibrücht, musikalisch sind schi nämlich öi am Sunntag nit z’stoppu gsi. Küm agleit hent schi scho wiedär irusch Instrumänti gsattlut und uf dum Parkplatz äs Früäschoppukonzärt gigä. Där Tifil im rotu Chleid (Waldi) het numal als üs schine Musikär üssagholt. Ja güät, z’meista hani nachär sälber üs ine üssagholt, wan de ich z’Zepter ubärnu ha. Där Waldi het da nur nu näbubi so biz gfuchtlutJ Äs het uf alli Fäll Spass gmacht mit ew Trubadixlär. Negsch mal hei wär de uf alli Fäll öi Kaffee währund dum Fäscht vär ewi Fänneri, dass üfztriebu isch die Härüsfordrig vam Abu gsi vär ischärs Päddy. Und Janine, D’Iladig vär du Cerelas vam Uli im Summär steit, hiä isch dine Coupon.

 

Eis va de schönstu persönlichu Ärläbnis an dem Fäscht isch öi nit z’värgässu. Där inoffiziell musikalisch Abschluss vam Abu. Där Leila, va ganz teif üsum Härz und mit viel Luft ine Lunge. Danke Scha9 und Dulli.

 

So het das Fäscht värmeintlich de öi äs Ändi ka, abär nur värmeintlich zu ischär Madame la Presidente chumi de nu gad, ich värsprächus. Vorär wellti abär nu zu mine Dankeswort cho. Agfangu im Sunntag mit dum Üfrümu. Hei iär Chnätschärinne und Chnätschär sit eifach nur grossartig. Lüäget mal das a.

 

 

Nach dene strängu Stunde heit iär tatsächlich nu so zahlrich du Wäg wiedär uf z Fäschtgländ gfundu zum hälfu Üfrümu. Danke vielmal, ew Mitgliedär isch das güäti Glingu va dem Fäscht z’värdanku. Und natirli öi ische ganzu Hälfär wa nisch wiedär mal nit im Stich gla hent. Ob inär Chuchi hinnär där Bar odär bim Üf- und Abrümu. Uf ew isch Värlass öi darfär äs grossus Värgältsgott. Merci säge wellti natirli nit z’letscht öi alle ischu Dettachiärtu als Chef. Dum Sämy als Chef Nachschub, gottlob hei wär dich nit ine Bar gita, will Vodka üsscheichu müäsch wirklich nu lehru. Und öi als Chef Strom bisch voll uf Draht gsi. Jede Wunsch hesch ärfillt, sogar de nu wa di d’Fritös fasch ins Grab gibrungu het. Diär Ivan vär d’Organisation va där Chuchi, want du bis churz vor Schluss supär sälber organisiärt hesch. Und hiä nu härzlichi Gratulation vär du Nachwuchs. Du hesch än güäte Stv. ka. Merci Dulli hesch du d’Chuchi so churzfristig ubärnu und mit dinum supär St-Stv, perfekt organisiärt. Ich bi där vär ewig dankbar vär die genial Idee mim Kärchär. Natirli öi än Dank an die Barchefs, Scha9, Diegi und Viki vär d’Sälbschtändigkeit wan iär bi dem Fäscht wiedär Mal anu Tag gleit heit, so das die Bare ganz eifach funktioniärt hent. An dischär Stell än unvärzichtbare Dank an ischu zwei ehemaligu Mitgliedär dum Remo und dum Lando vär die mit Härzblüät üfgibuwti und betriebni Oldiebar und die Altersweisheit we wiär Jungu mal vor dumene schiär unlösbaru Problem si gstandu. Mit äb bitz Chläbi und äs paar Pünes, glöibi tatsächlich, chänet iär zwei die ganz Wält rettu. Natirli öi där Fröi vam Lando danke. Öi schi het tatchräftig d’Oldibar mitorganisiärt. Dodo, dank dinum chlizechleinu Putzfimmil (und das meini durchüs liäbenswärt) gseht die Bar hittu bessär üs als dazumal wennsch nu nöi isch gsi. Ich würdi gad äs Plätzli uf dem Bodu ässu wewär ru nu hetti. Abär öi alle ische Sponsoru und de zahlrichu Gönner wellti härzlich Merci säge. Iär träget därzüä bi, daswär än dicke, fette Bonus üs dem Fäscht näme, danke darfär und vär d’Unnärstützig sigs materiell oder finanziell.

 

Und ganz zum Schluss wellti mine letschtusch und unverzichtbar Dank an z’OK va dem Fäscht richtu. Alle vora där OK-Präsi där Roaul. Du hesch das Präsidium ubärnu ohni mit där Wimpra z’zucku und hunderti va Stunde ine letschtu andärhalb Jahr ins güät glingu vam Fäscht investiärt. Raoul äs het schich glohnt. Diär Joni, schlicht und eifach danke vär dini Manneskraft. Där Chef Infrastruktur isch diär uf du Lieb gschniedrut. Pausenlos bisch därhinnär gsi. Mit jentschte Maschine oder mit reiner Muskelchraft. Du hesch nu de gschafft we wiär alli andru nimme hei mägu. Merci, merci, merci. Diär Luki vär alli dinu Inputs und das wiär diär eifach alls wawär grad sälber kei Zit hei ka hei chännu abschiäbu. Und vär z'unvfriewillig Hotelzimmär am Samstag. Du bisch där heimlich Siegär vam OK und d’Stützi va isch alle gsi. Und natirlich ischär Madame la Presidente und Chef Finanze im Fäscht. Carole, schlicht und eifach die Beschti. Du bisch immär mim Zeigefingär ubär dum Kassabüächji gschwäbt, hesch greklamiärt wenns het sellu si und la machu, wenns gluffu isch. Hesch gizellt, Tatz khaltu und bisch einum immär ubär d’Schultra gfahru wemu gad äs Teif het ka. Äs riesu Merci geit an dich, vär das 48 Stund lang als einzigi va isch bisch tropfniächtär gibliebu, so das z’Hirni immär fit isch vär Gäld z’zellu. Ah ja, da chunt mär doch zi, wasi che nit will vorenthalt, Carole, das müäss jetz eifach si.

 

Äs isch nämlich äso. Wan ich de am Sunntag ämabu nam grossu Üfrümu am Füfi bi heimgangu isch z’Fäscht wiä scho ärwähnt nur värmeintlich fertig gsi. Wenn ich de nämlich nur knapp zwei Stunde spetär numal uf z’Gländ bi cho ischmär ischi Madame la President äntgägu cho imene Züästand wani mi vor Lache eifach nimme ha mägu haJ Carole du hesch 48 Stunde Alkoholentzug in nur zwei Stund nahgholt, ich glöibu das isch absolute Wältrekort. Ich wirdu das mal dum Guinessbüäch vär än Itrag vorschla. Das soll där zersch mal eine nahmachu. Abär äs sige där gigönt. Ich sägu nur so viel B52 Shots in rauen Mengen, öi wenn där Ehema där scha angäblich iglescht het, wirkend Wunder. Du hesch dis Fäscht am Fäscht de äbu doch öi nu ka. Ich hoffu du heisch unnär dinär Barbapapadechi än schöne ärholsame, ohni Fäschtsorge giplagte Schlaf gfundu. Jetz is värbi und wiär chänne richtig Stolz uf isch si. 

 

Damit hat’s sich. Äs merci alle wani hoffuntli nit värgässu ha und jedum einzelnu Porretschchnätschär. Jetz freuii mi uf d’Räschtfasnacht mit där beschtu Guggumüsig was git. De Porretschchnätschär. 

 

Äs fägt öi namene viärtil Jahrhunder immär nu, ewe Webmaster.

 

Bern, 21. Jännär 2015

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

 Krach am Bärg z Üssärbärg

 

Ab ine nöii Saison. Wa geit das bessär als bim Stefanus inär Chällärie. Zum Üftakt va der Jubliäumssaison het är nämli die Porretschchnätschärinne und die Porretschchnätschär zum Apèro ärwartet. Wiär hei isch natirli öi güät miässu sterchu, bevor wär du langi Wäg äbrüf uf Üssärbärg uf isch näme.

 

Hetti wär de scho gwisst, dass ischi Madame la Presidente vär wahrschienlich zerscht und einzig Mal die allärerschtusch Üftrittszit vam Abu ziäht, de hetti wär värmüätli z'letschtusch Fläschi unnärwägs nit nu üfgmacht. Siwär doch de ziemlich knapp dra gsi, vär ische Bühnuüftritt am halbi nini. Äs het de abär doch nu glängt, dass där Musikus öi nu äs Häppli vam immär feinu Präsiapèro värwitscht het, bevor das scho gheissu het, „Strumänti sattlu und ab Richtig Bühna“. Und dem Üfrüäf sind de öi alli nahcho. Nur z’Sämy het du Wäg va Adelbodu här zu knapp berächnut, odär het z'Vogelliesi ersch z'spaat gfundu. Uf alli Fäll hets, wenn mit isch där Pfiff zum Rhytmusigang gigangu isch, bi ihm gheissu, negschte Halt Üssärbärg. Ja nu immärhi hets no spitz glängt, dasär schinu Guggumüsigkollegu va witum ämal het chännu alose.

 

Där Räscht va där Manschaft het als allärerschti Guggumüsig an dem Abu därfu die Gäst befreudigu.  Und das hei wär de öi tatsächlich gmacht. Mim Wälschu hei wär zersch mal d’Hitta zum Chochu gibrungu, bevor das där Stefanus äs härzzerriessunds (will so schöns) Solo im Ständer dargibotu het, dass d’Halla mim Applaus nur so gibäbt het. Einfach Sensationell. Abär darmit nu nit fertig. Blues chunt ja immär a und nachär stüünundi Gsichtär, wenn d’Musikär uf där Bühna mitm Värbotnu plötzlich sindgend. Där Voulez-vous het das ganz musikalisch Bouqet de nu grad abgrundut und de weri eiguntli scho güät gsi. Där Musikus het sus abär nu gad wellu wissu und mim Schlüpfer nu eine obina druf gsetzt. Züägigä, der hetti wär chännu la bliebu, vor allum wemu halt dum Rhythmus, wiä nachär isch üssacho, die Planändrige nit mitteilt (excüse Diegi). Nichtdestotrozt hei wär mim Rammlär nu än solide Abgang ka und z’ganza wiä immär mit z’Raoulisch Ziggizäggi im Strumäntudepot abgschlossu. Der genau halbstundig Üftritt, va miär üs gseh wunderprächtig gsi, witär so. Will jetzt geits ja de bis im Februar jedes Weekend ab dri.

Wobi, mu hetti chännu meinu die kommundi strängi aber immer schöni Fasnachtszit sige de Porretschchnätschär nätt gli. Als würdi moru die Prohibition inär Schwiz igfiährt wärdu het schich ä ei und jede va isch im Aschluss anu Üftritt praktisch an irgend ei Bar dragfesslut und Gas gigä. Und nach dum Motto „Was obina i, müäss unnena wieder üs“ (was schlussändlich de öi gad zu minum Fotofavorit vam Abu gfiährt het), isch der Krach am Bärg wiedär viel z schnäll z Änd gsi.

Einum ärwähnunswärtu Intermezzo wellit an dischär Stell aber öi nu mine Tribut zollu. D’Chnätschär sind begeistrut gsi, va där absolut glungnu Co-Produktion vo de Judäarämplär und de Wäschgärra. So müäss Guggumüsig. Zwei Daumen nach oben!!

 

Wiä gseit, viel z schnäll ist värbi gangu. Än Barwägsil hiä und än Blasuärliächtrigsgang da und scho hensch z’ersch Mal z Halluliächt ämprännt. Wasch nisch de am viäri ämorgu tatsächlich wiä d Chiä im Chromo üs där Halla, ja mu cha säge üsgfergut hent, stelli doch fescht, dass üsser de igfleischtu Üssärbärgär praktisch nur nu blaui Chnätschärra sind awäsund gsi (Blau meini wägu där Kostümfarb).

 

Gigä als obs keis Moru gebi hent d Chnäschärra scho am erschtu Alass va der Saison gizeigt, wer dasch sind. Ä super Värei mit coole Lit, wa ä jede weiss wiä z Fäschtu an Guggumüsigfäschti geit. Abär das isch ja öi keis wunder bi 25 jähriger Erfahrig. Ich freuu mi uf z negsch Wuchunänd, wa ischi Guggumüsig sälber wieder mal darf Gastgäber si und hoffu uf Gäscht wa so sind wiä wiär. Gmägig und Langläbig J

 

Bis de in alter Frische, där Master.

Sängärma, 11. Jännär 2015

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

 

Mit Trompeten und Pauken ab ins Chaos

Was isch das wiedär fär än närrischi Zit gsi in der Fasnachtswucha. Ei Üftritt jagt du andre und alli Chnätschära sind vorna dabei. Alli Chnätschär? Na ja, am Donnstag Namittag zum Beginn va der intensivu Fasnachtswucha hets nu ä biz dürftig üsgseh. Und ischi Madame la Presidente het scho d Fasnachtszit gseh Bachabgah. Abär die tapferu Seele wa öi am Donnstag Namittag am Chinderumzug sind da gsi hent alls gigä, dum iheimischu Publikum izheizu, so das bim eintu odär andru scho wiedär Blüät gspritzt het. Züäfärsichtlich, dass de ämabu am buntu Abu meh Chnätschära därbi sind hei wär alls gigä und so öi fasch jedes Liäd wa wär im Repertoir hei ka gspielt. Und siehe da, där Hilferüäf in Form va lütum Guggumüsigrambazamba het gwirkt. Hent schich doch vär du Bunt Abu sogar nu 3 ehemaligi Mitgliedär igfundu und isch uf där Bühna unnärstützt. So het vär eis mal nit d Janine und die Carole z Solo vam Leila präsentiärt, nei z Gassi und z Volki hent ihrusch Können unnär Bewies gstellt und gizeigt, dass öi nach jahrelanger Abwäsuheit die Guggumüsigstickär nit chännent värgässu ga. Än absolut fantastische Abu mit viel Unnärhaltig öi näbs de Porretschchnätschär, ärere Bar, wa zwar nit wirklich het zum Löifu wellu cho, abär sus so de Porretschchnätschär ärlöibt het immär schnäll an irusch Biär z cho. Naht is nah het schich de abär öi där diesjährig feist Donnstag dum Ändi züägneigt. D’Chnätschära haltut das abär nit üf. Im Gäguteil, gflüchtut sinsch, in die dunkelschti Egga vam Derfji, so dasch im Jugi nu bis ämorgu früäh, wa scho fasch d Sunna isch üfgigang nu hent chännu witärfäschtu.

Där Fritag hetti de eiguntlich als Ärholigstag sellu fungiäru. Abär nix da, praktisch die ganz Guggumüsig het mu im Gätsch z Brig chännu findu, wa schi öi an dem Tag där Fasnacht d Ehr ärwiesu hent. Zum Teil äso güät, dasch wiedär keis Heim ga hent ka. So isch mär z Ohre cho, dass z Twistersämy ämorgu im achti nu am Tanzu isch gsi. Und öi z Carini, susch doch immär so seriös, het du Schwanz und irusch Flöta vorna gitreit (Das soll de nit zweiditig si) und wohl äs bitzji länger zum Ärniächtru gibrücht. Nur die Zibylle, die het du ganz Trubel vär eppis güäts gnuzt und wohl währund där ganzu Fasnachtswucha ständig alli Lit mit irusch Gönnerbüächji gnärvt, so das schi das als erschti dum OK volls het chännu zrug bringu. Nit gsichtug am Gätsch het mu übrigens z Präsidäntupaar öi das soll ärwähnt si. Abär lüt güät unnärrichtute Quelle hent die anstatt z fäschtu Liäbär irusch Humus gsüächt wa uf mysteriösi Art und Wies zum värschwindu isch cho (Und nei ich redu hiä nit in Rätsel). Und nit z värgässu und das isch ja scho fasch än Sensationsmäldig, öi z Ziggizäggiraouli het schich das Jahr nit am Gätsch la blicku. Der tüät schich jetz liäber langsam z Üssärbärg bi de Grossmüüler ichöifu. Die passundi Värchleidig hedär ämil ka:-)

 

So is also de schnäll ämal Samstag wordu und die värsprochuni Ärholig lat witärhin uf schich la warte. Het isch doch där heilig Alain scho am halbi siebni wiedär abgholt Richtig Baltschieder zu de Balianos. An das Fäscht geh wär ja in erster Linia wägu de güätu Älplermaggarone. Das chännti mu z mindest anäh, will z Balianos isch appa z einzig Fäscht gsi das Jahr wa die ganz Guggumüsig unisono ärschienu isch. Was so äs güäts Ässu alls cha üsmachu. Nur gad z Bäbseli het sälbschvärständlich liäber deheimu z Schwangerschaftsbüchji gstrichlut und därbi sichär an d negsch Fasnacht gideicht, wasch de wiedär cha därbi si. Und där Tschaggini het du wäg uf Baltschieder dummerwies nit gfundu. Abär das Kaff isch ja öi äso dermassu ab vam Schuss ;-) Alli andru hent susch schich nit la näh, näbu ämene Schnapsbrätt odär öi zwei än hüärre güäte letschte Bühnuüftritt uf z Parkett z leggu. Gschränzt heiges, isch mär nachär agitreit wordu. Und die Üssag hani in der Fasnachtssaison ärfreulichärwies fasch an jedum Üftritt kehrt. Das heidär güät gmacht Chnätschär. So hei wär nisch de ämorgu im dri schweren Herzens va de Fasnachtspartys fär das Jahr värabschiedut, isch doch z Balianos öi das Jahr ische letscht offiziell Üftritt vor dum Fasnachtsabschluss gsi.

Nachume meh odär wenigär ärholsamu Sunntag hani de scho gmeint, d Chnätschär värsammle schi im Mentag de alli wiedär unnina z Turtma. Abär da hani wohl nit mit de doch scho ziemlich lediärtu Körpera und Psyche va de Chnätschära grächnut. Nur gad z Joni und där Väli hent nu gnüäg Chräft chännu üfbringu, um öi in Turtma numal Gas z gä. Und zwar äso fescht, dasmu z Joni de ersch am Zischtag z Mittag het gseh heim ga. Ah und nit z värgässu isch hiä ischi Madame la Presidente. Öi di het irusch Humus wahrschienlich in där Zwischuzit wiedär gfundu und dum heiligu Antonius, Schutzpatron va de värlornu Sache, äs Opfer gibrungu und schich zämu mit de Sanpanchos z Turtma uf där Bühna gizegt. Was vär äs grossus Opfer, obwohl, und das weisi öi nur vam Hörensagen, hets ra bi de Sanpanchos anschienund ziemlich Gspass gmacht. Ob äch schi scho jetz d Stäger Luft värmissu tüät?

Hä nu, äs isch de uf alli Fäll viel z schnäll Gigelizischtag wordu. Tag des Grauens und Nacht der zerstörten Träume. Hei wär doch nämlich öi das Jahr miässu feststellu das d Fasnacht halt doch irgendwenn z Änd geit. Abär d Chnätschär mächent aus der Not eine Tugend und hent numal richtig Gas gigä. Schliässlich will mu die schönsti va alle Jahreszite üsgiebig und Lüt zu Grabe tragen. Där Abschlussabu z Sängis wiä immär äs grossus Highlight. Zämu hocke bi chalter Platta und Biär, numal alls mitenand bi schallundum Glächtär la Revue passiäru, das isch eifach unbezahlbar. So hei wär im siebni d letschtu Stunde va där diesjährigu Fasnacht in Agriff gnu. Bevor das de fierlich numal mit schallunde Posaune und Trompete und chlepfige Pauke rund um z Dorf isch gigangu, het där Musikus zersch nu zeremoniel schiene Hüät gnu und z Zepter in Form va där Musikuspfiffa an du neui dessigniärt Musikus du Sebo ubärgäh. Mit mulmige Gfühl hedär z Pfiffi ubärnu und scho bim erschtu Liäd falsch igizellt. Abär was nicht ist kann ja noch werden. Züägigä, än Stefanusprime z ärsetzu isch ein Ding der Unmöglichkeit, där heilig Grahl z findu we värmüätlich eifachär. Abär mit dem igspieltu Team wawär mittlärwil sie glöibi isch äs z schaffu, daswär öi z negsch Jahr im Jubiläumsjahr mitenand und mit viel Pfüss und güäte Melodie chänne ische Giburtstag fiiru. Dum Stefanus sige an dischär Stell härzlich vär schis Jahrelang Engagement gidankt. Müsig isch schis Ding. Das hei wär alli an jedum Üfrtitt und öi bi jeder Iäbig gmärkt. Unnär schine strängu Fitticha sind neue Stickär wiä där Schlüpfer odär där Värbotne äntstandu, wa scho jetzt als Evergreens in d’Anaale va de Porretschchnätschär sind igigangu. Abär öi die eltru Stickär het är niä värgässu und isch jedes Jahr va neuum die heiklu Stelle bigibrungu. Unvärgässlich die Momänti wan är va Crescendo und Sec värzellt het und ersch de märkt, dasär än Hüfo Guggumüsikär vor schich het, wa nit gad unbedingt jede Fachüsdruck va där Müsigwält kännent. Steffi wiär värneige isch alli vor diär, so wiänt sus du immär und immär wiedär vär isch gmacht hesch. Nach jedum Konzärt hesch immär zersch die güätu Momänti üfgizellt bevor das ab und züä, wenn öi wirklich sehr sältu bisch kritisch wordu. Stefan -  güäte Üftritt gsi. Danke.

Abär isch schweifu zum Schluss va minär Fasnachtsbrichtärstattig widär mal ab. Wiär si ja nu gar nit bis Mitternacht cho. Där neu Musikus het somit an dem Fasnachtsabschluss än Neubeginn gwagt und d Feuertaufe ärläbt indem dass är die Guggumüsig het därfu um z Dorf fiärhu und därzüä lüäge, daswär de rächtzitig zum Üsspielu wiedär bim Lokal si. Z Leiggi Eli und z Uli hent nu spontan än Apèro serviärt und irusch Alkoholreserve gad an die Guggumüsig abgiträttu. Darfär äs ganz äs liäbs Merci und öi di Köpfli Ingrid isch so nobil gsi und het nisch nu äs Biärli mit uf du Wäg gigä. So siwär de schlussändlich scho fasch knapp bi Zite gsi, hei wär doch vor dum Germanusbrunno nu där letschtusch gross Üftritt wellu darleggu. Mit där Schlampa dum Twist, achtund jetz chunts, dum Surfer (Premiere an der Fasnacht) und dum Rammlär hei wär z Dorfzentrum numal so richtig ärschüttrut und die dunkli nahundi Faschtuzit numal churz zruggidrängt. Äs letschtz Üfbliähu va där Fasnachtszit hei wär de nu mit värtüschte Instrumänt probiärt, bevor das där Zeigär scho uf füfi vor Zwelfi gstandu isch. Alli mime Biär vor schich, hei wär nisch mit lachunde und flännunde Öigu aglüägt. Numal d Lippe gnätzt und där beschtusch Asatz üssagsüächt. Teif ischnüfu…. Instrumänt in d Luft ….......... D Note värinnerlicht …........... än Blick Richtig Musikus und….............. T N T!!!!! .........…… Und eh mu schich värsieht isch d Fasnacht scho värbi. 

Wer de nu äs bitzji länger isch gibliebu het scha nu chännu gseh, - ganz värsteckt - und fasch unschienbar, die schönstu und sältuschtu Träne was git. Äs sind die wa schich irgendwo im Därzwischu va Freid und Leid värsteckend. Wa schich nur zeigent bi höchstum Glücksgfühl gipaar mit äs bitzji Värdruss. Äbu di want nit chasch kontrolliäru, äbu die wa die eifach so ubärchäment. Ja wer hettis gideicht, die Träne sind ischär Peeeeeeeep gsi ;-) Im Namu va där ganzu Guggumüsig danku ich diär und dum ganzu Vorstand vär än wunderbari Fasnacht. Ups jetz hani apa doch zwischu de Ziele värratu wellum das eis zwei Freuduträne ubär d’Öigu gikullrut sind :-)

Tja somit fehlt nur nu eppis. Z’ hert Chäru Foto. Dasda hiä isch abär nur där zweithertuscht Chäru an dem Abu gsi.

 

Där hertuscht Chäru, där alt und där nöi Musikus hent nu bis in die friähu Morgustunde mägu machu. Där alt Musikus het du Nöie öi gad so richtig gitöift. Nämlich mit sooo viel Alkohol, das äs zu Tode ärschrockus Leigginär Eli ämorgu im 6i, wenn gfühlti 15 Weckera uf z Sebosch Natel afent litu und der schich trotzdem nit regt, nur nu cha du Chopf schittlu und appa froh isch, das d Fasnacht äs Änd het. Abär ich sägu ja immär, gäbet mär kei herti Droge.  Demäntsprächung sind die Fotos va dem hertu Chärzu iner Zensur vam Webmaster värschwundu. 

Abär ich glöibu, das Jahr cha schich jedi Chnätschäri und jede Chnätschär äs bizji zum hertu Chäru zellu und drum welti che hiä där hert Chäro va där Oberwalliser Fasnacht presentiäru.

 

Liäbi Chnäschärinne und liäbi Chnätschära, zum Schluss ganz simpel und eifach

Merci tüüüüsig und jedum va ew än dicke, fette Munz (ganz ohni Charta därzwischu :-))

Und warum……

Bis imene Jahr, ewe Webmaster.

Z'letscht Mal Solothurn, 06. März 2014

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Fasnacht im Doppelpack

Wenn die Zit va einum Biär zum negschtu nit längt um du Kater üszkuriäru, obwohl das än ganze Tag isch värbi gangu, wenn eis Apèro nur där Üftakt zum negschtu isch, wenn am Mentag druf nu immär Räschtalkohol d Händ mim Schaffu laht la zittru, ja wenn sogar z Raouli, „der Penner“ schich ämal än Üszit müäss näh, de isch z Weekend zum Stäg und a Leigg. Zwei Fäschti an einum Wuchunänd, züägigä, mit züänähmundum Eltär länger je schwerer z ärträgu. Abär där Porretschchnätschär und die Porretschchnätschärin steit ubär körperlichum Schmärz und Ubärmiädigsärschienige und laht sus schich öi bi solche Läbundswidrigu Umständ nit la nä zwei hammär Fasnachtsfäschti z fieru. 

So hei wär nisch am Fritag scho früh ämabu zum Stäg bigä, vär ische Guggumüsigkollegu va de Sampanchos d Ehr zärwiesu. Und die Porretschchnätschär ihreszeichu ja än interkommunali Väreinigung het natirli öi zum Stäg z einti odär andäri Mitglied, was bedietut, das z Fäscht nit ersch ufum Fäschtgländ, sondern bereits nu vor dum Umzug mitume Apèro bim Pädy und där Mela startut. Ew zwei vär Spiess und Trank äs härzlichs värgällts Gott. Öi das Jahr heid iär därfir gsorgt. Daswär bereits bim Umzug kei trochuni Kehla värchume. Der isch de nämlich vär isch am achti Ämabu losgangu durch z Dorf fa Stäg, abwägliswis mit där Schlampa und dum Tiger, bevor daswär, wiä chänntis öi annärsch si, im Präsidäntupalast, noch dum Fäschtgländ, än Audiänz hei gwährt värcho vam Präsidäntupaar. Will öi d’Madame la Presidente und irusch Gemahl hent sus schich nit la nä, die Tori zu irusch Rich de Porretschchnätschär z öffnu und äs Apèro zum Zweiten üszscheichu, danke öi ew. So hets de scho vor dum eiguntlichu Fäscht ä schuppu Flüssigs in ische Värdauuigstrakt gschafft und, so isch mär z mindest z’Ohre cho, het z eint odär anär Mitglied öi nu amene andru Projekt gschafft, wasch susch nit so versiärt sind därbi, abär das leh wär mal dahingestellt. Ich vär mine Teil hamär mal wiedär nix la z Schuldu cho, und wer jetz eppis annärs bhöiptut, het glogu. Hetti wär zu dem Zitpunkt allerdings scho gwisst, dass im Fäschtzält ja sowieso scho nix meh z Ässu git, wiär weri nu ä stuck längär bim Präsidäntupaar gebliebu.

Abär spetestens am viärtil ab elfi isch öi där letschtusch Chnätschär ufum Fäschgländ igluffu oder igitorklut, isch doch am zwänzg vor zwelfi ische Bühnuüftritt ufum Programm gstandu. Ja und nach mittlärwil viele Bühnuüftritta und z’Schwitzu unnär de Schiiwärfär scho gigwohnti hets ja miässu cho wiäs isch cho, wiär hei nämlich, so glöibi darfi ohni z leigu säge, än super Üftritt uf z Parkett gleit. Än ganzi halb Stund hei wär z Publikum mit ische Kläng unnärhaltu und därfir gsorgt, das öi schi mit Mitsingu vam Värbotnu üs der Hüt gehnt oder z’einti odär andri Fiirzig bim Leila zückend. Nach äme sotigu Üftritt laht natirli z Ziggizäggi nit lang uf schich la warte und z negschtusch Biär, Wodka odär Shot scho gar nit. Das därfti darum öi där Grund gsi si, warum wär vär eis mal ische heilig Alain ä biz im Stich glah hei, siwär doch tatsächlich und ich bi ab miär sälbär ästünt, alli viel z’spaat bim Bus gstandu. Ja güät, d'Scha9 het anschienund ohni z wellu anär falschu Stell du Bus gsüächt, was schi abär nit so ubärzügund als Üsred het chännu ubärbringu. Där Alain, wiä immär die Güte in Person het das värspetut Itrudlu abär mit där gwohntu Glassuheit uf schich gnu, ischär doch das mittlärwil mit ischum Hüfo afa gigwohnte. So hei wär de ihm zu Ehren der 14tuscht vam Februar gad umbinänd und das hochoffiziell uf Dekret vam Herr Vizepräsident und präsidials Sprachrohr, so das der Tag va jetzt a nur nu där Alaintinstag wird si. Än ärfolgriche Abu also. Där einzig ärschreckund Momänt isch gsi, wamär im Bett isch zi cho, dasi z hert Chäro Foto värgässu ha. Wohl üs dem Grund willi mit absoluter Konzentration värsüächt ha die ca. 7 Trompete wamär komischärwies sind avertraut wordu imene nit ganz niächtru Züästand ohni d’chleinstusch Tugga heimzträgu. Oder vielliecht doch ehnär die mit sältsame Gfühl värbundundi Feststellig, dass schich där Musikus scho wiedär äs Leiggi, abär dasmal gottlos z falscha, üsgsüächt het zum ihm schini ganz Liäbi zuteil la zcho. Gottlob hets abär vär eis mal än andre herte Chäro ka. D Stägerfraktion het schich das nit la näh, öi schich ämal hiä im Blogg bildlich la z’värewigu. 

 

De meistu vo isch, im Speziellu dene wo irusch Suchtjini am Fritag mal wiedä nit im Griff hent ka, is de värmüätlich viel z schnäll gangu und scho hent schi wieder im Car miässu, ääääch ich mein därfu hocke Richtig Mittelwallis uf Leigg, wa isch scho d Schnägge sehnsüchtig ärwahrtut hent, vär mit ihne irusch Fäschtji z fiiru. Ischi Madame la Presidente, präzis und pünktlich wiän äs schwizär Ührwärch het nisch genau zu der Zit la itruddlu wewär gad anu Start vam Umzug hei chännu ga, kei Minüte friächär odär spetär. Doch ehär äs heikils Unnärfangu, so knappi Zitberächnit, hei wärs doch där Räscht va isch Mitgliedär mit där Pünkltlichkeit ehnär wiä än zwänzgjehrige italienische Cisalpino im bestreicktu Bahnhof va Domo. Ärstünlichärwies hets abär glängt und so het z Umzugspublikum öi z Leigg ischu Kläng z kehru värcho. 

D’Instrumänt hei wär nachär gad gar nit ersch värsorget, hei wär doch bereits am viärtil vor nini uf där Zältbühna därfu üfträttu. So wirds gägu Schluss va där Fasnacht doch nu eppis mit värnünftige Üftrittszite. Das chunt wohl därfa, dass die Präsidäntin nimme darf ga losu. Alli nu voll bei Sinnen, einzig mit einige Nachwehe vam vodrigu Abu, hei wär nisch also früäh chännu uf di Bühna bigä und demäntsprächund isch öi där Üftritt gsi. Solide, lang und Klanintensiv. Sogar z Solo vam Leila, notabene vär eis Mal nit am Schluss gspielt het klappt wie am Schnürchen. Z Insistiäru va de Solistu bim Musikus het also Wirkig gizeigt. Nach dem intensivu, abär schönu Üftritt sind de bi de allärmeistu zersch ämal d’Läbuns- und Fäschtgeister üsghüchti gsi. ... Z Biär he meh als nur ei Chnochu ka und öi d’Shots hent du wäg Richtig Kehle nit wirlich wellu findu. Träge und mit Blei ane Fiäss hei wär nisch an d Stehtischjini gstämmt und där Zit irusch langsami Löif gla, hin und wiedär wohl mit dum Gidanku, dass hoffuntli bald dri isch odär mitume belehrundu Vorsatz an schich sälbscht, z negsch mal doch gschiedär äs Coca z bstellu am Fritag ämabu wemu am Nahtag wiedär inu Üsgang müäss, ääääch ich meinu doch darf. Abär das Teif het gottseidank nit lang aghaltu. Die Grosswättärlag isch immär nu uf äs fäschtlichs Hoch igstellt gsi, nit z letscht will ischärs Joni nah de zwelfe där Pension widär äs Jahr nechär grickt isch. Das het natirli wellu gfierut wärdu und so isch die Zit mit Glückwinsch, tanzu und astossu de doch z mal wiedär viel z schnäll värbi gangu. Nur einum isch das ganz Brimborium am Arsch värbi gangu. „Der Penner“ het schich in schis Eggji zruggizogu und het in schine Treim wohl scho im Bus richtig heim gsässu, bevor dasnu de äs paar ganz tapferi Zitgnossu, güät värsteckt wiänär isch gsi, gsüächt und wiedär üs dum Schlaraffuland gholt hent, so das öi är vor där Heimfahrt doch nu z eint odär annär Biärli het la zischu. Tja, so chas äbu ga an dem mörderischu Doppelüftrittsweekend, irgendwenn git halt öi där bescht g'eicht Fäschtkörper du Geist üf oder chunnt zumindest churz inz Stottru. So siwär Schlussamänd de wohl doch alli froh gsi, ei Tag nach dum Alaintinstag du Alain wiedär hinnär dum Stirrad z gseh, im Wissu das jetz heim geid und wiär isch moru gitroscht bi schlächtum Wätter in Sälbschmittleid chänne suhlu. Abär öi im Wissu, dass spetestens am Sunntag ämabu odär allärspetestens, bi de ganz fescht agschlaggnu, am Mentag z Mittag öi där letschtusch Chnätschär schich scho wiedär uf du negschtusch Üftritt va der Fasnacht freut.

Nur, und dass soll öi ärwähnt si, z’Giburtstagschind isch dasmal appa där letschte gsi, wa nu wiä va där Fäschtlüüs gibissu nit het heim wellu, was ufär eint Sita sichär dara liegt, dasär äbu Giburtstag het ka ufär andru abär sichär öi, dasär ä zweilitär Wiifläscha ine Arma wiän äs Mämmi gwiägut het. Ob die tatsächlich nu leer isch wordu, värmag hittu niämär meh z säge. Lüt dum Hert Chäru Foto va dem Tag laht schich ablär la ärahnu dass alli so ziemlich ufum Nuggi sind gsi ämorgu früäh und z Joni die Fläscha appa irusch eigund Schicksal ubärlah het.

 

So bliebt mär am Schluss nur nu z säge, das där Mitscho anschienund nit cha i- odär üsparkiäru. Dass sellti glöib ziemlich witzig si, abär ich ha leidär du Zämuhang värgässu, vielliecht klehredär mi ja de z negsch mal numal üf. 

Uf än ärholsami Wucha, und Joni, trich üs!!!

Ewe Webmaster

Soledurn, zwei Täg nach dum strängstu Weekend.

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Jesses, wiär chänne ja güät spielu we wär NIT glaffni si…

So - beinahe Halbzit inär Intensivfasnachtszit. Grund gnüäg vär ische Musikus, schinu Mitgliedär zumene Apéro vor dum Üftritt izladu. Zwar nit unbedingt um schine supär Musikantu d’Ehr z’ärwiesu, sondern vielmeh um z’letschti Guggumüsigweekend la revue passiäru, wa ihm anschienund nimme bis ins Detail bekannt isch gsi. Natirli hets abär bim värzellu öi eis odär z annär Biärli und äs Schmunzlu hiä und da vam Musikus gigä, bevor wär nisch de gemeinsam, das heisst z mindest d Sängärmanerfraktion richtig Raro begä hei, an die tradionell Mesireccas-Night.

Scho unnärwägs hei wär ärfreulichärwies tärfu feststellu, daswär öi hittu wiedär tatchräftigi Unnärstützig vo ehemalige Mitgliedär värchäme, het schich doch där Serge öi in äs griäs Kostüm gizwängt, schini Guggumüsigposüna abgstöipt und schich wiä ahnu dazumal in d’letschtusch Umzugreiha igreiht. Darfär isch mu z Posünuregistär öi unändlich dankbar gsi, het är doch d’Azahl va dem Registär gad fasch, z’mindest vam Pfüüs här värdopplut. Und das isch öi wichtig gsi, vor allum nahdem wa z Sebi, dischi Saison ja bereits wohl bekannt vär värletzigsbedingti Üsfäll, scho wiedär unfallbedingt ä churze Üssetzär uf z Parkett gleit het. So het mu tatsächlich nu währund dum Umzug d Madame la Presidente ä Fiiri uf d Schnurra la cho, was än Flüät an Blüät durch z Mundstück bedietut het und näbu dum Pfüüs öi där Zug blockiärt isch gsi. Das alles het abär nix därmit z’tüä, dass ischi Presidäntin dum Väreinsbloggär will z Müül värbiätu und Zenzur ifiähru, nei das Thma isch ersch spetär an dem Abu zär Sprach cho. Und wer jetz nur will säge, da het appa eine än dicki Lippa riskiärt, der het du gschockt Gsichtsüsdruck va där Präsidäntin nach dem Malheur nit gseh, wa där Sebi mit blüätvärschmiertum Gsicht probiärt het, witär mitzspielu. Ja nu, shit happens. Nach dum Umzug het uf all Fäll d’Sanitäterin, schi het d Jacka nu nit abgizogu ka, ärstühnt miässu feststellu, dasch äso früäh, de doch nu niä Chuntschaft het ka. S bliebe ja abär wenigstens in där Familie, heigi doch gestär öi nummu z annär Leiggi, schines Zeichu darum hittu voll ubärzügt an de Chinelle (Mit settigum Elan hei wär nu in schine beschtu Paukuzite niä gseh) und nit an schinär gliäbtu Pauke, du Bsüäch bi de Sanitätär in Aspruch gnu. Mu chännti langsam fasch an beschus Karma bi de Leiggibrothers glöibu. 
 
Wie dem auch sei, nach där churzu Pfleg und ämene Blick in du Spiägil hets de gad nu glängt vär mimene Biär d’Lippa z chiälu. Vär eis mal und ich glöibu das isch di gross und einmalig Sensation in der Saison, hent di Porretschchnätchär tatsächlich än früähe Üftritt ka. Was d Madame la Pesidente darfär het miässu zahlu bliebt wohl irusch Gheimis, abär d Chnätschär sind tatsächlich scho am Nini uf där Bühna gstandu und hent där bereits güät gfillt Halla so richtig igheizt. Gibliebu isch va dem Üftritt d Freid, dass z Publikum bim Värbotnu tatchräftig mitgsungu het, än mittilschweri Sauerei und änd Blüätlacha uf där Bühna, wa an än Grossschlachtäri laht la ärinnru, än Speaker wa nisch doch gad füf Jahr jungär gmacht het und die scho fasch ärstühnti Feststellig vam Raouli vor schinum obligatu Ziggizäggi – „Jesses, wiär chänne ja güät spielu, we wär nit glaffni si“- So hei wär also ubärüs z friedu und nu praktisch niächtär ischu Instrumänti wiedär deponiärt im Wissu, jetz cha z fäschtu losgah. Und darfär het schi kei Chnätschär und öi kei Chnätschäri zweimal miässu la bittu. Ab dri isch di Devisa gsi und so siwär mit ganz, ganz viel Flüssignahrig und im Wissu, daswär nisch hittu ja kei Blamage meh miässe la gäh, ab dri in das Fäscht. So het di Nacht gigipflut in lustige Gspräch, in Tänz va de Porretschchnätschär, wa sogar ische Musikus, in der Sach susch ehär zrughaltund, du Lead ubärnu het und gizeigt, dass öi är nu weiss wiä Maccarena tanzu und öi där Mörderthe het nit därfu fehlu, obwohl daswär die Disziplin vor einum Jahr nu ä stuck bessär biherrscht hei. Abär ei Rückschlag darfs öi amene settigu Abu gäh. Wiär mälde nisch de wiedär wenn Après Ski, olympisch wird und trätte im Manschaftswettkampf anna. Zwischudri und das isch di eigentlich Nachricht und Disskusionspunkt beträffund Meinigsüssrigsfrieheit als Mänschurächt, het schich d Madame la Presidente vär än Zitlang üs dum Stöib gmacht, värmüätlich vär än churze Powerbreak izleggu, isch de abär äs bizji spetär wiedär zu irusch Mitglidär gstossu, va da a het mu abär nur nu Coca in irusch Bächär gseh. Wani de, in miner Funktion als scharfe Beobachter, gfregt ha wasch gsi isch, hetsch gmeint, schi säge mär jetz äbu nit dass schi peeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeee eeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeep* und ersch gar nit heige schi peeeeeeeeeeeeeeeeeeeeeeeeeeeeeeeeeeeeeeeeeeeee eeeeeeeeeeeeeeeeeeeeeeeeeppppppp* und ubärhöipt si ja das gar nit so schlimm will peeeeeeeeeeeeeeeeeeeeeeeeeeeeeepppp* ppppeeeeeeeeeeeeeeeeeeeeeeeeeeepppp* peeeeeeeeeeeeeeeeeeeppppp* und ich selle de übrigens ja nit uf d Idee cho das uf irgend än Art z väröffentlichu susch sorge de schi als Chef höchstpersönlich, dass die Zensur im Blog igfiährt wärde. Tja, soviel zu Meinigsüssärigfrieheit und Demokratie in ischum Värei, gäll Kim Jong Carol :-).

Viiel spetär, will ja kei Bus fahrt am Mesireccas, hei wär de gmärkt, dass sogar där heilig Buschauffeur Alain cha trichu und das viel z spaat isch, will üssär de Üssärschwitzär hent nur nu die Porretschchnätschär z Tanzbei gschwungu. De is de halt äbu värdammt früäh ämorgu wordu und ische Joni het sus schich uf kei Fall la näh, ämal wiedär Mitglied vam hertu Chäro z si, wani hiä darf präsentiäru.

 

Die Zit vam Heimgah laht schich somit öi nur nu asatzwies la nachvollziäh. Die Beck odär z mindest die Bachstuba het ämil scho offu ka und nach frische Gipfeli gschmäckt, wa öi die z letscht värbliebnu Chnätschära va de Securitas sind üs där Cubabar üsboxiärt wordu. Scho hei wär also gmeint, jetz hei der legendär Abu definitiv äs Änd, da hets im Restaurant Rilke nu än Liächtblick gigä. Där Raban hinnär där Theke het nisch doch tatsächlich in de friähu Morgustund nu uf äs letschts Biär igladu bevor, das wär du ubärüs schweri Wäg richtig Sängis hei in Agriff gnu. Spetestens zwei Meter nach dum erstu Stutzji het abär öi där tapfärstusch und züäfärsichtlichscht Chnätschär miässu igstah, das ämüf löifu hittu nimme driligt. Drum siwär mu öi vär in alli Ewigkeit dankbar, dum Imbodi Toni, hets nu d warum Stube deheimu värlah und nisch än wundärbare Privattaxidiänst zär Värfiägig gstellt.

Am elfi ab sägschi het z Peterli z’letschtusch SMS inu Chat gschriebu, so dass öi jede nu zu spetere Zite du Zapfustreich cha nahvollziäh, abär de isch dischehiä scho im Tröimland igikuschlut gsi umd nit z säge im Dellirium gliggut und ei Pauke wartet nu hittu z Raro dasch scha irusch Bsitzär äntlich chemi ga abholu, wennsch schich de einig sind, wer scha da het la liggu. 

So zeigt schich nach der Halbzit va där Intensivsaison, die Porretschchnätschär sind nach wiä vor gäng va de letschtu und nu gängär ine Fäschti, sältu bis niä d’Erschtu üf där Bühna abär z Fordrusch bim Abschluss for dum Instrumäntudepot, fascht niä wirklich schlächt, äbär je länger je friähär, desto bessär und lütär. Schi trichent öi das Jahr gäru und gäru viel, sind gsellig und jede gsellt schich gäru därzüä, gsehnt uf Fotos meistens scheisse üs und schiessent darum uf güäti Fotos (Das liegt abär öi ä biz am Chleid, lüt Üssag va där Fotografin), Lachent und das öi ganz oft ubär schich. Churz, kehrent öi im viäruzwänzigstu Väreinsjahr (Jawoll Rarnär, negsch Jahr 25, nit 20) unbestrittu zum Obärwallisär Fasnachtskulturgüät. 

So, isch öi das Guggumüsigweekend abgseh vanäre dicku Lippa und där Anahm va där Massuiwandrigsinitiativa sehr ärfreulich z Änd gangu und ich darf mich glücklich schätzu, mit dem Hüfo z negsch Weekend wiedär in Agriff z näh, wa wär gad an zwei Abunda z wundärbar Porretschfeeling chänne värbreitu zum Stäg und a Leigg.

Bis de,… die Lippe

* Anmerkungen der Redaktion: Zensuren und Streichungen wurden auf Verfügung und Geheiss des Vereinsdiktators Kim Jong Carol vorgenommen, zum Wohle des Vereins und Erhaltung der perfekten Gesellschaft. Heilig und ewig möge sie regieren. Hurra, Hurra, Hurra!!! Sie ist die Eine, der Höhepunkt der Schöpfung, Anfang Ende und dazwischen. So lieben und achten wir sie für immer und ewig. :-) (Gspass)

Soletta, 11. Februar 2014

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Die Rache der Schwiischwänz, oder... die dunkle Seite der Fasnacht

Tja, vär ische Blogitrag vam letschtu Fäscht in Eischoll, wa wär doch öi ganz churz d’ Eskarpade va de Schwiischwänz agiditut hei, hent nisch d’Unnärbächnär an ihrusch Fäscht so richtig la bliätu... Schi hent nisch viel früäh igladu, hent nisch viel z’viel z Trichu gigä, hent nisch ganz am Schluss uf där Bühna la spielu, obwohl, das müäss öi zum Teil ischum Musikus agrächnut wärdu, schi hent nisch nimme la ga bis ämorgu im 6i und plötzlich machts halt eifach Bummm - und mu ärwachet im Sunntag mit äre Schramma im Gischt, där eintu odär andru Quätschig und dum Wissu, dasmu värdammt numal halt nimme zwänzig isch. Abär soviel nur zu mine Ärfahrige an där 35 Jahr Jubiläumsparty va de Serenas z Unnärbäch.

Agfangu het das ganza doch wesentlich züävärsichtlichär, Afangsch Namittag im Bähnli va Raro uf Unnärbäch. Bereits im viäri hets gheissu atrabbu zum Warm up Umzug durch z Schwiischwanzdorf. Und so hent schich die Guggumüsige bi taghellum Liächt am Namittag z Unnärbäch igfundu und denu Fasnachtsabu mitume Lütu Umzug iglitu. Die Porretschchnätschär, ihruschzeichu öi scho bald äs viärtil Jahrundärt alti, hent du Namittag drum öi gad mit där altbekanntu Schlampa gstartut, bevor dass schi sofort im Fäschtzält, sehr noch anär Bar Stellig bezogu hent um än erschte Apéro iznäh. Hetti wär de scho gwisst, wiä lang das där Abu nu geid, hetti där eint odär andre wohl äs Coca odär äs Henniez bstellt. …Hmmm äs isch nisch blöderwies nit bewusst gsi und so het dische und jene scho mal zum erschtu Shot gigriffu, än fatale Fehlär, wiä schich zumene speteru Zitpunkt üssagstellt het.

Zum erschtu Höhepunkt ist de am 6i ämabu cho, wa schich alli Musikussas mitsamt Instrumänt uf där Bühna värsammlut hent, um d’Üftrittsreihufolg festzleggu. Zersch hent schi darfär de Jubilaaru miässu/därfu/sellu äs Giburtstagsständli darbringu. Weri d Üftrittsreihufolg nach dum musikalischu Könnu värteilt wordu, so hetti die Porretschchnätschär scho am siebni uf där Bühna gstandu, het doch där Musikus unnär de Musikussa, ische Steffanus uf där Bühna du Lead ubärnu und äs wundärbars Happy Birthday mit de andru Musikantu uf z Parkett gleit. Abär nei, die eigentlichi Challenge isch wiedärmal dadri glägu, än Drink mitumene Nummär z’ziäh, in einum Zug üszlaffu und d’Üftrittszit z'värchündu. Eiguntli än Härüsfordrig wa di Porretschchnätschär doch üsum Äffäff beherrschent, sellti mu meinu. Abär äs isch leider eiditig än Disziplin wa de Porretschchnätschär sit jeher ubärhöipt nit liegt. Obs da dra liegt, daswär ja eiguntlich im Mass triche (Achtung, hinnär dem Wort värbirgt schich än Wortwitz, nur so näbubi vär alli im Geiste bescheidenen Leser), oder dadra daswär niä lüäge was im Glas isch sondern eifach astitze, bliebt wohl uf ewigi Zite än unglösti X-Akte. Nur so viel sige gseit, öi an dischum Abu isch nisch z'Universum bi der Üfgab nit wohl gsinnt gsi. Hei wär bis vor churzum nu gmeint ischi Madame la Presidente mäche das äxtra mit de spaatu Üftritta, so hei wär an dischum Abu äntrüschtut miässu feststellu, dass öi där Musikus, eine va de ganz grossu in ischum Värei, im Loosu nit viel besser, um nit z’säge schlächtär, isch als d'Cheffin. Jä nu, is halt äso. Die Porretschchnätschär sinds ja mittlärwil gigwohnti Üftrittszite jensitz va Mittärnacht miässu z ärträgu, das ärstünt scho bald kei Chnätschär meh. Siwär halt di letschtu und wärde numal richtig d’Fäschthalla rocku hei wär zu dem Zitpunkt nu gideicht und du Frust mit Biär odär äbu dummärwies mit nu ämene Shot äbrigspiält, bevor wiär isch wiedär zum zweitu Umzug besammlut hei. Öi denu hei wär nu mit Bravour absolviärt, so daswär nisch ja nachär riähwig nu än Shot hei därfu gönnu, sisch  ja nu gnüäg Zit z Ärniächtru und ubärhöipt, z Ässu soll ja där Alkoholvärdauuig öi nu ziemlich förderlich si. Abär äs hent woll alli värgässu, dass ischi Läbra scho viel z lang du Titel vam Mitarbeiter des Monats treit, und so hei wär bis zum Üftritt ämal hiä, ämal da nu än Drink la ischechu, so daswär alli, zwar ubärmiätig freudig, abär mit mindere kognitive Fähigkeite im viärtil vor eis nisch richtig Instrumäntudepot üfgmacht hei. Im Schläpptau, wer hetti das nu gideicht, ische Ehemalige där Lando, wa doch nu am Tsischtag därvor, nach äme mittlärwil rekordvärdächtigu drittu Tag Nahtag, schich doch wiedär üfgrafft und igfundu het zum die Porretschchnätschär uf där Bühna z’unnärstützu. Än wahri göttlichi Üfärstehig und värdächtig noch ämene Itrag inär UNESCO-Weltkulturerbelista, ische Lando. Wiär heis uf all Fäll gschätzt, will die Unnärstützig isch bitternetig gsi. Scho där Üftakt, där Stand up laht im anonym züägsändutu Video im Nachhinein zwar äs Lache, abär de doch ziemlich eis vollär Scham uf ischu gschundunu Lippe la üfblitzu so dasi vam Räschtu vam Üftritt güät uf witäri Videos cha värzichtu. Gottlob ärwahrtut öi z Publikum zmitsch inär Nacht nimme grossi musikalischi Spring uf där Bühna. So hei wär das Pflichtprogramm, vam Publikum wohl mit zwei Öigu züägidrickt und Trostapplaus spändund coutiärt, ubär die Bühna gibrungu und nisch schnüärrstraks wiedär Richtig Instrumäntudepot bigä. 

Ichum Ziggizäggi Raoul het där Üftritt abär anschienund de sehr züägseit, het är schich doch vär schis Ziggizäggi äxtra in d’Hechi bigä und dadärbi än värletzti Hand riskiärt (nit die letschti Värletzig infolge unbirächubare Höhuvärhältnis vär denu Abu, wiä wär spetär festgstellt hei). Sigs drum, där Raoul het rächt, öi än vär eis mal bischeidune Üftritt värmag där Stimmig vam Abu kei Abbruch ztüä und Herr und Fröi Chnätschär het schich wiedär ins Fäscht bigä und witärgfäschtut. D'Schwiischwänz het alles dra gsetzt, daswär öi ja nit dehydriäre und nisch flüssigi Nahrig en masse igflösst, bevor das einzelni Chnätschär, wa nu bei Sinnen sind gsi du erscht Fahrstuhl nach unten Richtig heim hent gnu. Währunddem das där hert Chäru, hiä in schinär Vollbsetzig sowohl das Bähnli wiä öi z’negschta, dummärwies, schön schinum Schicksal ubärlah und stattdessu witär gitanzt het, dum Morgu äntgägu. So, zum Teil ziemlich leddiärt, hei wär nisch de als letschte Sauhüfo knapp bevor das scho di Putzequippa isch cho, öi Richtig heimwärts bigä. Dasi in dischum Blogitrag vär eis Mal nit detailliärt cha ubär d Eskarpade va einzelne Mitgliedär brichtu, liegt ganz eifach dadra, das ich mit miär sälber an dem Abu an gfühlte füf Fronte z kämpfu ha ka. Daswär nisch nu durch Sturmböe bigä hei, Passantu z Visp inär Beck schockiärt hei und unisono im Bus uf Sängärma igschlafu si, zeichnut somit äs letschz eiditigs, ischäreis abär nimme bewussts Bild va dem Abu. Wer jetz meint, än bischeidune Üftritt und Chopfweh am Nahtag, si Straf gnüäg daswär d'Schwiischwänz im letschtu Blog hei där d Schnurra gizogu het mich am Sunntag nit gseh :-) Bin ich froh, hei wär negsch Weekend ämal frii. 

 

Und d’Moral va der ganzu Gschicht, Bare und Zälti sind, trotz schlächte Vorbilder, definitiv nit zum Chlätru und Tanzu da, sondern ganz eifach, vär Gitränki darzstellu und gitroscht ab und züä äs Glasji druf z värgässu.

Ewe sehr, sehr, sehrsehr liedund Webmaster :-o

Solothurn, Zwei Täg nach dum Tag des lieber Vergessens

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Där Leila vär du Lando

Jetz het d Saiso abär wirlich agfangu. Nach äre äntspanntu Wiähnachtszit und äs paar rüähige Weekends, hent die Porretschchnätschär an dem Wuchunänd du Üftakt in än churzi abär ganz sichär intensivi Höiptfasnachtszit gstartut. Wa, obena z Eischoll bi de Spinnwahnis, wa nach langär Pause ändlich wiedär mal ihrusch Wahnsinnsnacht durchgfiärhrt hent. Z’ Motto isch de tatsächlich öi Programm gsi, abär feh wär doch am Afang a. 

Da steit z Sämy und schis Briädri, wa wiä immär um die Jahreszit sturmfriji Buda hent. Langsam abär sichär kristallisiärt schich da än Systemmatik va där Mamma Leigginär üssa. In ihrum Sinniäru währund de Apérovorbereitige, hent d Leiggibrothers än Ärlüchtig ka und hent üssagfundu dass Mamma und Pappa Leigginär wohl nur darum ubär d Fasnacht niä im Hüs sind, das irusch Chind nit im Fasnachtszüästand miässent ärträgu. Die schreckuhafti Ärkänntnis het natirli gad mitume Biär miässu wägspiält wärdu, bevor das d Apérovorbereitige witärgangu sind. Än Captain Morgans hetti natirli bessär gholfu denu Schock z värdauu, abär die Fläscha het z Ziel leidär niä ärreicht und het bereits ufum Parkplatz äs tragischus Ändi gfundu, wa där Sämy d Fläscha üs schinär Müllhalda, va ihm liäbevoll als Auto bizeichnut, het wellu nä. Där chalti Betonbodu isch där einzig gis, wa an dem Nahmittag ä Ladig Captain värcho het. Gottseidank sind die Brothers nit uf d Idee cho du Bodu abzläcku. Das abär sichär nummu, will d Oma Leigginär värmüätlich jedes Detail va irusch Stuba üs inspiziärt het. Sigs drum. Hei wär halt ohni Captain miässu vorgliähu. Uf all Fäll het z Sämy und schis Briädri die Guggumüsig in corpore zum Üfwermu zu schich heim igladu und tatsächlich isch öi där eint odär annär Chnätschär der Iladig gfolgt. Mit Biär, Cynar und Pouletflügeli hei wär nisch uf än saguhafte Abu bi ische Müsikärkollegu z Eischoll vorbereitut. 

Scho am halbi 6i het de där heilig Alain ufum Parkplatz uf isch gwartet um isch sichär näbume Reh und ämene Hirsch värbi ab ini Provinz uf Eischoll z fahru. Vär eis mal het d Madame la Presidente freudig chännu feststellu, dass där chlei Bus fasch nit glängt het. Sind doch beinahe alli Chnätschär där Üftrittsiladig gfolgt und nit nur das, züäsätzlich hei wär öi nu tatchräftigi Unnärstützig chännu ischär eigund nännu. Het schich doch sogar där Lando, the green cap, Leigginär, schinäszeichu ehemaligs Vollblüätmitglied und Spasstyrann üs friähere Zite, wiedärmal ines Kostüm gizwängt und isch mit schinum nach wiä vor passablu Trompetuspiel beglückt. Abär nit nur uf där Bühna het är gizeigt, das jensitz va 50 Lenze nu lang nit Rollatorfahru agset isch, obwohl dass ä so än Alte-Leute-Gehroll-Hilfe ine friähu Morgundstunde va dem Fäscht öi bi de jungu Porretschchnätschär vielliecht gar nit so unärwünscht weri gsi :-). Abär nit vär du Lando, der isch wacker nu uf zwei Bei gstandu währund dem dassus alli andru scho schwierigär ka hent, d Strass inär Mitti zträffu. Abär dadärzüä spetär meh. 

Nachume z’Nacht im Stil, wiäs halt bi Guggumüsigfäschti isch (jänu), hei wär de scho zum ertschtu Mal därfu z’Fäschtgländ besichtigu. Und da wellti doch äs grossus Komplimänt an d’Spinnwahnis machu. Nit nur dasch so vorüssehund sind gsi und vär die Glaffnu du Wäg zum Fäschtzält mitäre Liächtärgirlangda üsglüchtut und signalisiärt hent. Nei, vär eis mal isch das Fäscht äbu nit nur uf äs Zält bigränzt gsi, sondärn värschiedenschti Barlini hent zum Värwielu und trichu igladu. Da hets wirklich vär jede eppis ka, ganz grossartig. Jedi va dene Bare z inspiziäru het de värdammt viel Zit gibrücht. So isch nach ämene churzu Umzug darum di Zit bis zum Üftritt öi im Suff, ähhh ich meinu im Flug värgangu. Zersch mal uf d Ühr glüägt han ich, wani ischum Bongospielär am zwelfi, meh odär wenigär komplett schine Sinna äntschwundu inär Elektrobar äs Cocococoa spendiärt ha :-). Gottlob hani de deicht hei wär jetzde du Üftritt, will nu spetär weri wahrschiendlich vär die ganz Guggumüsig än fatali Katastropha wordu. 

Und an der Stell sige doch öi mal ischu liäbu Kollegu va de Schattubärga d’Schwiischwänz ärwähnt. Die hent sus nämlich miässu z’Stand bringu nu na isch, zu däre unsäglichu Zit, än güäte Üftritt uf die Bühna z’bringu. Ob das wohl isch güät gigangu äntziäht schich minum Wissu. D’wachsahmu Öigu va dischum Blogschriebär hent nämlich prekäri Situatione bi de Schwiischwänz im Vorfäld vam dum Üftritt beobachtut. Die sind doch tatsächlich uf die gloorichi Idee cho, mit zwei Värchehrspylonu irusch Trichfestigkeit uf du Prüäfstand z setzu. Das Bildji mag schich jetz wohl nur schwer in ewe ungiäbtu Vorstellige värfestigu. Nur so viel isch gseit, Värchehrpylonu chamu lüt de Schwiischwänz öi als Trichtära missbrüchu. In weiser Voraussicht und im Wissu, dass schich in dene Dingär chänti Abgasi, Bakterie und andäri Chrankheitsäregär asammlu hent d’Schwiischwänz natirli nur Hochprozäntigs la durchrinnu, wa jede Chrankheitskeim grad im Asatz het la du Geist üfgäh. Ischäreis bliebt där einzig Sousaphonischt va de Serenas in zwifilhaftär Ärinnrig. Där Matzi, schinärzeichu hervorragende Musikant und Wahlschwischwanz, sellti ja grossi Trichtära giwohnti si. Doch das Spiel mit dum oranschigu Värchehrspylon alias Getränketrichtär in gross, het är appa värloru. Z Gmisch va Abgas und Alkohol isch de vielliecht doch äs bizji z viel gsi um uf där Bühna nu Hochglanzleistige z vollbringu. Gottlob het är däheimu än härzallärliäbschti Chrankuschwestär, wa das alles - zum erschtu -, und ich mag ras värgönnu, nit het miässu alüäge, und - zum zweitu - nu am Sunntag ämorgu sichär schön durch du Nahtag gipflegt het:-). De Schwiischwänz sige abär an dieschär Stell die Eskarpade mit där zwäckäntfrämdig va Värcherssignal z värziäh, hent schi doch numal richtig wellu fäschtu. Schliässilch wärdend schi am negschtu Wuchunänd än niächtere Dienst miässu schiäbu an irusch eigunt Jubiläumsfäscht.

Abär widär zrug zu de Porretschnätschär. Die hent vor und öi nach dum Üftritt üsgiebig die värschiedunu Bare gignossu. Där Lando natilich immär nu mit där griänu Pludderchappa ufum Chopf het schich där ganz Abu nit la lumpu und sowohl bim trichu als öi bi dum eintu odär andru Chartuspiel, natirlich ganz ohni Händ gspielt, darfär abär mit viel meh unbeabsichtige Knutschilage gizeigt, das öi är nu voll im Saft und mit va där Partie isch. Und zwar äso was vo im Saft, das schich di mit ihm värmählti Dodo jetz öi uf d Süäch nacheme neuu Schatzji macht, wiä schi sälber per SMS het la värlütu, nachdem äs Paparazzofoto mit där ganz unbeabsichtigtu Knutschilag vam Lando d Rundi gmacht het. Vär die grossartig Leistig vam eltschtschu va isch an dem Abu, im Sinne - mu isch nur so alt wiä mu schich fühlt -, hei wär dum Lando de an dem Abu gad du Leila uf där Bühna gwidmut. Ich hoffu äs het där gfallu Lando und wiär freue nisch natirlich jeder Zeit wieder dich in ischum exklusivu Chreisji därfu z begriässu.

Abär öi die Carina het an dem Abu Talänt bewiesu. Nit nur bim Trompetu, wa schi schich immär va där beschtu Sita zeigt:-) Nei, wahrs Värschöifstalänt het schi bewiesu. Imene Afall va Väreinsbewusstsi het sus schi doch gschafft praktisch z’ganz Gönnärbüächji an einum Abu z villu. Lüt där Carina chunts öi mim Gäld sammlu nit uf die Qualität, sondärn uf die Quantität drufah. Ob äch schi bi dem Üspruch eppis värwächlut het sige mal dahingestellt. D’negsch Wucha bringi ira uf jedufall äs neus Gönnärbüächji mit.

So isch der Abu zwischu Gäldsammlu, trichu und SpezialUNOspielu värflüächt schnäll dum Ändi züägigangu. Und währund där First Husband schich wiedär ärere normalu Hütfarb gnechrut und där Sämy scho wiedär du Fahrstuhl nach oben gnu het und schis Briädri im Stich het gla, d’Sibylle värbissu dum ganzu Värei Eischoll het wellu schmackhaft machu und Musikus und Konsorte värzwieflut värsüächt hent eppär annärsch z si, isch där heilig Alain froh gsi, hetär heimwärts richtig Sängis du Wäg mit wenigär Kurve gnu, das sichär öi keis Malheur passiärt. Unnärwägs hei wär öi nu, nit wirklich ärstünt festgstellt, dass där Raoul z Talänt vär z ABC-Liädji va schim Vatär gerbt het, der het nisch nämlich bis dehemu mit dum ABC inklusive einige Wiedärholige unnärhaltu. 

Där Hert Chäru in schinär gängigu Formation het schich de nu mit dum Briädri deheimu igfundu vär än letschte Absackär z näh. Das der de nu bis ämorgu im sägschi gidürut het isch einzig und ällei dum Briädri schine Värdiänst. Der het nämlich sobald was agfangu het Tage alli üsär Hitta gjagt, susch hettis värmüätlich nu viel länger gidürut. 

 

Was vär än Start inz neuji Jahr. Ich freuu mi scho jetzt uf negsch Wucha, z’Gast bi de Unnärbächnär an irusch Jubiläumsparty (Hoffuntlich scheichentsch de da die Gitränkt in normale Glesär üs). Drum scho mal jetz äs driifachs Schwischwanz, Schwiischwanz, Schwiischwanz. 

Ewe Webmastär, allsitz bekannt als z Briädri vam Sämy.

Solothurn, 21. Januar 2014

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Ein Abend im Nervenkostüm eines Musikus-Stellvertreters

Minu liäbschtu Chnätschärinne und Chnätschär

Als erstes mal äs paar Richtigstellige. Äs isch mär nämli z Ohre cho, dass ich -  schiens -  im Blog ab und züä äs paar Tatsache üsschmücke. So wellti drum de gad richtigstellu, dass z Diegi bi de Ganterbrätschär de gad gar niä uf schis Biär värzichtut het. Schliässlich chan är nit uf Coca üsweichu, wennär doch weiss dass schine Liäbscht, där Samy, scho bim erschtu Üftritt z Agaru  du Fahrstuhl nach oben, Richtig Birchu gnu het und z Diegi va jetz a in der Beziähig nur nu di zweit Giga spielt. Drum laht är schich öi nit la biätu, dasi behöiptu äs hei mu de tatsächlich zruggehndu im Bus sogar nu z Sprach värschlagu. Ne nei, da hetär de lütärhals mitgsungu und zwar üs purer Schadufreid, daswär vam Sämy die Pauke de z Agaru doch nu värgässu hei obwohl dass där Webmastär ja öi da unabsichtlich nit ganz d Wahrheit värzellt het. 

Nei wart jetz, jetz värwägsli glöib scho wiedär eppis… Ah ja, genau so is gsi. Z Diegi het bi de Gantärbrätschär nummu Biär gitrüchu und nit Coca, willär so freit het ka, dass z Sämy z Agaru du Fahrstuhl nach unten nimme gfundu het, wodurch är schini Pauke nimme rächtzitig het chännu in Empfang näh, darfär abär äs annärs Presänt mit heimgibrungu het, was wiedärum z Diegi därzüä ärmüätigt het im Bus va Tärmu zrug heim im ABC-Liädji va afangsch bis zum Schluss mit dum Sämy mit z'singu. 

Hmmmm... Jawoll, so odär ämil schampar ähnlich is gsi, jetz sellti de alles wiedär richtig si und die Gemüter besänftigt. Leute!!! Ich värchumu doch ab und züä öi nit gad immär alles im Detail mit, höiptsach di Kärnüssag stimmt. 

So gnüät grächtfertig und berichtigt zrug zum eigentlichu. Ab zu ischum bereits 3. Üftritt va der Fasnacht und das nu vor Wiähnächtu. Än absoluti Premiere. Di Big Beans hent die Porretschchnätschär zu irusch Guggerball uf Grächu igladu. Där Tag het vär mich scho mitumene Schock agfangu. Küm hani d Öigu ämorgu üfgita hets scho gheissu z Steffi sige Bettlägerig und drum ausser Gefecht, drum miässe där Musikus Stv. hittu ispringu. Das ich das bi, isch mär bis zu dem Momänt nit wirklich bewusst gsi. Ja nu hani deicht, dem tiäwär de scho äswiä. Där Schock nummär zwei het de nit lang uf schich la warte, hani doch miässu ärfahru das ische Trummlär hinach angäblich nit mit va där Partie wird si. (Gottfriedstutz Diegi, Zit vär jede Blogitrag bis uf du blank Chnochu uf Fehlär durchzüächu finds, abär nachär am Üftritt nit da, die het mu gäru) Nichtsdestotroz han ich de abär natirlich ische Musikus bis ins chleinstusch Detail üfrichtig värträttu. So hani mi also öi am Afang vam Abu die obligatu füf Musikusminüte värspetut. Wani de also inär Musikusziträchnig äbu rächtzitig Richtig Bus gluffu bi, hani gmeint di sige appa jetz tatsächlich ohni mich gigangu. Abär nei, äs isch wirklich so gsi, dawär nur z sägst (also als Quintett) uf Grächu gstartut si. – Was vär än Start in denu Guggumüsigabu, mit Schock Nummer Dri – Gottlob sind de nu ganz viellie Mitglieder nahcho, so dawär än aständige Hüfu uf die Bühna gibrungu hei. An dischär Stell äs härzlichs värgällts Gott an z Pädi. Der isch doch tatächlich fasch z mitsch inär Nacht numal üfgstandu, nur vär nisch bim Üftritt cho z hälfu. Das isch wahre Isatz. Danke. Jetz hani abär ä bitz vorgigriffu. Zrug zum Afang vam Abu. Z Grächu acho, isch ischum "Quintett" de nit viel meh übrig gibliebu als uf du Räscht va där Mannschaft z'warte. Das geit natirli am beschtu mit einum odär zwei Biär, bsundärs güät, zum d Närve vam Stv. z berüähigu, anäre Bar und güäter Hoffnig das de öi wirklich allne längt bis zum Üftritt. Heilfroh, isch kei Umzug hei wär nisch also schnüärstraks in d Fäschthalla chännu bigä und mit där Nahrigsüfnahm in flüssigär Form afa. Äs sige hiä abär öi churz d Spagetti ärwähnt was nu gigä het. Vär eis mal mit Pesto Gennovese, was vär än Innovation. Churz druf han ich de scho wiedär mit Ärschrecku miässu feststellu, dass ich hitu ja Musikus Stv. bi und zwar vielliecht de än riesu grossi Pfiffa vamene Stv., erscht Rächt weni kei chleini Pfiffa ha wani chännti d Liädär a und ab Pfiffu. (Also Schock nummär 4 gfolgt vamene churzu abär chräftigu Härzchriäsi) Merci also dem mit där Räguboguchappa wamär da churzfristig het chännu üshälfu und du ersti Isatz vam Defibrillator vor där Faschthalla het värhindrut. 

Üsgrüstut mitäre Pfiffa, dum Instrumänt und ämene, nit z’letscht dank dum Alkohol gfördrutut Geisteszüästand, wami vollär Züäfärsicht vär du Üftritt gstimmt het, hani die Porretschchnätschär im Instrumäntudepot ämpfangu und numal schnäll z aspruchvoll Üftrittsprogramm mit zittrigär Stimm durchgigä. Natirli nit ohni öi nu z ärwähnu, dass doch bitte jede sälbär schine Isatz sellti wissu, falls de bi miär eventuell äbu doch alls Bachab geit. Ab jetzt gilts also ärschnt hani gideicht und scho het z Vicki du Rhythmus richtig Bühna agfiährt. Där erschtusch Pfiff... und där Rhythmus unisono still…, das het doch also scho mal sehr güät funktioniärt. Negschti Hürda cha also cho. Där Stand up und där Wälsche. Abär öi di zwei hent aständg gitent. Mit dum Leyla isch de där erschtusch Hänger cho, het doch där Stv. du Istig ins Liäd vär die Trompete eifach nit gfunnu. Der isch halt blöderwies eifach nit da gsi. D Scha9 het d Situation abär geistesgäguwärtig sofort ärfasst und du Lead ubärnu – Phuuu, numal Schwein ka – Scho mim negschtu Liäd dum Wulewu het de abär alles wiedär güät giklappt, so daswär nisch de du Twist und sogar du Blues öi nu züägmüätut hei. Abär öi da het jede schine Isatz värwitscht. Z Mischi het de mal nu gad churz zu gstresst Stv. besänftigt (easy Sebi, nit gad z schnäll) und scho hani du Bühnuabgang chännu apfiffu und inu Rammlär startu. Obwär tatsächlich so güät, in Afiährigszeichu, si gsi, odär obs anär spatu Üftrittszit glägu het, wa ja bi ischär Madame la Presitente, mu chäntis langsam fasch värmüätu, scho fasch müätwillig igfädlut wird, leh wär jetz mal im Rüüm la stah. D Chnätschärinne und Chnätschär hent ämil nah dem Üftritt so freit ka, daswär öi nu du Rammlär z hindrusch inär Fäschthalla fertiggspielt hei und nachär vor dum Instrumäntudepot de doch nu där Värbotne ganz älleinzig vär isch gspiel hei. So viel Müät, vär denu ufär Bühna spielu hei wär de äbu doch nit ka und ich hetti schiär Blüät gschwitzt. Die Härüsfordrtig uberleh wär öi in Züäkunft dum güätu Musikus. Ew alle merci viel mal heidär mi an dem Abu zielsichär ubär z Glattisch bigleitut, där Värdiänst kehrt ganz älleinzig ew, jedum Porretschchnätschär wa da isch gsi. Ich hoffu nur äs chäme de jetz nit wiedär postwändund än Berichtigungsatrag, obwohl, z Diegi isch ja nit da gsi, de sellti also öi das keis Problem si. 

Nach dene zwänzg Minüte Adrenalin wiä bi Bungeejumping ohni Seil isch äs Biär gad sehr gläggu cho. Hei wär ja doch öi nu gnüäg Zit ka bis ämorgu im 3 där heilig Alain nisch abgholt het. Wenni de vor dum Üftritt scho gwisst hetti, daswär wahri Prominänz unnär ische Züähörer hei, hetti mi wahrschienlich klangheimlich vor dum Üftritt värdrickt. Stellet che abu vor, där Moby und sogar där Batman Joker sind unnär de Fäschtgäst gsi. Va letschterum hei wär da sogar Bildmaterial.

 

Unglöiblich nit wahr:-) The Joker het mär där ganz Abu und mindestens nu 3 Täg spetär jede Tag äs härzhafts Schmunzlu ufs Gsicht gizöibrut. So heiwär nisch de, im Wissu daswär absoluti A-Promis musikalisch hei chännu unnärhaltu am 3 Richtig Bus bigä. Dass dadärbi du eint odär annär Chnätschär scho fasch im Zentimetertakt uf d Schnurra gleit het, hetti är odär schi nit än Aru zum iheichu ka, darfär gäbe wär jetz mal de ischglattu Strasse Tschuld:-)

Ämorgu im fiäri si wär de schlussändlich alli am Ziel deheimu acho und öi där Joni het ämal där Primus wellu si, und het im Bus du Lead als ABC-Liädji Tätschmeistär dum Raoul eifach äso äwäggschnappt. Obär äch am Nahtag ämorgu nu än Stimm het ka, steit ine Stärna gschriebu. D Üssag allärdings „Äs isch so schön, wiär si alli Porretschchnätschär hiä in dem Bus und sogar öi nu där Alain und z Sebi“, die müässär mär de abär unbedingt doch nu genauer ärklehru, han ich mich doch eiguntlich bis jetz nämli öi immär zu de Porretschchnätschär gizellt?!!! Und so wellti zum Schluss öi denu drittusch Fasnachtsüftritt unner ärfolgrich bestandu värbüächu, bi de abär froh, dass där Stefanus z negsch mal ganz sichär wiedär da isch und wenn nit, de holli nu und pfärchinu höchstpersönlich üsum Näscht, flössu mu die ganz Heimapothek i und schrecku nu anär Leina ans Fäscht. Somit gehwär jetz zersch mal inä chleini Zwischupause, die chäwer glöibi alli sehr güät brüchu. Natirli nit ohni z Foto vam Hert Chäru und der isch dasmal vär eismal ganz am Afang vam Fäscht zämu gsi. Hittu gwidmut, dene tapfäru Mitkämpfär vam Quintett wa schich gar nit gschücht hent und z schad sind gsi, als Minimalguggumüsig amene Guggerball ufzchrizu:-) 

 

In diesem Sinne wünschu ich ew jetz alle än besinnlichi Wiähnachtszit äs frohs Wiähnachtsfäscht und än fätzige, närrische Start ins Jahr 2014 und somit in du Räscht va där Fasnacht.

Ewe Webmaster.

Solothurn, 10. Dezember 2013

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Im zwei ämorgu!? (untragbar)

Wenn d Madame la Presidente d Alkoholpromillegränza uf 0,0 setzt und mit där Ifiährig vo Alkoholtests droht. Ja wenn sogar z Diegi ämal uf schis Biär värzichtut und zum Coca zrug grieft. Ja wenn de nu z Leiggisch z Mül vor Ärstühnu nimme züä bringent und där Musikus fasch an schinär Pfifa ärstickt, de cha das nummu eis heissu, die Katastropha isch vorprogrammiärt odär aber… äs cha ja doch funktioniäru!! In welli Richtig das der Abu üsgartut isch ärörtre wär genau jetz hiä. Fakt isch, där Üftritt isch am zwei ämorgu gsi (untragbar).

Abär zrug zum Afang. Spüäle wär uf Sängärma, wa isch där heilig Alain pünktlich wiä immär mit schinum Luxusliner abgholt het. Biär isch äbufalls vorhandu gsi, z Briädri het gibrungu, abär gidankt het mus niämärt. Ja nu, wiäs gäng so isch hent schich wiedär alli schön flott, in Ärwartig vamene erschtu Fauxpas, um z Sämy drappiärt, abär, än leidär äreignislosi halb Stund speter siwär üsgstiegu, einzig mit där Feststellig, dass äbu z Briädri ab jetz än ander Namo het und z Sämy miteme riesu Smile. Der hent dri andri der Abu zwar öi ka, dass het abär vielmeh am stündlichu Spezialprojekt glägu, als anär Freid ämal kei Dummheit gmacht zha. Was ja schlussändlich beides uf z Glicha üslöift. Äs het nisch de öi gar nimme so richtig glängt, dadruf azstossu, hei wär doch, küm siwär dum Bus äntstiegu, miässu feststellu, daswär d allerletscht Guggumüsig si, und z Fäscht eiguntlich scho mitsch am Namittag agfangu het. Darum där Üftritt am zwei. Wer nicht komme zur rechten Zeit, muss halt essen was übrig bleibt. Abär äs tent viellie bitz bessär, wenni säge, wiär si d erschtu am Üftritt gsi, und zwar im neuu Tag. Und öi uf denu ubärüss marchärgrieffundi Schock hei wär nit chännu reagiäru, hets doch gad gheissu, Instsrumännti a, wiär spiele. - Ja ade Packet - Där Sämy schafft sus scho jetzt nimme sälber die Pauke azleggu (Obwohl, hedär das de eiguntlich jemals chännu), Äs fehlend cirka nu 5 Posüne und 9 Trompete (Sorry, Wunschdeichu). Äs fehlend tatsächlich 4 Trompete und zwei Posüne. Macht also ä Formation va zwei Posüne und 3 Trompete und där Musikus hybridmässig halb mit de Posüne, halb de Trompete am probiäru z hälfu, än Prompeta also. Darfär hets natirlich mal wiedär gnüäg Rhythmus, merci. Uf ewe Isatz isch värlass. Abär ämal dene armu Bläsär in d schmärzärfülltu Gsichtär lüäge und märku, dasmu doch öi bitz lisligär uf die Pauke chännti schla, Fehlanzeige. Giblasu vär mindestens 7 Mänschu wiedärzbiläbu, hei wär probiärt du Rhythmus doch nu äs chleis bizji z ubärtenu und so hei wärs de trotzdem nu gschafft äs einigärmassu aständigs Platzkonzärtji uf die Bei z stellu ohni blüätigi Lippe und pulsiärunde Hirnubärdruck. Obwohl, vär erstärwähnts nahzholu het z Sämy nachär bi där Sibylle de gad sälbär Hand agleit. Abär zu dem Gwaltexzäss spetär. 

Ändlich hei wär die Zit gfundu. Die Hiobsbotschaft va der Üftrittszit z  värarbeitu. Bimene chaltu Biär und Tomatpenne, wanimi ha miässu la belehru, dass die de woll apa güät sige (Ich ha somit mis Urteil uf andärhalbe Chochleffil ärhecht), hei wär ubär die unsäglich Zit debattiärt. Äs sige -  schints -  ich weiss sus ja öi nur vam Hörensagen, scho wiedär än Putschvärsüäch anär Madame la Presidente in Planig gsi. Abär pssst!!! Där Zitpunkt hetti ja eiguntli bessär nit chännu si, het doch där First Husband an dischum Abu stündlich wichtigäri Värpflichtige ka, als d Libwach va där Madame la Presidente sichär z stellu. Anschienund het schich de abär schlussändlich doch niämmär bereit ärklehrt dem Mop mit ärhobnär Brust vorazgah, wisse wär doch alli und ich im Speziellu, dass z Präsidium meistens nit viel därfir cha vär die Üftrittszite. Näme wär nisch also zrug und hoffe das nisch d Fortuna am Räscht va där Fasnacht nechär zär Sita steit. (Vielliecht geit ja de där Sämy mal z ira ga liggu). So, gnüäg um du heiss Brei umchagschnurrt, und üssärdem, ei Angst chani che gad alle näh. Z Sämy het vär eismal deheimu gliggu, äs müäss nu also niämmärt ga süächu, wiär värmisse nu nit. Hetti zwar wahrschiendlich öi susch niämärt gmacht, abär egal. Und öi där Fahrplan vär ubär du Simplon isch eiguntlich ubärflüssigs, Gfahrugüät und giftigi Substanze, schickent die Garabinieri vam Zoll z Domo sowieso postwändend retour.

So witär im Text. Wiär hei de öi schnäll ämal wiedär die Bar gfundu, das isch ja vär isch meistens nit äso schwer, siwär ja wiä än Kompass immär richtig Alkohol üsgrichtut. Z Duli, d Janine, d Mela und z Pädi hent de doch öi nu die Güte ka, schich züä isch z gsellu, was d Hoffnige vär än doch enigärmassu güäte Üftritt wiedär gnährt hent. Abär äbu öi där Durscht uf Biär, äs isch nisch ja jetzt, wa die da sind, nimme so flau im Mago gsi. So is de doch relativ rasch gangu, und ich bi tatsächlich ärstühnt wiä schnäll dass die Zit värgeit, wemu so äs dämlichs Chartuspiel gar nimme cha üfheru spielu. Hent nisch doch tatsächlich les Welsch gizeigt, wiä mu safer cha küssu und scho sind alli Chnätschärinne und Chnätschär ubäränand härgfallu. Da de somit öi gad d Ärklehrig uf z Rätsäl va z Sibylles bliätund Lippa. Där Sämy het ganz eifach schinu Monstärlippe mit z viel Wucht uf d Charta giprässt und scho is passiärt. Ich gehti halt eifach näbu eppär annärs ga sta. Sälbeär tschult. 

Bis zum Üftritt sind abär öi die Blessure va dem gfehrlichu Spiel, mehrheitlich resorbiärt und mit Alkohol desinfiziärt gsi, so das letschti Zeichen der Zeit wohl nur no via Gallerie dokumentiärt chännent wärdu. Vorerst is abär mal zersch viärtil vor zwei am Morgu wordu. Und tatsächlich, praktisch alli hent z Instrumänt ine Händ ka und vor där Bühna numal Konzentration gsammlut. Dummärwies isch di abär gad nit da gsi und so  hei wär keini gfundu. Z Vicki, mitlärwil apa güät inär siebtu Stund va schinum neuu Projekt, wa ziemlich Zeichu agsetzt het, het plötzlich agfangu uf d Chuchi z schla und wiär hei gwisst, jetzt is z'spaat me, vär Konzentrations z süächu, geschweige denn Niächtärheit zfindu. Jetz miässe wär da eifach durch. Ich vär mine Teil, ha mär die Kapuza nu bitz teifär ins z Gsicht gschreckt, äs chännti mi ja de susch nu eppär ärkännu und bi ab ins Schiiwärfärliächt, wani ghofft ha, dass jede Momänt än Churze git. Odär z Raouli odär z Sämy im eifer des Gefechts mal wiedär än Stäcku värliärent, wa de dummärwies gad genau die Glüähbirna triffti. Die tüät natirli de gad churz ufsprätzlu und äntfacht äs unschienbars abär nit mindär gfehrlichs Fiir im Strohdach va där vordruchtusch Bar. Mänschu sind dadurch gottseidank keini z Schadu cho, näbum ärhäblichu Sachschado het abär und das isch gad fasch z Schlimmsta, leidär där ganz Üftritt va de Porretschchnätschär üs Sichärheitsgrind miässu abgseit wärdu.  - Tja, laaaaaanges Tagträumen -  Ersch wani de gmärkt ha, dasch ja um mich scho spielend, bin öi ich wach wordu und ha ändlich mis Mundstück gnu und agfangu und ersch de realisiärt, daswär, trotz der nachtschlafundu Zit ziemlich güät si. Züägigä, äs isch ja jetz nur afa där Stand up gsi, das isch än machbari Üfgab, und zwar bi jedum Züästand. Richtig tricki is de jetz ersch mit dum Wälschu wordu. Abär öi der, und ich hoffu äs ligge tatsächlich nit nur an minum Alkoholpegil, isch wirklich annähmbar gsi. Gstercht mit neuum Müät und Züäfärsicht, hent die Porretschchnätschär an dem Abu gizeigt, dass schi durchüs öi nu am 2 ämorgu än richtig güäte Üftritt chännend uf die Bühna zöibru. Dass z ganz Publikum inklusiv Barteam um die Zit wohl wiggensauer isch gsi und sowieso nimme där Müsig züäglöst het, isch doch isch furzegal. Wiär hei freid ka und das het mu nachär im Instrumäntudepot öi gmärkt. Z Ziggizäggi vam Raoul isch üs vollär Brust cho und alli hent üs äbuso vollär Brust gantwortut. 

Jetz nu schnäll än wohlvärdiänte Absacker ga äbrispiälu, geit doch inäre knappu halbu Stund scho wiedär där Bus richtig heimwärts. Hei wär nit z ganz ABC-Liädji scho bis uf Visp mägu durchspielu und alli, üssär z Diegi, hent schich an dem Spiel rege beteiligt. So hei wär du Räscht vam Wäg de numal die Posüne und die Trompete gipackt und gad nummal dem supär Üftritt wellu nahscheichu. Das isch nisch de abär tatsächlich nimme glungu. Där Alain het halt die Kurve so geji gnu. Was ufum Wäg zwischu Sängärma und Stäg nu alls gluffu isch, Sängis isch ja vär eismal nit där Schlusspunkt gsi, lahni mär gäru va minum chleinu Fingärli nu la värzellu, das isch abär bis jetzt värdächtig stills gsi. 

Ä letschti Challenge darf abär öi an so ämene susch scho ärfolgrichu Abu nit fehlu. Und so het där hert Chäro tatsächlich öi hittu in allär Früähi numal du Pingpongtisch üfgstellt. (Und aha, jetzt weissi äntlich wiedär warum, das miär där rächt Zeigefingär so höllisch weh macht). Was vär än Ärlüchtig. Merci Steffi vär mär druffzhauu !!! :-)

So het de tatsälich d Sunna scho fasch ubär du Horizont glüägt, zumindest die Bärgspitza ganz liächt gstrift, wa de öi z Sämy, z Briädri, z Steffi und z Sährchen där Wäg heim gfundu hent. Ich vär mine teil ha mär zum Abschluss nu än neue herte Chäro gsüächt, isch mär doch där bishärige mittlärwil viel sportlich, z üfgstellt und somit z stressig in allär Herrgottsfrüäh. Hmmmmm, so is doch viel bessär. 

 

Ä flotti Wucha, z Briädri alias Webmaster.

St.German, 24. November 2013

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Uno, due, quattro... Där Fasnachtsüftakt 2013/2014

Alli griänu Kostümi wieder gfundu, där Musikus notabene bis knapp vor dum Üftritt nu ohni Reif, was ja scho fasch än liäbevoll gmeinti Tradition isch. D’Madame la Presidente het z Terrain am vorabu scho mal rekognisziärt und mit 2 Daumen nach Oben goutiärt. Instrumänt subär giputzt und gschmiert. Än värsammlute Porretschhüfu, frisch und unvärbrücht am viärtil vor siebni z Agaru bereit vär du erscht Umzug. Die Zeichu stehnt güät vär än glungune Saisonüftakt. Einzige Wehrmüätstropfu, jemand het z Biär värgässu inu Bus z’näh, und nei, dasch isch nimme d Üfgab vam Sebi. Gottlob het där Alain nu äs Värsteickji wa öi immär apa eis odär z annär Biär drinna sind. Dasär nisch das natirli ersch z Agaru gseit het, bim üsstiegu, wärte wär jetz mal als chleini Stichäli. Abär trotzdem wird sit gestär där 16. Novämbär immer där Tag des heiligen Sankt Alain si. 

Äso sindsch de also gstartut die Porretschchnätschär in d’mittlärwil 24. Fasnachtssaison. Und wiä äbu öi scho so oft, wiedär ämal als letschti Gruppa. Z Diegi het di Situation gad churz und knapp mit "untragbare Präsi" kommentiärt. Där Üftakt das Jahr het d’Schlampa gmacht und wer schi jetzt agsprochu fühlt isch sälbär tschult, ich meinu natirlich z’ Liäd. Gfolgt hetti die de sellu wärdu vamene rhytmischu Rhytmusteil. Dadrus isch abär zersch mal gar nix wordu und z zweit mal het ehnär gitent wiä viär Omis im Altuheim im Summär am Fleige tätschu. Jä nu, obs jetz dara liegt, das där Rhythmus där italienischu Sprach nit mächtig isch odär scha värwägslut mit dum Spanisch odär dara, dass äbu nu „keis“ Biär gflossu isch, sei dahingestellt. Wiedärämal hent die Bläser rettund miässu igriffu und numal d Schlampa hinnärna nahgä:-)

Nach dum Üftritt isch vo dum Üftritt, ob värpatzt odär z’Värsäge nur liächt touchiärt hei wär gideicht und nisch parat gmacht vär z erschtusch chlei Platzkonzärtji vor dum Fäschtareal. Vorär abär nu äs Biär, das darf nit fehlu, het ja schliässlich im Bus scho keis gigä, ersch nachär vor dum Bus, und scho siwär ufum chleinu Bühnilti gstandu. Züäschauer, gad fasch so viel wiä Müsikär, also rächt wenig, abär das isch halt immär wemu d’letschtu isch. So chei wär wenigstens nit viel falsch machu heiwär deicht und d’Instrumänt agsetzt zum spielu. Dasmal hets (vär eis Mal) nit am Rhythmus glägu, hent doch (vär eis Mal) die Posüne där Isatz värpasst, wass zär Folg het ka, dass där Rammlär so abruppt gändut, wiänär agfangu het. Beschi Zunge seitimu jetz, än Koitos interruptus. Abär öi hiä hei wär nisch nit la stressu, schliässlich isch ja öi nach dum zweitu Üftritt, vor dum Drittu. Also nu um Längine gnüäg Zit schich nu z värbessru. Vorerscht mal eppis ga ässu und än Schluck ga trichu.

Äs isch nit füf Minüte gigangu, ich ha z erschtu Chicken mit där unbeschrieblich, unubärträfflich Mätzgisossa ämil nu nit gässu ka, lieggent d erschtu Chnätschära scho mit dum Shot vor schich am Bodu. Das värspricht ja lustig z wärdu. Gottseidank sind die Pommes Frites, zwar churzi, abär darfär umso fettigär gsi, das git Bodu vär witärzfahru. Was wär de nam ässu natirli öi schnüärstracks gmacht hei. Die einzig Frag wa wär nisch jetz nu hei miässu stellu isch rächts odär links? Linggärhand isch de meistu Porretschchnätschär amächlichär gsi, keis Wundär, die Bar isch nechär und d’ Müsig tent öi nit schlächt. Obwohl denu mit där Müsig hei wär churz spetär scho bitz kritischär aglüägt. Welligi Stilbrich het der DJ da gibrungu, so das scho bald ämal die gspieltu Liäder näbusächlich sind wordu und d’Wächsla zwischudri ischi volli Üfmärksamkeit gignossu hent. So hei wär z’erschtusch Fäscht va där Saison witär gfäschtug, bis churz na de zwelfe, bevor daswär nisch hei miässu, ich meinu därfu üfmachu ins Instrumäntudepot. Där gross Üftritt steit bevor. Alli top vorbereitut, z’Tschaggini het numal schnäll inhaliärt, där Musikus mär sichär scho z gfühlt 150stus Sigeret abgröikt, z’Sämy schis Make up nahgizogu, d’Fotografin scho wiedär ubär z Kostüm greklamiärt und ä ei und jede het schis Intrumänt gnu, und gipackt va där Illussion das gäbe de hittu scho nu eppis, hei wär nisch üfgmacht richtig Turnhalla vär du grossi Üftritt. Ja liäbi Chnätscherinne und natirlich öi Chnätschära, ich miässti gad fasch leigu weni säge äs isch ein güäte Üftritt gis. Ich cha säge, äs isch – hmmm – än Üftritt gsi. Fischu im totu Meer hetti wahrschienlich meh Ärfolg värsprochu, abär immärhin chänne wär du Wälsche und där Leila unnär güät värbüächu und där Värbotne het, vär z erscht Mal vor Publikum gspielt, ämel öi schini Wirkig ärzielt. Warum die Trompete plötzlich und unisono die Bühna wiä vam Zebra gibissu grümt hent, änziäht schich minum Universum. Än göttlichi Fiägig het wohl wellu, daswär denu Üftritt wenigstens nu mit ghobnum Höipt und viel Contenace, beände. Äs isch wiäs isch und wiä hets scho dazumal im Schgilager gheissu, „isch erschte Tag, muscht noch lerne“, tiä wär denu Üftritt unnär knapp bestanden värbüächu und lüäge vorüs ufu negschte. An dischär Stell dum Musikus äs värgälltsgott. Mit vollum Isatz va alle schine Extremitäte und mit viel Puste und güätum Willu hedär alls probiärt, vär schinu Mitgliedär durch denu Irrgarto vamene Üftritt z länku. Güäte Musikus.  

Bliebent nisch somit also nu knapp zwei Stund, wa eiguntli rächt schnäll värzellt sind. Zält, Müsig, kathastrophalie Stilbrich, Sämys Arsch vorum Gsicht (ups jetz bini apa umkiet), Biär, Biär, Biär und scho siwär wiedär im Frässzält glandut. Där letschtusch Tropf Mätzgisossa, mitäre Hingabe und alls obs där allärletschtusch Schluck Wassär we und mis Läbe würdi dra heichu, üs dem Bido krazt und scho het nisch där heilig Alain abholt und wohlbehütet heim gita. Danke diär.  

So bliebt nisch zum Schluss va dem Afang va där Saison nur no z Fazit, dass die Porretschchnätschär nit im Stand sind uf viäri z zellu, zwischu spanisch und italienisch gad ubärhöipt gar kei Unnärschied gsehnt. Där Musikus äls bikanntuste Abröikär in d’Anale va där Gschicht will iga, wiär du Üftritt definitiv nu äs Müüüü chännti värbessru, ufum Samariterpostu unbedingt sellti äs Memory vär Notfäll bäreit stah, das cha ja jetz also wirkli nit so schwer si, z Steffi und z Sebi, und das müässi neidlos züägä, beidi supär sind und z momentan unäntschiedu Battle im Ping Pong negsch Wucha müäss witärgfiährt wärdu, d’Sarah üssär Konkurränz spielt, där hert Chäro nimme isch wasär mal isch gsi, träge, ulustig und eländsvärlängrund (hittu sindsch fit, sportlich und wellend gad gar nimme heim) und… Der Fahrstuhl nach oben, mit z Sämysch Pauke, abär ohni du Sämy bsetzt isch. Der isch nämli nu än Stock hechär gfahru.

Punkt, Ende, bis scho ganz bald

Där Master

 

Zwischen Visp und Bern (mit leichtem aber pochendem Hirnüberdruck), 17.November 2013

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Där Pre-Fasnachtsabschluss

Andri Jahr hetti wär an dem Tag scho d’Wehmüät gspirt. Där flüchtigi Momänt wa nisch alle bewusst wird das d Fasnacht wieder viel z früäh z Änd geit hetti nisch ärpackt und alli ine Fasnachtsänddepression gstürzt. Tja so löift das halt am Giggelizischtag. Abär nit so das Jahr. Hier hent ä schuppu Chnätschära und speziell d MLP statt Wehmüät du Nahtag vam Giggelimentag ine Chnoche gspiert und där Sämy du chnurrund Mago. Wa wär nisch nämli am siebni uf dum Parkplatz gitroffu hei, hei wär alli gwisst, das Jahr wird die Guggumüsig nit z Mittärnacht vär fasch äs ganzus Jahr wiedär värstummu. Nei das Jahr geits äs Wuchunänd spetär witär. Abär das isch natirli kei Grund, das wär nit doch gebührend d Obärwallisär Fasnacht in ischum Dorf värabschiedut hei. So sie wär bimene erschtu Umzug zersch mal Richtig Väreinslokal marschiärt, wa wär nisch und im Speziellu där Sämy mit äre chaltu Platta und Biär gstercht hei vär du Marsch durch z ganz Dorf. So hei wär bi Spiess und Trank und im Wissu drum, dass die Fasnacht numal äs Üfböimu wird ärläbe, üsgiebig die letschtu Üftritta la revue passiäru. Die Bildär und Gsprächi und vor allum z zämu si, zämu müsiziäru und zämu fäschtu hent nisch alle äs Schmunzlu uf z Gsicht gizöibrut, so daswär nimme längär hei wellu warte und am Nini (vär eis mal nit) där letscht grossi Umzu hei gstartut. Vam Lokal is wiedär retour richtig Wolfji gangu, wa där Musikus im Chälli va de Salzgäbini nisch äs feins Apéro serviärt het. Härzliche Dank dum Steffi vär die Bewirtig. Unnärwägs zum Chälli hei wär de nu gad än neui Marschkomposition ärfundu, wa glöib nit nur miär, sondärn äbu öi dum Musikus sehr imponiärt het und ich mich darum druf cha freuu, daswär das z Wädenswil öi so im Nachtumzug durchziäh:-) Där feini Wii, und die nit z letscht  bitterchaltu Üssutemperature sind wohl där Grund gsi, warum wär das Apéro de nu bis im elfi in d Längi gizogu hei, bevor daswär nisch de aber hei miässu sputu vär pünktlich z Mittärnacht wiedär uf dum Sportplatz z si. So si wär mit dum Schlampuschlüpfär spielundu richtig Bach und Germanusbrunnu glufu. Wiä jedes Jahr hei wär de hiä ischum Dorfheiligu nu äs chleis Ständli dargibrungu und nu gibätu är selle darfär sorge, daswär die letschti Fasnacht niä värgässe und die negschti, wenn ubärhöipt meglich, nu gad äs Müüü bessär wird wärdu. Där gross Momänt het de scho bald ämal nur nu wenigi Minüte uf schich la warte und scho het d Ühr Mittärnacht agizeigt. Ubärwältig und ziemlich ärstünd hani de die Songasag vam Musikus därfu kehru. Där TNT, wani doch vär das Jahr scho abschriebu ha, bini doch där einzige gsi, waschi wehemänt, dennoch nutzlos, darfär igsetzt het daswär doch das Stuck öi meh sellti iäbu. Abär die Porretschchnätschär we nit die Porretschchnätschär wennsch das Jahr mit där beschtu Tradition gibrochu hetti. Nei, d Fasnacht hert ersch üf, wenn öi där letschtusch Ton vam TNT gröhrut isch wordu. Und so hent die Posüne, z beschtusch Registär;-) zum grande (pre-)Finale agsetzt. Gfolgt va Rhythmus und Trompete hei wär die letschti Minüta va där Fasnachtssaison 2012/2013 värabschiedut und vielliecht hei wär nisch sogar nu zwei dri Sekunde züäsätzlich va där Faschtuzit gstohlu, wills wiedärum so schön isch gsi. Man möge uns verzeihen. Hetti in dem Momänt nit gwisst, dasi mis Instrumänt das Jahr numal anär Üssärschwizärfasnacht darf brüchu, miär hettis schiär die Träne in d Öigu gitriebu, ja güät, das mit de Träne het vielliecht öi a där Chelti und dum Wind glägu. Abär trotzdem där inoffizielli Fasnachtsabschluss het öi das Jahr wiedär gfägt und ich danku ew alle wiedärum vär än ganz tolli Saison wa wär zämu hei chännu värbringu. Bevor dasi jetz abär wiedär zumene emotional Üsschweifundu Abschlusswort va ca. 3 Site chumu, wellti hiä doch nu vorläufig än Schlusspunkt setztu. Schliässlich därfe wär z negschtusch Wuchunänd öi nu mitenand Fasnacht gniässu. Drum sei hier, aber nur vorübergehend, Schluss, willi weiss, äs isch äbu nu nit Schluss…, Prost

 

Bis am Samstag, ich freuu mi

Ewe Webmaster.

Solothurn, 14. Februar 2013

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Där 53-Stünder und där (fasch) Räscht va där Narruwucha

Eis vorab, so güät hani värgott nu niä gschlafu. Wani am feischtu Donnstag am Namittag am Zwei ufum Parkplatz mit Instrumänt und ämene Biär parat gstandu bi, bini nämlich scho ganzi 32 Stunde uf de Bei gstandu. Abgseh vamene churzu Powernap zwischu Spiez und Thun und geistesabwäsunde 30 Sekunde wa vam Kondukteur mimene unglöibigu Blick isch quittiärt wordu, hani jetz nu fasch än ganze Tag Fasnacht ohni Schlaf vor miär ka. Warum dasi nach äre durchzächtu Nacht nur physisch im Intercity uf Zürich gsteckt bi, wieso das schi di Fahrt de fasch nit ämal glohnt het und weshalb dasi uf än so dämlichi Idee va meh wa zwei Täg durchmachu ubärhöipt chumu, isch än Gschicht wa uf andre Site müäss gschriebu wärdu. Also zrug zum Wesentlichu. Wiä gseit hani am feischtu Donnstag am Namittag im Zwei, bewaffnut mit Instrumänt und Flüssignahrig zämu mit de andru Chnätschära deheimu z Sängärma druf gwartet, du Ändspurt va där Fasnachtssaison 2012/2013 in Agriff z näh. Churz druf hei wär d Startlinia ubärschrittu und mitume erschtu Umzug deheimu z Sängärma die Narruwucha gstartut. Begleitut wiä jedes Jahr va de MUKIS und där Primarschüäl, wa sälbsch gad zu de Instrumänt gigriffu und nisch nu fasch d müsikalisch Vorherrschaft im Dorf abspänstig gmacht het. Die hent schi di Porretschchnätschär abär de churz druf inär Turnhalla mitämene erstu Konzärt wiedär fest värankrut. Där Feischt Donnstag Namittag bliebt somit im Zeichu va de Porretschchnätschär, wa öi das Jahr z iheimisch Publikum mit irusch Kläng zum Tanzu het gibrungu. So hei wär nisch de das öi nit la näh, du Applaus va de Sängärmaner öi bimene zweitu und drittu Konzärt äntgäguznäh. Abär natirlich öi eis, zwei Biär odär än warme Wii, schliässlich isch ja där Tag nu länge gsi und Alkohol vär isch ja öi immär Närvunahrig und Üfputschmittil:-). Das sichär öi än Grund warum daswär de im Jugi nach dum offiziellu Teil gad wietär gmacht hei, bis nisch där Alain am viärtil vor Siebni abholt het vär ab anu Gätsch. Bereits zum drittu Mal sind die Porretschchnätschär nämlich hiä bi de Pampers zu irusch Fäscht igladu gsi. Bis zum Üftritt hets de abär nu äs Zitji gibrücht und so hent schich d Chnätschärinne und d Chnätschär ins viel z früähi Nachtläbu va Brig värirrt. Wiäs halt im Gätsch in dem Gstung öi so isch, hent schich d Fädu hiä värloru und so mag ich nummu spekuliäru und uf Grund vam igängigu Studium va ischär Porretschgallerie d Fakte va dem Abu mär sälbär zämureimu. Värtruwti Quelle wagend abär z bärichtu das där Abu bi där halb Guggumüsig scho mitumene Trichspiel agfangu het (Das sind ja wiedär güäti Vorüssetzige vär du bevorstehund Üftritt). So selle mu uf kei Fall bi Trichspieli allär Art im Speziellu abär dischum, vor dum Diegi mit Süffu anär Reiha si, odär momänt is nach dum Diegi gsi? Egal, am beschtu gar nit inär Nechi vam Diegi wenns drum geit, das nit willt värliäru und där Gäldsack scho vor dum Idunklu leere willt ha. Wie dem auch sei, sichärlich das Trichspiel und sälbschvärständlich öi andri Faktoru sind mit ä Grund gsi, warum einigi Chnätschära d Stäga vor där Sebastianskapälla scho mit schwerer Schlagsitta emporärklummu hent. Nichtsdestotrotz hei wär än meh odär weniger, säge wär mal passable, Üftritt gibotu. Das där Rhythmus du Rhythmus nit ganz gfundu het, miässe wär hiä wohl definitiv dum Giaggini in d Schüäh schiäbu. (Mu tüät ja liäbär Dorfu als uf du Musikus acht z gä;-) Abär da de der negsch Jahr öi wiedär mit isch uf där Bühna wird stah, miässe wär nisch darubär nit witär Sorge machu. Där Abgang ab där Stäga, vär dische odär jene z värglichu mit där Erstbestigig va där Eigärnordwand isch de ziemlich zaghaft vonstatten gegangu. Abär schlussamänd het doch öi där letschtusch Chnätschär där nachfolgund Guggumüsig Platz gmacht. So isch de öi die Zit cho, vär ischu igehundu Studie va de kulinarische Biträg währund dischär Fasnacht wiedär üfznäh. Da wär ja mittlärwil wisse, dass nit nur ischu liäbu Chnätschära dischu Blogiträg läsent (Äs drifachs iär wisset scho was und äs Grüässji uf Unnärbäch), bini doch inzwischu sehr bimiäht uf di politisch Korräktheit va mine Üssage z achtu. Und übrigens, ewe Üftritt z Turtma -  ein Traum der ganz besonderen Klasse -  zwei Daumen nach oben. Miässti wär anstatt Närruchochleffla Närruklanggable värgäh, där Siegär hetti wär gfundu und vär d Show chani mi eifach nur värböigu. (So, gnüäg gschliemut). Zrug zum Ässu, wa nach där mittlärwil 43igstu agibrochnu Stund dringend minu Energiereserve het miässu nahladu. Zär Üswahl dasmal än Bratwurst mit Brot und Sänf odär…, na ja, än Bratwurst mit Brot und Ketchup. Ja ok, immärhin än Üswahl, was wär ja lang nit va jedum Fäscht därfe behöiptu. Abär zär eiguntlichu Materie. Där Wurst, äso wiäni nu gäru ha, mit äre krossu Gruschta mit mindestens, durch Röich, Gas und Fett belastute 1000 Chrebsärregunde Stoffa het sehr gmundut. Zwei Närruchochleffla darfär. Nu ä biz schwärzer und äs hetti dri gigä. Där Umstand das die liäbu Chech bi dem Gedränge und bi der Akkordarbeit nu jedum du Wurst so gmacht hent wiä gwünscht, värdiänt gad nu du drittusch Chochleffil. D Üswahl zwischu Sänf und Ketchup isch de abär doch nit wahnsinns ärwähnunswärt, warum das z Ändärgäbnis bi dri Närruchochleffla bliebt. Än solidi Leischtig. Eifach ubärüs fründlich und zfriedustellund. Und nit z Värgässu, d Energiereserve sind wiedär gladni gsi. Äso, daswär öi du Räscht vam Abu nu hei chännu in Agriff näh. Giplant gsi, we ja va miner Warta üs gseh, nit z spaat du Heimwäg azträgu abär äbu äs chunt ja erstens immär annärsch und zweitens als mu meint. So bini de also ämorgu im halbi sächsi ersch, churz nach dem wani du Raoul nu fasch hetti mägu ubärzügu vär äs Früähstuck in Domo und nach äre ärfolglosu Süäch nach andre willige Chnätschära, wiäs halt öi immär so isch im Gätsch, zämu mim Samy, är sälbstvärständlich immär nu mimene kaputtigu Rock, im Couronne zum Katärfrüästuck glandut. Äs churzus abär intensivs Fotoshooting mit ämene nit ganz friewilligu Model, abär darfär umso bessre Fotos und de beschtu Älplermaggarone ever (Die Menübewärtig abär wohl ehnär z Ärgäbnis va där ubärmiädig und dum Värlangu va minum Körpär nach Cholohydrat, alls däre objektivu Beurteilig) spetär, isch de wohl ändgültig där Heimwäg uf dum Programm gstnadu. Und numal än halb Stund spetär, nach äre Komaattacka vam Samy (Grind ufi Tischplatta und weg) und was de doch scho ziemlich gitaget het, hei wär du Heimwäg wirklich gipackt. Das där Abu schich jetz zu der früähu Stund tatsächlich nu bis im halbi zwelfi z Mittag, odär äbu 53 Stunde nach dum letschtu Ärwache hinziäht, hani in dem Momänt mägu z bezieflu odär bessär gseit, äs weri die gfühlti Hölle auf Erden gsi. Churz druf abär hani im Zug Richtig Visp ärstündt feststellt, dass d Agstelltu va där Bahn ohni Problem än Gätschnacht chännent durchfäschtu und bereits im 6i wiedär routiniärt chännent Tickets kontrolliäru. So darf ich mich doch, hani ja Ferie, scho gar nit beklagu, dasi immär nu nit im Bett bi gsi. Wo wär de z Visp gad tatsächlich nu du Bus värpasst hei isch z Urteil va dene 53 Stund gschriebu gsi. Und was machent die värbliebunu Chnätschära wennsch andärhalb Stund miässent totschlah? Ich weri ja im ZAP ga Biächär alüäge, mine härzallärliäbscht Brüädär het abär zum verbalu Durchfall und Rundumschlag gägu d Hochprisinsla Schwiz tendiärt und schinum Unmüät inär Fasnachtsbeiz schlächthin in Visp Luft gmacht und gad die ubärrissnu Priesa vär Hochprozäntigs zum Politikum ärklert. Nimmt mi de wundär ob dem Agressionsafall öi tatsächlich än Läsärbriäf im WB wird folgu. Nachdem wa wär de die 8 Franko pro Appuzellär halt in Chöif gnu hei und ich där Idee Fotos vam schlafundu Raoul zmachu ha chännu Ihalt gebiätu (obwohl, das we sichär lustig gsi), hei wär de nu knapp du negschtu Bus heimwärts ärwitscht. Hetti z Sämy nit nu imene Aflug va purum Masuchismus nu meh ubärissu tieri Hochprozäntigi wellu züä schich näh, weri wär de öi tatsächlich im Nini ämorgu im Bett gsi. Abär nix da, wenn die Dorfbeiz scho mal offu het, de müäss mu ja d iheimisch Wirtschaft öi unnärstützu. Uf d Ärkänntnis, daswär wohl negstens amene Fisch odär nu schlimmär amene Fischstabji wärde ärsticku, will wär du Blasiussägu scho wiedär värpasst hei, hei wär de halt im halbi 11 öi nu z zweitusch Cynar bstellt (im Fall nu äs feins Gitränk). Schlussändlich und wohlwissend, das d Leiggibrothers inär negschtu Zit, bis zum negschtu Dorfskandal als d heimlichu Dorfalkoholikär durch d Schnurra gizogu wärdend (Dummärwies sind die tüsigi va Blasiussägumässbsüächär öi nu alli irusch Apéro inär Beiz cho trichu) hets de zum Abschluss nu das schön hert Chärufoto gigä, bevor das ich minu Öigu de tatsächlich am halbi zwelfi ändlich mal wiedär ha chännu züämachu.

 

Där kommundi Fritag, wird in minum pärsönlichu Läbunslöif als där wohl chirzuste abär dennoch umso meh tragischtusch Nahtag in die Gschicht iga. Gottlob hei wär an dem Tag än Fasnachtspause ka, bevor das d Chnätschära de am Samstag bi de Balianos z Baltschiädar wieder in Konzärtformation sind stramm gstandu. So si wär de jetz öi scho am letschtu offiziellu Alass va der Obärwallisär Fasnacht in dem Jahr acho, am Ballianosfäscht. Hiä hent schich die Porretschchnätschär an dem Samstag ämabu, so glöib ich, bi halt immär nu nit wirklich wach gsi, ze siebne värsammlut vär als erstesch ärschreckund feststellu, dass z Jugi das Jahr die Porte nit üfmacht. Vor lütär Schock hei wär gad dri Schnapsbrättär gikillt. Gottseidank hent die Ballianos, und ich glöibu wiär hei än Siegär gfundu, z beschtusch Ässu parat ka vär Bodu vär nu meh Schnaps z machu. Die Älplärmaggarone sind eifach där Burner gsi und lehnt d’ Serenas, vor Nied la ärblindu. Perfekt abgschmäckt und garniärt, mit de beschtu und krossuschtu Ziebilustuckjini isch das Ässu än regilrächti Party vär minu Fasnachtsgschmacksnärve gsi. Hetti mär d Chuchi nit än zweiti Portion värwehrt, där eizig Minuspunkt vär die doch chlei Portion, so hetti wär hittu z erscht mal 6 Närruchochleffla chännu värteilu. So konsequänt bini de abär doch, dasi müäss säge, ei Närruchochleffil wenigär, willi halt nu nit gad ganz bi satt gsi. Wenär so güät chochet, miässedär öi mit Nachschlag rächnu. Abär und wiä gseit wiär hei mit 5 Chochleffla än Gwinnär, die Ballianos gehnt hiä als kulinarische Höhepunkt fa där Fasnachtssaison in d Anale vär där Gschicht i. Bravo, ich ärwarte negsch Jahr z glicha in dopplutär Üsfiährig. So güät gstercht, hei wär nisch an die Bar bigäh und nisch uf du Üftritt hiä in Baltschiädär vorbereitut. Und der isch de öi schnäll ämal agstandu. Abgseh danufa, dass där Samy du Üsdruck schnällär mit lütär värwägslut het (was die Trompete abär sehr chalant hent gwisst z ubärspielu) und är dadärfir äs laaangs laangs Chofschittlu vam Musikus gärntut het, isch doch der Üftritt hiä wiedär eine gsi, wa schi durchüs het därfu la gseh. So güät, daswär wiedär ämal im Instrumäntudepot nur vär isch sälbär än Zugabe gigä hei bevor das mim Zigizägi öi der Üftritt zumene Abschluss isch cho. Die wa vam Gätsch immär nu nit gnüäg hent värcho, hent schich im Wissu drum, dass ja de d Instrumänt scho äswiä heim chäment heimlich nach Brig davongschlichu. D Schlauu va isch hent abär gwisst, die eiguntlich Party geit hiä mit de Ballianos witär und schich wiedär ämi ani Bar bigä. Und d Schlauu hent öi Rächt ka. Will bis ämorgu am dri sind de doch nu einigi Litär an Griänum, Biär und andrum Ungsundu gflossu, bevor daswär nisch doch scho rächt agschlagu und, nit unbedingt nur wägu där Schmichki ,gizeichnut zum Bus hei bigä. Wer jetz deicht, där Abu sigi de Gschicht gsi, der irrt teilweise. Klar, ich glöibu z Xandi und där Diego iäbend vär än Marathon, was sind di mittlärwil mit Liächtgschwindigkeit üsum Bus üssa und deheimu im Bett sind isch unfassbar, nit so abär där richtigi hert Chäro. Zur Feier des Tages het där Musikus nu z Chälli üfgschlossu (Natirli ersch, nahdem wa wär die ganzu mitgschleipftu Istrumänt und värgässnu Obärteil im provisorischu Depot värsorgt hei ka). So hei wär de also nu där Abu, zämu mit halb Mittelerde (Frodo, Oark’s und Konsorte), wa wär unnärwägs nu üfgläsu hei, mitumene Glasji feinum Petit Arvine va z Salzgäbisch üs la klingu. Obs dara liegt, will wär dum Publikum du furchtbar Ablick welle ärspare, odär ob wär eifach du Üslesär vam Fotoapparat nimme gfundu hei zum z letschtusch Foto z machu, leh wär ämal im Rüüm la stah. Uf alli Fäll wiedär än sehr ärfolgriche Abu. 

Wiä daswär am Giggelizischtag am Abschluss nu zu däre neue Marschkomposition si cho, warum das d MLP där Vorabu immär nu ine Chnoche gspirt het, wiso das z Chälli scho wiedär isch offu gsi, ob wär du TNT ohni eis Mal z iäbu doch nu gspielt hei und warum där Abschluss am Giggelizischtag nit wirklich där Abschluss va där diesjährigu Fasnacht isch gsi, magi hittu zu der nachtschlafundu Zit nimme z protokolliäru. Abär gäru wirdi moru witär drubär brichtu und ja Janine, ich weiss das d Fotos scho längstens uf där Homepage üfgschaltu sind :-)

Bis moru, odär abär allärspetestens am Samstag

Ewe Webmaster.

Solothurn, 13. Februar 2013 (viel z spaat ämabu)

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Äs driifachs Schwiiischwanz ...

Bitterchalt is gsi, genauso wiä vor dri Jahr, wewär z letscht Mal z Gast bi de Serenas in Unnärbäch si gsi. Ob das Fäscht de tatsächlich öi so supär wird si wiä äbu das ärwähnti vor dri Jahr hani am viärtil ab 6i z Raro ufum Bähnli nu nit chännu säge. Scho ehnär hani festgestllt, dass scho um dischi früähi Ührzit där eint odär annär Chnätschär ä biz z teif ini Biärfläscha glüägt het. Än güäti Üsgangslag also vär di kommundu Stunde ine Schattubärga. Scho churz nach där Akunft hei wär de öi scho alli, dadärmit meini öi d Letschtu, z erschtusch Biär ine Händ ka. Brücht mu ja öi, fär z Znacht va de Serenas äbrispiälu. Vorawäg, güäti 3.5 Närruchochleffla hent d Serenas vär irusch Älplärmaggarone värdiänt. Abzig hets einzig und ällei darfär gigä, das Salz und Pfäffär gänzlich gfehlt het und leidär, leidär ke feini chnusprigi Zibilustuckjini het därzüä giäg. Darfär abär Apfelkompott, wasi öi nit ha chännu värstah, da ich grundsätzlich än Abneigig gägu warmi Fricht imene Höiptgang hegu. Das die Fricht de nu püriärt sind, git dum ganzu gad nu du Räscht. Darfär hani de doch 2 Chochleffla miässu värsänku. Alles in allum abär, ich will jetz nit üsschweifund wärdu, äs güäts Ärgäbnis und doch relativ z friedustellund, im Värglich zu andrä, na ja, schi sägent mu Mahlzite. Där Umstand dasi där ganz Tag vorär nu gar nix gässu ha, leh wiär hiä mal vorwäg und betrachte die Bewärtig als ubärüs grächtfertigt. Abär d Serenas sind ja nit wägum Ässu bekannt, eingentlich isch gar kei Guggumüsig im Obärwallis mines Wissens vär z Ässu bekannt, sind schi doch vielmeh die Guggumüsig, wa vär gnadulosi Töifine va irusch Neumitgliedär berühmt berüchtigt isch. Wer än Serenas will si, het sus nit liächt und sellti schi bessär ubärleggu, wiäviel Jahr dasär will aktiv Fasnächtlu, will nach settige Töifine darfsch nit eifach äs Jahr spetär wiedär Üsträttu. Die Strapaze lasch ja nit eifach so vär nix ubär dich la ärga. Das arum Manji tüät mär hittu nu leid. Bevor dass abär äbu die berühmt berüchtigt Töifi stattgfundu het, hent schich die Guggumüsige vor dum Bähnli värsammlut, vär än churze Umzug där Dorfbevölkrig z presäntiäru. Öi hiä äs Komplimänt an d Unnärbächnär. So vieli Lit bi so chalte Temperature und ärere Wittrig wiä churz vor dum Wältunnärgang, hani de also nu niä gseh. Obwohl, isch mu ine Schattubärga eiguntlich eppis annärs giwohnt? Hä nu, wiär va där Sunnusita hei nisch uf allufäll äs rassigs Stuck vär dum Umzug üsgsüächt, so daswär nachär schnäll wiedär ämi in d Wermi chäme. Bevor daswär ischu Zehwe de abär tatsächlich wiedär hei chännu üfwermu, hei wär nu ufum Vorplatz va där Turnhalla äbu nu die wunderbari Töif vam neustu Mitglied va de Serenas chännu beobachtu und nit ohni Schadufreid hei wär dem armu Opfär de öi tatchräftig applaudiärt. So hedär schich doch bi Temperature jenseits von Gut und Böse bis uf d Unnerhose miässu abziäh und nachär inäre undefiniärbaru Brühe üs Wassär, Dräck, sichärlich Chees (är isch ja Cheesär va Brüäf) und andre unmänschlichu Züätate la ziä, vär nachär halbnackt ubär du Schnee z rutschu und schnüärrstracks z värschwindu. Hoffuntli äswa ine warmi Dusch. Ja ja, die Serenas, zersch bisch afa 3 Jahr z Poulet und müäsch än dämliche Lehrlings-L ufum Kostüm trägu und wennt de z Gfühl hesch du kehres äntlich därzüä, gäbensch där mit där Töifu nu gad du Räscht. Was si wiär in dem Momänt alli froh gsi, kehre wiär zu de Chnätschär, wa di grescht Härüsfordrig isch, die Tonleitra üssuwändig chännu z spielu und dum Sämy die Paukuschlegra z recku, währund dem dasdär scho wiedär äs Liädji mit Y müäsch üsdeichu. So hent schich de die Chnätschära nach dem Ablick des Grauens scho gar nimme sooo chalt gfühlt und schich üfgmacht, du Abu inär Fäschthalla und im Barli z gniässu und schich uf du Üftritt vorzbereitu. Ich vär mine Teil ha trotzdem nu äs Tee gibrücht und mich mit där MLP ins Restaurant davongschlichu. Üs einum Tee sind de viär (Mörder)tee und zwei Stange wordu (abär äbu planu darfsch ja inär Fasnacht nix) und än Abu vollär Ärkänntnissi. So hani an dem Abu neidlos miässu züägä, das äs halt än Bart und än Bart git und nur will äs paar Haarlini spriessent müäss das nit unbedingt als Bart bezeichnut wärdu. Was vär än Tritt inu Arsch. Witär, vär alli Botanikär und Lit ohni griäne Tümo hani glehrt, dass Orchidee gfärbt sind und z zweitusch  mal immär wiess bliähent (Warum das das Thema isch agschlagu wordu äntbehrt jeglichär Värnunft). Abär jetz weissi wenigstens, chemi mär die Mimöslini de ändlich ämal äs zweits Mal, dass wensch wiess sind, sindsch nit zwangslöifig kaputt. Abär öi dadärzüä het där Tschabumurri äs Hüsrezäpt ka, nur eis einzigs Eiärschali Wassär pro Wucha. Mit der Ärkänntnis wirdi moru gad äs neus Experimänt afa. Abär darmit nu nit gnüäg. Än sälbschtärnännte Neurologe (obär wirklich eine isch wagi lüt där Üfmachig wanär an dem Abu ka het schwer bizwieflu) het mär jedufalls zum Abschluss va der Ärkänntnisstund das ultimativi Rezäptg gägu Nahtag prisgigä. So siges z allärbesta, wemu nu vor dum Üsgang, allärspetestens abär bevor dasmu ins Bett geit, än Brausetabletta Magnesium mit Wassär nähme. Das si genau das, wa z Hirni bi (z) viel Alkoholkonsum brüche. Nit das ich das je netig hetti, abär eifach dasärs jetz öi wisset. Abär ich bittu che um eis – und – där Gottswillu värgässet das nit!!! Än Brausetabletta müäss vor dum Schlicku in Wassär üfglest wärdu. Ich chas eifach nit gnüäg säge, nämet nit eifach nur die Brausetabletta und schlicket scha ganzi. Die Ärfahrig wellti dum ergschtu Feind nit gönnu. (Natirlich weiss ich das nur vom Hörensagen, doof bini ja nit). Mit der Züäfärsicht und Üssicht uf än Nahtag ohni Nahtag (zu der Zit hani värdammt numal nit gwisst, das Magnesiumtablette in z Leiggisch Hüsapothek nit vorhandu sind, leidär) het schich öi där alt und där neu Präsi püntlich vär du Üftritt am halbi zwelfi im Instrumäntudepot igfundu, wemu dem de so darf säge. Bereit, öi hittu wiedär ischärs Beschta z gä, hei wär die bittärchaltu Instrumänt zersch mal miässu änttauu, bevor das de schnüärrstrackt mit dum Viärliviär ab uf die Bühna isch gigangu, wa übrigens genau d richtig Gressi vär ischi Guggumüsig het ka. Där Stand up, wiä immär sensationell und uf alli Fäll bessär als die Gruppa wanu gad churz vorär, unnär där ungläiblichu Äntrüstig va jedum Chnätschär, vorna gspielt het. Därnah där Voulez-vous, gfolgt vam Wälschu (glöibi mi nu z ärinnru) nachär abär ganz sichär du Twist, ohni Unnärbruch mim Rammler witär, und schlussändlich mit där Schlampa die Bühna värlah, wawär de vorna unnär Schneegestöber nu mitänand hei fertig gspielt, bevor dasswär de da nu äs letschts Stuck, chännti abär nimme säge wells, agstimmt hei (mmmmmmhhhh) ja hittu brüchi de apa än Magnesiumbrausetabletta (mit Wassär)!!! Nach dum Üftritt isch bekanntlich vor dum Üftritt, abär an das het in dem Momänt niämmär gideicht. Langsam abär sichär is ans Igmachta gigangu. D Fraktion Visp het schich de va isch värabschiedut und d Fraktion Schwischwänz het schi an d negsch Bar begä. Nur där Dulli het än kühle Chopf bewahrt und schich därzüä äntschiedu, mines Wissens müättärseeluäleinzig, d Chance vam halbi 3 Bähnli Richtig Raron z ärgriffu, was im Nachhinein, so müässi säge, wohl kei so schlächti Idee weri gsi. Ja nu, äs Mörderteeli hiä, äs arregungs Gsprächji da, zersch Klangkarusell inär Bar nachär Klangkarusell inär Fäschthalla und scho isch ämorgu am Viäri gsi, wa die värbliebundu Chnätschära so ziemlich uf värlorunum Posto älleinzig inär Turnhalla gstandu sind. Hertär als hert geits also de definitiv nimme und so isch vär eis Mal z Hert-Chäru-Foto scho währund dum Fäscht änstandu.

 

Tja, the winner takes it all hei wär nisch gideicht und die Petra und ich sogar nu fehlärlos mitgigröllt (beste Dank Petra, jederzeit wieder), bevor das d Serenas öi du letschtusch Chnätschär üs där Halla buxiärt hent ka (Beschi Zunge behöptent will zwei Chnätschär mit irusch furchtbaru, markärschüttrunde Stimme d Apokalypse härgriäft hent. Wiä gseit merci Petra, jederzeit wieder). Aus der Halle aus dem Sinn het schich z Xandi wohl gideicht und d’Meglichkeit du Blinde z näh ärgriffu und mich gad Gottseidank mitzscherckt. Där Räscht vam Abu isch mär so voränthaltu gibliebu. Miär aber total egal, mis Bett ämorgu im füfi het üsgseh wiä äs Paradies inära andru Galaxie odär z Schlaraffuland mit Wassärfäll üs Sirup und Wolke üs Zuckärwatta, wa Gummibärli ane Beim wagsent und d Spitze va de Schoggolabärga mit Pddärzuckär bedeckt sind. Viellie hets öi dara glägu, dasi kaputt und durchgroffu nachäre halb Stund värgäblichär Süäch nachere Magnesiumbrausetabletta mi eifach ha la uf d Matratz kiju und ich wagu mi z ärinnru dasi nu bevori mit dum ganzu Körper ufer Matratz glägu bi, scho igschlaffu bi gsi. Ja gits de eppis herrlichärs? 

Z mindest herrlichär wa där kommundi Morgu is uf all Fäll gsi. Wani de am Sunntag ämorgu nämlich im halbi zwelfi mine allärliäbscht Brüäder, sit neustum V-Üsschnittträger gweckt ha, het är z Gfühl ka, är chänne jetz ämal äs Fäscht üslah und ich, warum tüän ich miär das in minum Eltär eiguntlich nu anna. Abär wiär weri, wiä iär alli andru öi, nit Porretschchnätschär, hetti wär nisch nit üfgrafft und am eis in Sustu zum grossu Umzug besammlut. Stünung darubär was vär Mortzkärlini doch das Raouli und d Janine sind, hentsch doch sit gestär keis Öig meh züägmacht hei wär uf du Üftritt gwartu. Doch wie Bilder trügen können hent nisch die beidu Vorärwähntu grad churzdruff demonstriärt. Hent schi doch grad sälbär gwisst z brichtu, dass d Janine in Fötusstellig vollär Äntsetzu festgstellt het dasch inär Zit zrug gschlaffu het und öi z Raouli tatsächlich nit där ganz Abu Mörderteetrichund uf där Gass isch gsi. Tatsächlich, so het mär mine chlei Fingär gseit, isch där Raoul ämorgu in schinum eigunu Gästezimmär ärwacht und öi z Schwestärhärz het irusch Bett der Abu nimme gfundu. Immärhin, und das rächne wär ne gross anna, hensch du värloru Sohn wiedär gfundu. Was hei wär vär än Freid ka, het z Pädi isch am grossu Umzug z Leigg-Suschtu beehrt. Äso Freid, das wär ihm sogar gad die Pauke zum Fäscht gitreit hei. Ob är die Wärtschätzig allärdings goutiärt het värmagi z bezwieflu, hetti doch är värmüätlich liäbär mim Bäsu wiä z Vorjahr, als Major die Porretschchnätschär agfiährt. D rundi eis vam grossu Umzug hei wär mit dum Ändlosu und där Schlampa durchgfiärt. Ischi Madame la Presidence het schich de nam Umzug wohl gideicht hiä in dem Schattuloch bliebu ich nit länger und churzärhand du Üftritt wawär da nu ka hetti „ubärseh“. Womit wär öi gad där Grund hetti, warum das die Porretschchnätschär als allärerschti Guggumüssig gfühlti Stunde vor dum Räscht z Müürli bi där Leiggärburg in Bigschlag gnu und die chaltu, abär wemu ganz still isch gsi, doch wermundu Sunnustrahle gignossu hent. Värgällts gott Präsi:-) Na dem wa de die ganzu Goofe im Chindärhort Diegi sind deponiärti gsi hei wär de also gnüäg Zit ka, zum mimene Biär und ämene Sandwich du värganguni Abu ine noch värbliebunde Details z reüssiäru. Nach zirka 500 Fotos, meh als d Hälfti därva äntwädär vam Diegi odär vam Samy und ämene perfektu Bild vär Valais Tourismus (Die Christa Riggozzi mit irusch Giovanni cha langsam abär sichär ipacku) und äre rasantu Bobfahrt hei wär nisch de churz nach de viäre bereit gmacht vär du zweiti Teil va dem Umzug durch die Burgschaft Leigg äbrüf uf du Höiptplatz. Bevor daswär de hiä zum Abschluss va dem wunderschönu Sunntag, negsch Jahr chäme wär ja ganz sichär öi wiedär, Petition odär Abwahl hin odär här :-), nu äs chleis Platzkonzärt hei gigä, hent die letschtu Biär und warum Wiina va dem Fasnachtsweekend uf d Läbra gschlagu. Zit und Grund gnüäg, öi hiä numal Närruchochleffla z värteilu. Da bekanntlich schlächti Ärfahrige in Leigg het mine Stellvärträtär där Viktor die Bewärtig ubärnu. Da ich ja ich gibus züä äs ganz chleis Bitzji vorignummu bi, wenns um Leigg geit, het är die Üfgab ubärnu und mitumene doch rächt hertu Urteil gad ämal ei einzige Chochleffil värteilt. Schliässlich gäbes ja nur Bratwirscht das geit ja ubärhöipt nit. Nit ämal äs Plätzli. Abär Vicki, willt de du z Leigg wirlich je wiedär äs Plätzli ässu? Na ja, dass sind halt als nur persönlichi Ärfahrige gsi. Ich sälbär hami de nam Platzkonzärt schnüärstraks mit dum Xandi Richti heimwärts bigä, unglöiblich froh, müässi du Busdiänst nit in Aspruch näh. Z Detachemänt wiär singe de abär ganz sichär im Bus isch zu der Stund wiedär äso güät zwäg gsi, dasi die Fahrt nit hetti wellu mitärläbe. Abär das chunt därfa, wemu im dunklu Chällär Cocawisky süft und nachär am füfi värüss chunt und fasch ärblindet, wilmu dermassu ubärrascht isch, dass nu hell isch. Wie dem auch sei, ärfahrigsgmäss gahni jetz därfa üs, isch z Fäscht nach där Busfahrt wohl nu in Visp vär än Grossteil witärgangu. Hoffe wär nur, där Raoul hei mittlärwil gmärkt, dasär in schinum Deheimu öi in schinum Bett cha schlafu und d Janine nit wiedär Rückwärts inär Zit gipennt het. Such miässti die jetz numal älleinzig jede Üftritt va isch meistru. Z Sämy we immär nu in V-Üsschnitt unnärwäg und där Musikus würdi, üs welle unärfindlichu Grind öi immär, gad schis Klo fotografiärtu.

In diesem Sinne, schlafet güät, tanket Energie vär am Feistu Donnstag, wenns de richtig los geit. Somit zum Schluss, äs drifachs Schwiiischwanz uf die Porretschchnätschär SCHWIIISCHWANZ, SCHWIIISCHWANZ, SCHWIIISCHWANZ…

Merci
Ewe Webmaster.

Solothurn, 04. Februar 2013

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Die wundersame Reise des dullischen Oberteils

Das isch ja wiedär äs Weekend gsi sondergleichen. Leute, Leute, Leute, umsus mit de Worti va ischer Madame la Presidence z säge. Va Mördertee bis zum abwinku, ubär ca. 500 Värlustazeige uf Whats up bis hin zu zwei gnadulos wundärprächtigu Üftritta, hei wär doch wiedär Gschichte ärläbt wa sus värdiänt hent ine folgundu Zielä ärwähnt z’wärdu. Abär fe wär doch gad va vorna a. 

So het das, bei Leibe jedum nu lang in Ärinnrig bliebund Wuchunänd, am Fritag ämabu am halbi siebni z Stäg vor dum Restaurant Sport agfangu. So wit so güät und gehabt wiä immär, hent die Porretschchnätschär scho sehr schnäll z Weekend öi müsikalisch chännu äröffnu und du Umzug zum Fäschtgländ mit dum Ändlosu und där Schlampa unnärmalt. Natirli, wiä gäng zum Stäg, hei wärs nitämal bis zum Fäschtgländ gschafft, ohni ä churzi Pause izleggu (Abär der Umzug isch ja öi weiss Gott wiä länge). Nei das Jahr hei wär natirlich än güäte Grund ka, du Umzug churz vorum Ziel z unnärbrächu. Schliässlich het d Madame la Presidence, zämu mit dum First Husband, zär Audiänz gibätu und än wahrlich grandiose Staatsämpfang im präsidiälu Ballsaal inär Machtzentrala am Dammwäg zum Stäg kredenzt. Ja güät, där Ballsaal isch ä vollgstopfti Garage gsi und d Machtzentrala än hundsgwänliche Block wa sowiso gad ufum Wäg isch gsi. Abär nach scho güät 3 Biär und de bitterchaltu bis antarktischu Temperature gseht öi än Garage wa wenigstens du Wind abhet, nach dum Schlaraffuland üs. Hä nu, definitiv nit ubärtriebu chani mit de dargibotunu Spiess und Tränk, wa ischärs Presitäntupaar zwäg gmacht het. Va de Gitränki här het wohl jedes Mitglied schine Liäbling im Sortimänt gfundu (isch ja bi isch öi nit gad schwer, ändwäder äs Blonde 25 oder Wodka) und öi vär z lieblichi Wohl isch mit Chips, Salzstängeli und Wasabinusse vär jedum gsorgt gsi. Letschteri sind jedoch wenigär zum Gnuss, denn umsomeh zum Chräftemässu va de Porretschmännchen da gsi. Wer um himmelswillu chunt de scho uf d Idee, dass än Hampfletta Wasabinusse in einum Wurf ganzi z schlicku där Värdauuig förderlich chännti si. Wiä öi immär, demjenigu het uf ällufäll där Körper scho churz druf mitgiteilt, wer Herr ubär d Organ und du Schliässmuskil isch, so das di Wasabinusse, notabene immer nu ganzi, du Retourwäg ubär d Itrittspforta gfunnu hent. Sigs jetz ob dum  ubärmässigu Alkoholkonsum odär will där Wasabi z Sehsterchi massiv gitrübt het, sind vorgnännti Nusse uf allfäll nit wiä giplant im Grabu sondern vor dum Briäfchachto wieder zum Vorschin cho. Da ja abär där Blogschriebär bekanntlich immär alls weiss, oder alls irgendwenn z kehru värmag (wobie das där Wahrheitsghalt nit immär üsreichunt cha veriviziärt wärdu), chan är jetz öi z besagti Individuum äntlarvu. So eifach willi ches jetz abär nit machu. Där Wasabinussuspuckär het Unnärhose, passund zum Kostüm anna und där Musikus grift mu anschienund öi gäru mal uf du Arsch (Übrigens öi äs Mysterium wa nu müäss unnärsüächt wärdu). Wennär d Fotos alüäget wärdedär du Schuldige findu. Nu än chleine Tipp, äs isch äs Leiggi, abär das isch ja in ischär Guggumüsig fasch jede.

Abär zrug zum Wesentlichu. Z’ Apéro het schi nu dahingizogu, an dischär Stell äs härzlichs Dankeschön de edlu Spändär, bis de öi där letschtusch Tropfu va där 2 Litär Wodkafläscha schich mit Pfäffärminztee värmischt imene Magu vamene Chnätschär befundu het. Abär das müäss ja mit de Chnätschär nit zwangslöifig lang düüru. So hent schich di letschtu Griänu um die 10ne de doch öi nu uf dum Fäschtgländ igfundu, zum schich langsam abär sichär uf du Üftritt vorzbereitu, wa de am viärtil vor zwelfi ufum Programm isch gstandu. Äs paar Minüte spetär als giplant, eventuell öi darum will där Wasabinussupickär, jetz öi nu die Zit vam Üftritt het värgässu, warum är öi nu jetz, meh wa än Tag spetär nu än Schüäabdruck ufum Arsch het (liegt da appa d lesig im Rätsel warum das där Musikus schine Arsch strichlut?!), hent schich d Chnätschära uf där Bühna igsammlut und mit dum Stand up du Üftritt grandios iglittu. Där Räscht vam Repertoir, gäng wiä gäng, apa där Wälsche, d Schlampa, Voulez-vous und Schlüpfer, so genau chani mi äbu nimme ärgä, abär die hei wär widär mitäre Powär gspielt, das doch z Publikum hiä und da zudere Polonaise agsetzt het. Äs witärs Mal än solide Üftritt, Danke, - bitte. Anschliässund het schi de där witär Fäschtabu bi Biär und Wodka dahingizogu. Zit vär mich also, z kulinarischi Agibot va de Sanpanchos unnär d Lupa z näh. Dasmal bigleitut, va ischär Fotografin, zum öi ämal än zweiti Meinig izholu. Schliässlich soll die Värgab va de Närruchochleffla öi tatsächlich Hand und Füäss ha. Z ärwähnu dadärbi isch, dasi z offiziell Guggumüsigässu üsglah hat. Da hani ja scho vorhär gwisst, dass d Nudle värchocht und d Sauca undefiniärbar isch. D Värgab va Chochleffla, hettis de tatsächlich eine gigä, isch hiä also absolut unnetig gsi. So han ich dasmal mine Fokus uf d ordentlichi Fäschtchuchi gsetzt. Scho bim studiäru va där Menücharta hani abär miässu feststellu, dass öi zum Stäg kei grossi Spring gmacht wärdent. Plätzi und Bratwurst, wahlwies mit Pommes odär Brot sind zum Värzehr bereit gstandu. Z Testärduo het schich also vär Plätzli mit Pommes zär Degustation äntschiedu. Där erschti Dämpfär scho churz nach där Bstellig. Wädär Ketschup nu Mayo, sondern nur Sänf hets därzüä gigä. Wenn das nit scho mindestens zwei Närruchochleffla laht la värschwindu. Unnärwägs zum Tisch, apa ca. füf Metär hei wär scho va alle Site kehrt. Schrecklich, ungeniessbar und gäbet sus gschiedär zrug. Die Üsdrick sind sichärlich öi nit förderlich gsi, vär an unpartiischi Beurteilig. Leider, so müässi doch ohni mit där Wimpra z’zucku öi züägä, hent die Meinige voll ins Schwaza gitroffu. Z Plätzli, ganz offusichtlich Fleisch fünfter Klasse het regilrächt miässu seziärt wärdu, vär das de schluss am Änd apa gad än Kaffeeleffil därfa isch gniässbar gsi. Und öi die an Salzmangil liedundu Pommes hent die Blamage vam Fleisch nit värmägu güät z Machu. Abgseh därfa, daswär sofort än Platz gfundu hei (bi dem Agibot öi keis Wundär) und das z Bsteck was därzüä gigä het va einmaligär Qualität isch gsi, het das Ässu, wenn ubärhöipt und öi nur mit viel Gutwill, gad ämal ei mikrige Närruchochleffil värdiänt. Sälbschvärständlich, damit z Resultat öi ganz sichär objektiv isch, hei wär öi nu die Gourmets näbu und vor isch, nach iru Meinig gfregt. Abär öi das Ärgäbnis isch summasumarum eistimmig üsgfallu. Ei Närruchochleffil also, meh chäwer wirklich nit gä. Und der sellti ne nu gnu wärdu, als Schadunsärsatz vär die Büchchrämpf va minär Mitstritteri. Inär hoffnig, dass die Witäru Ässu ane andru fäscht nit öi so ein Reinfall sind, und vär d Räschte äbrizspiälu hei wär nisch schnüärstraks an d negsch Bar bigä (Die, soll öi ärwähnt wärdu, wiä immär am Sanpanchos 1A mit Sternchen), wawär de öi bis ämorgu am dri gibliebu si, bis de där Bus nisch sichär richtig heimwärts gfahru het. Die füf Minüte Värspetig nimmi übrigens uf mini Chappa. Und was heissets, wenn mal alli im Bus sind, A, B, C odär D!!! Z Abc-Liädji, mitlärwil ja scho än alte und trochune Zopf värchunt langsam abär sichär zudäre gfehrlichu Mischig va Aggressione und Schreichrämpf. Äs hetti nimme viel gfehlt, und zum Füäschabdruck ufum Arsch hetti schi nu äs Feilchen ufum linggu Öig därzüägsellt. Äs het einum Fasch die Träne in d Öigu gitribu und dum Musikus gar du Brächreiz inu Hals. So viel müsikalischi Tritta unnär die Gürtillinja het är nit bis uf Sängärma nit chännu üshaltu, warum där Carchauffeur än zwangslöifigi Pause het miässu ileggu. Ja nu, ändlich ändlich z Sängärma, hent schich wohl dri viärtil va de Chnätschära gideicht, sobald wa där Bus gstellt het. Ich ha nu nitämal mich vam Sitz üfkah, geschweige denn äs Wort chännu säge, isch scho kei Chnätschär meh umcha gsi. Wiä das Diegi schis Instrumänt äso schnäll üs dem ängu Bus het mägu ghiffu und auf und davon isch gsi äntbehrt schich jede physikalischu Gsetzi. So hets de tatsächlich, und das zum erschtu mal, äso sellu si, dass schich tatsächlich nur Leiggini als herte Chäru inär Garage hennt igfundu. Abär das letschtusch Biär leh wiär isch nit la näh. Güät, das öi nu äs Schmidji, wa doch öi ändlich ini Guggumüsig soll cho, abär nit uf z Foto und ärwähnt het wellu wärdu schich öi nu därzüä gsellt het, leh wär jetz hiä ämal üs. Nur nu soviel, leht doch bitte Sämy und besagtes Schmidji nit im Suff ina nu la äs Fondue machu. Abär das isch wiedär än ganz än andri Gschicht.

 

Küm am Samstag d Öigu üfgschlagu is de öi scho wiedär witärgigangu. Unglöiblich was so alls cha värloru und värgässu wordu si. Va dutzunde Obärteili, bis zäre Trompeta, äre Läderjacka und där Carina isch so ziemlich alles uf där Strecki gliblibu. Obwohl letschtäri het ja där Sebi mit Heim gnu (was so äs Koma alls cha üsmachu). Där Porretschchat isch uf all Fäll ubärhitzte gsi. Nur so viel, alls isch wiedär üfgitöicht und ärwähnungswärt isch wohl lediglich die wundersami Reis va z Dullisch Obärteil. Ich gebi eppis därfir, wenn äs chännti redu und nisch värzellu wiäs uf Umwäga ubär z Guggumüsiglokal va de Suschtner und ämene Abstächär in Facebook doch schlussamänd wiedär an z Dullisch Obärkörpär isch gsi. Die Details wärde wär wohl niä ärfahru. Sigs drum, äs hent schi ämil alli am Samstag wiedär in Leigg igfundu, zum mit de Schnägguschränzär irusch Fasnacht z fiiru. Ja und de hetti wär doch nu gad än Richtigstellig z värmäldu. Sälbschtvärständlich isch miär biwusst wiämu du Namo Roul ä äbu nit ich meinu Raoul schriebt. Ja, iär wärdets küm glöibu, abär öi ich bi nit unfehlbar. Ich gibu mär all Miäh dass das nimme passiärt:-) Nach dem wiä immär, sehr steilu abär doch churzu Umzug hent di Porretschchnätschär än langi Wartezit vor schich ka. Där Üftritt vär eis mal wiedär sehr spaat am eis ämorgu als letschti Guggumüsig. Grund gnüäg vär die Presidäntin äs paar mahnundi Worti an d Chnätschära z richtu. Genau bis am Elfi (so darf ich zitiäru) hei wär chännu Gas gä wiä wär hei wellu und nisch de zwei Stunde gad äs bitzji zämu näh. Abär zu dene präsidiälu Worti spetär meh. Ich vär mine Teil ha die langi Wartezit mitämene feinu Nachtässu wellu ubärbriggu. Iär ratet richtig, ich ha di Kantina nit in Aspruch gnu und stattdessu än güäti Pizza im Restaurant zu miär gnu. Liäbi Leiggär, ewärs Fäscht in alle Ehru, abär mit ew Ässu, dasi hani z letsch Jahr z letschtusch mal gmacht. Drum vär eis mal kei Värgab va Närruchochleffla. Äs tüät mär leid, abär ich ha mi wirklich nit därzüä chännu durchringu. Äsoviel isch abär gseit, anschienund is doch nit so ibil, wiä ich gäng bhöiptu. Güät gstercht, ohni Maguchrämpf odär annärwitige körperliche Beschwärde han öi ich mich de spitz vor de Elfe wiedär bi de Chnätschär inär Turnhalla befundu. Leidär leidär hets mär nimme glängt, vor där Deadline nu äs Biär ga z bstellu und so hani, alls wahrhaft där MLP unnärgäbunds Mitglied alli gfregt, ob jemand äs Coca welle. Und siehe da, wer chunt und bstellt schich nu äs Biär??? D Regiärig höchstpärsönlich, 3 Minüte nach de Elfe. Heieieieieiiii. Gäru tüäni abär ubär den Faupax grosszügig drubär äwäglüäge. Schliässlich isch in dem Momänt gad z ultimativ Chnätschärliäd, där Wannabe gluffu und so han öi ich miär nu ohni schlächts Gwissu därfu äs Biär gönnu. So hei wär nisch wohl alli mit einum Drink z viel intus, was bi de Porretschchnätschär abär nit zwangslöifig negativi Üswirkige het, am 10 vor eis vor där Bühna befundu und verheissigsvoll nisch uf du Üftritt vorbereitut. Währunddem schich de alli igiblasu hent, het z Xandi z tanzu uf där Bühna bis zär letschtu Sekunda gignossu. Abär där Xandi we nit där Xandi, wenn nit öi är scho vorbireitut weri. So het är schis Instrumänt nämlich värmüätlich scho zwei Stund vorär uf die Bühna gstellt, dasär schich den nach dum Tanzbei schwingu gad diräkt an du Stand up cha wagu. Mit dem hei wär nämlich öi an dem Tag als letschti Guggumüsig die Bsüächär uf isch üfmärksam gmacht. Im Wissu, daswär fär eis mal d letschtu si, hei wär die Bürda uf isch gnu und ei Song nach dum andru dum Publikum um d Ohre gschmissu. Öi der Üftritt, wiä eiguntlich immär hiä z Leigg, isch, ich tüä sichär nit ubärtriebu weni säge, grandios gsi und so si wiär sichär öi negsch Jahr wiedär gärn gsehni Gäscht. Hetti nisch z Publikum nu bis ins Instrumäntudepot begleitut, hettisch nu viel meh uf d Ohre värcho, hei wär doch da nu du Twist, där Ständär und halbäwägs du Surfer vär isch sälbär zum Bestu gigä. Danke vielmal ew Chnätschärinne und Chnätschär vär das wiedärum sehr schön Ärläbnis. So hei wär de tatsächlich nach dem värlängrutu Üftritt im Depot nimme wirklich lang därzit ka, bis där Alain mit schinum komfortablu Reisebus (Ich freuu mi ja scho uf d Fahrt uf Wädenswil, wan ich, gäll Raoul ich, hinnärna links inär Egga wärdu hocke) parat isch gstandu vär d Heimfahrt. Meh odär wenigär alli zämu rächt güät zwäg isch di Fahrt doch eini vär ini Gschichtsbiächär gsi. Där Raoul zum Bispiel het doch tatsächlich die Pforta zur unbekannten Dimension gfundu währunddem där Musikus wiedärum zär Ärkänntnis isch cho, das öi Profisportlär hin und wiedär währund där Prässekonferänz miässent ufume Holzschraggu hocke. Nur eis, und darum än Fahrt vär die Gschichtsbiächär, het das mal gfehlt. Värmüätlich, vär das z Steffi nit wiedär z Innärsta müäss nach Üssina cheru het där Raoul uf z ABC-Liädji värzichtut. Genau an dem Tag, wa die Petra und ich topmotiviärt und so güät vorbireitut, alls obwär bi DSDS wellti mitmachu uf du Büächstabu I gwartet hei. Nei was hei wiär där ganz Tag Text üssuwändig glehrt und erschti und zweiti Stimmi mitänandär abgstimmt. Där ganz Abu, vär eis mal, nisch scho gfreut uf das Spiel nachär, wewär wirklich alles piccobello parat und intus hetti ka. Und de lehntsch sus eifach üs. So eppis. Abär äbu, bi de Porretschchnätschär, trotz odär äbu gad darum will vieles scho Tradition het, isch jedes Fäscht öi immär wiedär ubärraschund und sensationell. Nur eine het va alledem nix abär wirlich rein gar nix meh mitvärcho. Ich glöibu dum Dulli hetti mu ohni Problem än drifache Bypass chännu setzu ohni äs Läbunszeichu miässu z ärwarte. Där Dulli het soooo tiäf und fescht gschlafu, das dum eintu odär andru z Raro scho fasch isch die Panik inz Gsicht gschriebu gsi, will nu z Diegi wirklich vasch nimme het mägu wecku. D Janine het in Gedanke scho d Vorbereitige vär d erscht Hilf und CPR durchgspielt. Abär är weilt nach wie vor unter uns und het hoffuntlich der churzi Heimwäg ubärstandu ohni wiedär inz Koma z kiju. So het schich schliässlich ohni zwangslöifigi Zwischpause där Bus ze viäre wiedär z Sängärma igfundu. Und än gottseidank wiedär representative herte Chäro het schi bimene letschtu Biär nachämene wunderbaru, ubärüs lustigu Fasnachstsweekend langsam und stetig där Wuchunänddepression ubärgä.

 

Ob d Fahrt uf Sängärma in Züäkunft ohni Zwischuhalt möglich isch, schich Obärteilini wiedär sälbständig machent und ob där Sämy tatsächlich an z negsch Fäscht än Sugussack mitnimmt värmag dische Blog in güät einär Wucha wiedär z brichtu. Bis dahin wünschi ew alle än flotti Wucha und güäti Ärholig. Und alls chleine Tipp vär denu wa z negsch mal wiedär eppis värliärt, anstatt än bigränzti Mänschumängi ubär Whats up z’ärreichu isch vielliecht gschiedär iär süächet ewu Värluschtgäguständ in Ton und Farb ubär än regionale TV Kanal (Das än chleine Insider zum Schluss)

Ewe Webmaster.

Solothurn, 27. Januar 2013 (totkaputt)

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Und scho wiedär än Posüna weniger:-(

Nachdem wawär vor zwei Wuche där bärgüf uf Üssärbärg gluffu si, vär z musiziäru, si wär das Wuchunänd bärgab gluffu vär Raron mit ischär Müsig z begeischtru. D Mesireccas het nämlich öi das Jahr zu irusch Fasnachtsfäscht igladu. Am halbi achti isch also där Umzug ufum Programm gstandu. Ärstünlich vieli Züäschauer hent z Debüt vam Sebi als Musikus i.V. därfu/miässu ärläbe. Där eint odär annär Patzär isch da scho därbi gsi, vor allum bim Izellu va de Ubärgäng siwär nit gad immär alli glichär Meinig gsi, gäll Xandi :-). Trotzdem hets alles in allum rächt güät funktioniert und wiär si scho churz druf inär Fäschthalla gsi zum mimene erschtu Biär du Abu z startu.  Gottlob hets dum Musikus de aber doch öi nu glängt, so das är de z Bühnuprogramm wiedär het chännu asäge. Nit z Ubärhöru, wer z müsikalisch Zepter inär Hand het, will uf där Bühna het ä jede Ubärgang piccobello funktioniärt. Egal ob där Wälsche, där Leila, där Voulez-vous odär där Schlüpfer, ufer Bühna hets grockt. Und öi bim Abgang va där Bühna het där Musikus gad nu demonstriärt, wiämu d Schlampa richtig dirigiärt. Der solidi Üftritt isch z Ziggizäggi vam Roaul allemal wärt gsi. Tatsächlich hets de  scho im halbi Zähni gheissu, jetzt chänedär Gas gä. Kei Värpflichtige meh vor isch, siwär ab ani Bar und hei nisch nimme la gstellu. So hani de öi bald ämal Zit ka, vär minu Studie ane Fasnachtsässu wiedär üfznäh. Positiv z ärwähnu isch sichärlich d Üswahl wa alli Guggumüsige hent chännu träffu. Äs het nit lediglich eis Menü gigä, sondern wiär hei zwischu Bratwurst und Schnitziltäscha därfu üsläsu. Än Minuspunkt, dass keis vegetarischus Menü zär Üswahl isch gsi, nit dasi das de gnu hetti. Vär mine Teil hani mi vär d Schnitziltäscha mit Cocktailsauca äntschiedu, trotz de schlächtu Ärfahrige mit Fasnachtsplätzli. Äs sehr feins Brotji, solidi Cocktailsauca. Leidär isch z Plätzli ungefähr drimal so chlei gsi wiä z Brot. Abär vär du Magu z fillu und uf witäri Alkoholmängine vorzbereitu hets allemal glängt. Ich värteilu unparteiischi 3 va 5 Närruchochleffla und freuu mi scho uf z Ässu am Sampanchos in Stäg. 

Nach der chleinu Sterchig is de inär Cubabar witärgangu mim Fäscht. So ziemlich alli Chnätschära hent sich naht is nah hiä värsammlut, wohl nur wägum Mördärtee und Tequilla Bum Bum, danufa cha che d Janine hittu wahrschienlich äs Gschichtji värzellu :-) So han ich de nach äs paar witäre Biär am halbi zwei mal du Absprung gwagt und mi uf än lange Heimwäg vorbereitut. Leidär leidär, het mis Instrumänt denu Wäg nit wellu uf schich näh und scho vorgängig du Blinde gnu. Wan ich nämli bi ins Instrumäntudepot cho, isch va där Griselda (die Zweite) kei Spur gsi. Ä witäri Bestätigung darfär das z Universum das Jahr wohl z Posünuregistär üs irgend ämene Grund will strafu. Nachdem wa z Steffi schini Posüna ja scho zwei Wuche vorär gschrottut het, het jetz mini Griselda du Wäg heim nimme gfundu. Und trotz intensive Bemüähige in alli Richtge isch schi bis zum aktuellu Zitpunkt nu nit üfgitöicht. Darum hiä nu än Värmisstmäldig.

Die Guggenmusik Porretschchnätschär bittet um Ihre Mithilfe. Vermisst wird seit dem 19. Januar 2013 Griselda, die Zweite. Griselda wurde zuletzt an genanntem Datum um ca. 21.30 Uhr in verwahrlostem Zustand in Raron gesichtet. Die Vermisste ist 1 Meter gross, goldgelb und trug zuletzt keine Kleidung. Seit einem kleinen Unfall trägt die Vermisste eine mittelgrosse Narbe an Ihrem Zug, welche den wundervollen Klang ihrer Stimme aber nicht zu vermindern vermag. Hinweise über den Verbleib von Griselda sind an den Vorstand der Porretschchnätschär St. German oder an jede andere Guggenmusikvorstandsbehörde zu richten. Wir danken für Ihre Aufmerksamkeit. 

In dem Sinn värbringu ich jetz än lieslige Wucha in stiller Trauer, hoffu, z Griseldi töiche doch nu üf und bringu dum Läxi schini Posüna ganz sichär ganzi zrug. Bis am Fritga am Sanpanchos.

Ewe Webmaster.

P.S. Und das saguhafti Missvärständnis williche uf kei Fall voränthaltu:

(Cubabar, laute Musik, viele Leute und zwei mehr oder weniger stark Betrunkene am diskutieren) Person 1: "so, ich ga de appa mal." Person 2: "Ja nei, das chasch jetz nit machu, du chasch do bi miär liggu, so än hibsch Burscht" Das hat zumindest Person 1 verstanden und gibt darauf hin zurück: "Oh danke, du bisch de abär öi ganz än Hibschi!" Mit unverständlichem Blick schaut Person 2, Person 1 an und fragt: "Häää?". Daraufhin Person 1: "Ja merci vär z Komplimänt, so än hibsche Burscht, das hani doch nur wellu zrug gä und säge du gsegisch öi güät üs." Person 2. unter Lachkrämpfen leidend antwortet:

"Ich ha gseit, ich hei äs hibschus Couch!!!"

Bis bald und bitte immer gut zuhören:-)

Solothurn, 21. Januar 2013

Nüchtern betrachtet ...

Liäbi Chnätschärinne und Chätschära

Jetz hetsch doch äntlich richtig agfangu d Fasnacht. Nur nu es einzigs Wuchunänd hei wär jetz frie und nachär siwär jedes Weekend, bis wiet inu Februar, mit de Porretschchnätschär unnärwägs. Där Üftakt zär Höiptsaison hei wär das Jahr z Gast bi ische Nachbüüru de Grabatzuchlepfär in Üssärbärg ka. Da schi irusch 10 jährig Jubliäum gfierut hent und wohl öi vär schee viel Gäld mit Gitränkt z värdiänu :-) hent schi isch scho am Namittag im 3 ufum Dorfplatz in Üssärbärg begriässt. Scho churz druf hent di Porretschchnätschär äs erscht chleis Konzärt uf dum Dorfplatz präsentiärt. Immär zär glich Zit agfangu und zämu öi wiedär üfghert und du Tiger so güät gspielt wiä nu niä vorär ine Iäbige, het der güät Üftritt scho uf meh la hoffu. Im Aschluss an denu müsikalisch Üftakt hei wär öi ischu Kehle igwermut und mit einum odär zwei Schnapskaffee zämu agstossu. Ische Musikus isch so va schine Müsikär ubärzügt gsi, dasärs gwagt het, scho zu der früähu Stund gad 3 Schnapskaffee und nu äs paar Biärlini izleschu, hedär doch gwisst, dass schich di ganzu Iäbige glohnt hent, und schinu Müsiker öi leicht angeschwipst ämabu nu äs güäts Konzärt chännent gä. Das, odär är het schi scho früähzitig wellu wägtüä, dasär kei Katastropha müäss ärläbu:-) Gottlob isch de abär doch ersteres där Fall gsi, dadärzüä abär spetär meh.

Pünktlich am sägschi (äso dawär ja nit d Chirchgängär stere) het de d Fäschthalla di Porte üfgmacht und öi die Porretschchnätschär hent schich naht is nah zum Ässu bigä. Immär nu in einär Schwärmäri vär d Mätzgisossa va Turtma, wani ja, wiänär wisset wennär regelmässig du Blog läset, värgäblich ha värsüächt unüffällig z äntwändu, han ich miär vor gnu, dischi Saison d Ässu va de Fäschti nechär unnär d Lupa z näh. Und ich müäss säge, die Grabatzuchlepfär hent das rächt güät gmacht. Im Menü das Mal än griäne Salat mit Frenchdressing, Hörnli bolognese und än vorgschnittni Schnitta Brot. Als kulinarische Sonderfall, iär ärinnret che ja immär gäru an die Plätzli mit Fettischliss und die anschliässundi Busfahrt va Leigg zrug uf Sängärma, darf ich als Feinschmäckär säge, isch das Menü eppis vär alli gsi. Eifach abär sehr güät. D Hörnli zär abwägslig mal ufu Punkt kocht und d Sossa därzüä würzig abär doch ä biz z wenig scharf. Die Portion, in Anbetracht daswär doch hei wellu Bodu vär du Alkohol schaffu, gib ich dischum Fasnachtsmenü 3 va 5 Närruchochleffla. Där Umstand, dasmu ja nu  gägu äs Äntgäld Plätzli mit Pommes hetti chännu ga ässu lahni nit la gältu. Plätzli in Fasnachtsfäschti chunnt äbu mehrheitlich nit so güät:-) Abär gnüäg zum Ässu. Churz ärwähnt soll eifach nu si, dass wohl am Präsi und Musikus Apéro wohl ganz spezielli Delikatesse sind serviärt wordu. Ischi Madame la President (übrigens sit Neustum im Bsitz vanere Arbeitsuniform) und där Musikus sind ämil meh wa zwei Stund bi dem Apéro värwilut. Derwil hei wiär gwänlichu Mitgliedär d Vorzig va Schnaps und Biär uf isch la wirku, biswär de äntli gwisst hei, daswär doch scho am Nini uf die Bühna därfe ga spielu. So hei wär nisch de zu der früähu Zit, waschi, in Anbetracht daswär ja bereits sit de drije am Namittag da si gsi, agfühlt het, als ob wär am zwei ämorgu du Üfttitt hei, uf där Bühna igfundu und, das darfi also riähwig und ohni schlächts Gwissu säge, äs supär Konzärt dargizöibrut. D` Schlampa hei wär de vor dum Instrumätudepot nu gebührend värabschiedut und nachär scho mit dum Gscheich va de Üssärbärger, immärhin än Mehrlittrigi Fläscha Kariessaft, uf denu Üftritt agstossu. Anschliässund siwer alli schnüärstraks zrug in d Fäschthalla, vär witärhin du Abu mit viel Guggumüsig und gnüäg Gitränki z fieru. 

Ich vär mine Teil, vär eis Mal komplett nüchtern, nit dasi susch immer pumpuvolls weri, hami de am halbi eis ämorgu z erscht Mal värabschiedut. – Was därzwischu nu gluffu isch, värmagi hiä nit z dokumentiäru –. Abär wami de mine ehruwärt Brüädär am viäri ämorgu gweckt het vär Taxi z machu, hani där räschtlich Abu gedanklich chännu nahvollziäh. Wani de am halbi füfi wiedär in Üssärbärg bi igitroffu. Het schich als erschtes där Musikus mit kaputtär Posünu ufu Ganghebil gsetz und hinnärnah sind drii meh odär wenigär doch liächt agsüsluti Personne, zwei derfa va de Chnätschära igstigu. Acho in Sängärma, nach appa hundärtüüsig „Alta alta alta alta alta alta“- Schreija, siwär de nu mit einär Person meh. 

Z niächtär Fazit va dem Abu, nit nur ich liedu unnär Alkoholifluss unnär unkontrolliärbarum Higgi. Äs Sigeret sälbär dreju isch tatsächlich viel schwierigär als das där Aschien hetti. Shots büch- und rittlings ufum Bodu z trichu isch öi niächtärn zum Lache. Ei chleine Stupf mit dum Zeigefingär längt, vär än Posüna komplett z ruiniäru. Wenn kei Bus fahrt, sind die Porretschchnätschär tatsächlich d Letschtu wa z Fäscht värlehnt, und där legendär hert Chäru trifft schich eiguntlich gar nit darum inär Garage, vär nu äs letschts Biär z näh, sondern tatsächlich vär uf dum allärletschtu Foto vam Abu z`si. Was vär än Ärkänntnis. 

Abschliässund isch wohl nur nu wichtig z ärwähnu, dass, bis uf äs Brot, wa irgendwo zwischu Üssärbärg und dum Gori ufär Strass liegt und vär äs Fondue hetti sellu diänu, alli gsund sind deheimu acho, und, ein Hoch uf z Xandi, will är wohl där einzige isch gsi, wa tatsächlich z Füäss uf Üssärbär und z Füäss öi wiedär retour isch cho. (Ein Ding der Unmöglichkeit, denu probiäru ines Auto z pfärchu). 

So freuui mi jetz scho uf z negsch Fäscht mit ew, wann de öi ich, sichärlich nur äs chleis bitzji meh, teifär ins Glas wärdu lüäge. Bis dahin…

… alles gute, ewe Webmaster.

Zwischen Visp und Solothurn, Dreikönigstag 2013

Saisonüftakt ... und alles bleibt besser!!!

Z erscht Weekend nach dum Fasnachtsbeginn isch vär isch Porretschchnätschär öi das Jahr wieder än Pflichttermin gsi. D Fasnacht het öi va ischer Guggumüsig sellu iglitu wärdu. Wiä immär geit das am Bestu z Gast bi de Schattuschlickär z Agaru. So isch, wiä selltis öi annersch si, där Bus mitäre Värspetig vo 10 Minüte pünktlich am 6i z Sängärma gstartut. Där Fahrer isch där gliche gibliebu, där Bus darfär umso moderner. Där Alain het nisch in schinum nigilnagilneuu Reisebus in Ämpfang gnu nit, ohni du chlech Hiwies, dass där Bus äbu nöi sige. Also bitte Achtung mit där momentan nu komplett funktionsfähigu Innuirichtig. Somit faht ja öi die Saison jetz anna wiä jedi andri öi, doch momänt mal, irgendeppis fehlt doch da? Nei, nit där notorisch z spaati Steffi, der isch zwar tatsächlich nit da, abär het sich zär Abwägslig abgmoldu. Öi d Instrumänt sind alli da wiä wär feststelle (das sellti ja am Afang va där Saison öi keis grossus Problem si). Härgott, z Biär fehlt, ja cha de das wahr si! Keis Biär im Porretschbus?! Wiä vam Krokodil gibissu isch z Sämy üf und Heim gsputut, da hetti sogar där Hussein Bolt, där Hüät vor im gizogu, und het äs Gascho gholt. Phuu, het nu glängt. Doch nu Flüssigs vär unnärwägs. Danke Sämy. Nachdem wa de z Turtma öi di letschtu zwei Chnätschära züägstiegu sind, het ischi Madame la Presidence z friedu chännu feststellu, dass doch 21 Mitgliedär, topmotiviärt an dem erschtu Üftritt scho wellent mit ischum neuu Strassustuck, dum Ändlosu, de Züäschauer iheizu. 

Numal schnäll alli d Note odär bessär gseit die Zahle iprägu, oder mitumene Chlämpi am Instrumänt befestigu (geili Idee Xandi) und scho hei wär ische erscht Umzug va där Fasnacht 2012/2013 chännu in Agriff näh. Super gstartut und miserabil üfghert isch de wohl z Fazit va dem Umzug, där Schluss vam Stuck värchäme wär de aber öi nu inu Griff. Sofort nach dum Umzug hei wär de öi scho äs chleis Platzkonzärtji vor dum Fäschtzält chännu gä, bevor wär mit dum Rammlär de va där Bühna si, und vär z Erschta d Instrumänti värsorgt hei. Und scho hetz die erschtu Biär gigä. Hei wär nisch doch güät wellu üfwermu, vär du Bühnuüftritt, wa de am halbi 11 agstandu isch. Näbubi het ischi Fotografin irusch Können an der Kamera chännu iäbu. Will das Jahr wirds mit dum Kostüm wohl schwierig aständigi Fotos z präsentiäru. Gsehwär doch im Dunklu mit Blitzliächt alli üs, wiä bsuffni Strassuvärchehrsschildär. So isch di Zit de öi schnäll värbi gigangu und scho sind die Porretschchnätschär uf odär vor där Bühna gstandu, vär z erscht Bühnukonzärt va dischär Fasnacht zum Bestu z gä. Där Wälsche isch zwar meh än Meistärleistig an Improvisation gsi, alls äs güät igiäbts Stuck, wora das das glägu het, värmagi aber bis hittu nu nit säge. Irgendwiä hei wärs abär doch gschaft zämu z Stuck üfzheru, so dass das appa nit gad mängum üfgfallu isch. Viel bessär sind de die andru Stickär ubärcho, wawär öi nu gspielt hei, bevor daswär de mim Ändlosu scho bald wiedär die Bühna värlah hei. Ziggizäggi ziggizäggi het’s de nachär wiedär durch z Raoulsch Rachu gröhrut. So wird isch die Tradition öi dass Jahr wiedär bis ans Änd va där Fasnacht treu bliebu. Än andri Tradition hent rebellischi Revoluzzer üsum Värei abär nachär fasch zum kippu gibrungu, abär dadärzüä spetär meh. 

Zrug im Fäschtzält odär inär Turnhalla hei wär de ändlich richtig chännu afa fäschtu. Biär und andri Gitränkt hets ja gnüäg, d Müsig, wenn nit gad än Guggumüsig uf där Bühna isch gsi, isch absolut tanzbar gsi, so das d Leiggibriädär sogar zämu ä Schottische uf z Parkett gleit hent (schi hents zumindest värsüächt). Und die Porretschchnätschär sind bis anu Rand topmotiviärt gsi. Die beschtu Vorüssetzige also vär än unvärgässliche, oder äbu än sehr värgässliche Abu, je nach Pegel. Wenn de nachär eifach nu än Schnüär vadär Decki äbrihanget und än leeri Red Bull Dosa inär Nechi steit, de zeigent d Chnätschär ersch richtig wettigi Mc Guyver’s in ine steckent. Ä hüärre Sauerei, än kaputti Brilla und äs Sämy wa schich sälber fasch ärheicht sind z Ärgäbnis va der Aktion. Wer nu meh will wissu, wird sichär d’ Antworte bildlich in ischär Gallerie chännu bestünu. So het schich de där Abu schnäll dahingizogu, bis de doch öi scho halbi dri am Morgu isch gsi, und d erschtu Richtig Instrumäntudepot gluffu sind, vär schich vär d Rückreis parat z machu. Natirli nit ohni än ärneute Zwischuhalt im Frässzält. Mmmmmmmmmhhhh isch di Mätzgisossa apa supär gsi. Gäll Carina, z negsch Jahr mache wär de das gschicktär J. Wohl mitumene liächt mulmigu Büchgfühl, da ja än nigilnagilneue Bus, het isch där Alain de pünktlich am dri wiedär zämugsammlut vär nischt zrug uf Sängis z bringu. 

Där Bus isch nu nit zwei Metär gfahru scho hets agfangu… Där Raoul het zu was agstimmt?! Va A wiä (oh) Anneliese pobel nicht bis Z wiä zzzzzz, da chunt nisch ja niä eppis zi. Doch das mal hets ganz annärsch sellu üssacho. Än abgikartruti Splittärgruppa va ABC-Liädji-Revoluzzär het schich parat gmacht vär du gross Üfstand. Vär du lang giplant Todesstoss. Wie die Ruhe vor dem Strum het schich z fröhlichi mitenand singu vo A – G dahingezogen. Nachum Grichischu Wein hets de gheissu, Ntschuldigung, kännt eppär äs Liädji mi Haaaaaa!!! Und das isch där beinahe Todesstoss vär das Singspiel gsi. „Hejo spann den Wagen an, seht der Wind treibt Regen übers Land, hol die goldnen Garben, hol die goldnen Garben“. Und ga numal im Kanon Heijo…. Und so isch das än gfühlti Stund und apa mit 267 Wiederholige witärgigangu. Besiegt hei wär, das doofi ABC-Liädji. Du Räscht hei wär mu gigä, mitumen Primarschüälliädji vam Köpfli. Ini Knie gezwungu heiwär das ABC Zigs J Doch halt, die Splitärgeruppa isch schich wohl allzu sälbschsichär gsi. Viel z früäh het schi gideicht, heisch du Willu va de ABC-Fans gibrochu. Viel z früäh hensch mit dem Kanon üfghert. Und gad wenns still isch gsi und alli ändlich hetti chännu dösu, het schich ei Ma zär Värteidigung va där ABC- Tradition üfgmacht. Het schich üsärkohru gfühlt, z rettu was z rettu isch. Die ABC-Ikona höspersönlich het sich, scho totgiglöibt, wiä in Zitlupa, üfärstandu wiä där Phoenix üs där ewigu Äscha, numal ärhobu. In d rundi glüägt und alli mit schinum Blick fixiärt, teif, teif hedär igschnüfut, z Mül üfgmacht und scho de het där Raoul gwisst är het gigwunnu. „Ntschuldigung kännt eppär äs Liäd mit Iiiiiiii“!!! Neeeeeiiiiiin!!! Ja, där Revolutionsvärsüäch isch kläglich gschittrut. Där Üfschrei va de ewig Miädu isch im Klang va de kläglichu Gsangskinst va de ABC-Fans, väräbbt. Het schich miässu ärgäh, zum Wohle va där Mehrheit. Und so siwär öi das mal nit zär Rüäh cho und hei halt, im Wissu drum daswär der Tradition irgendwenn wärde ru Räscht gä, mitgsungu, bis där Bus öi du letschtusch Stopp in Sängärma gmacht het. 

Miäd abär z fridu ubär äs glungus erschts Fasnachtsfäscht hei wär nisch üfgmacht zu ische warmu Betti, abär halt, öi jetz fehlt doch nu eppis. Z Biär hei wär ka (check), där Gspass isch ganz sichär öi nit z churz cho (check). Öi z obligat Ziggizäggi und z ABC-Liädji hei wär nit üsglah (check). Där Umzug hei wär ämel wieder mal güät ubärstandu (check). Öi där Üftritt hei wär mit dum fascht scho obligatu chleinu Patzär gmeistrut. (check) Üf- und wiedär abgladu hei wä ämil öi alli (check). Irgend äs Instrumänt liegt jetz zwei Monat im Wartehüsi (check). Die Petra het scho z Obärteili värloru, hofft abär z Mischi hei sus mitgnu (check). Also alles wiä immär. Was fehlt de da nu Mmmmmhh. Nummu nu z dritt ufdum Parkplatz hei wär ärschreckund festgestellt, dass där hert Chäru doch nu müäss z neu Väreinsjahr äröffnu. Mit dum Twist, gspielt vadär Petra und dum Sebi (Z Sämy hetti bi allum güätu Willu nimme mägu) siwär ubär zu de Leiggini inu Chällär, vär äs letschts Üfbäumu va dem erschtu Fasnachtsfäscht. Biär hets ja mittlärwil scho nimme ka (Iär ärinnret che, schockiärts Sämy, Schnällspurt mit neuum Wältrekord, und z Biär vam Uli in ischum Bus) und so hei wär nisch halt mit Litschischämpis miässu bigniägu. Dass heisst z Sebi het gsuffu, die Petra het mit schich sälbär ubär du glunngu Abu gredut und där Sämy isch unmittelbar nach dum erschtu Bodukontakt ine komatöse Schlaf kiet. Abär lüäget doch sälbsch.

 

Jaaaa das Foto vam hertu Chäru lat schich definitiv nu la värbessru, abär öi das kriäge wär nu hin. D Fasnacht isch ja nu längi. 

Und so wellti denu Bricht mit de letschtu Wort abschliässu wa nu ubär z Sämysch Lippe sind cho:

Sämy: „Öi, öi, öi, das isch ä schupär Üsgang gschi hittu… nit, nit??
Petra: „Ja Fasnachtu halt !“
Laaaaange Denkpause
Sämy: „Dasch het scho eppis.

Danke alle vär das tolli ersch Fäscht und merci dum ganzu Vorstand vär d Organisation, eifach z negsch Mal z Biär nit värgässu ;-)

Ewe Webmaster.

Solothurn, 19. November 2012

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Än üssärorduntlichi Värsammlig vor dum Abschluss

Minu liäbu Porretschchnätschärinne, minu liäbu Porretschchnätschär

Vor dem Momänt isch mär jetz lang där Graus gsi, will das isch scho där letschtusch Itrag im Porretschblog vär dischi Saison. Abär der Momänt chunt äbu jedes Jahr so sichär wiä Früähling, Summär, Herbst und Wintär wiedär. Mitumene flännundu und ämene lachundu Öig lüägi zrug uf ischi värganguni Saison und stellu fest, dass äs wiedär mal genial isch gsi, mit jedum einzelnu va ew därfu z fasnachtu. Vorär abär nu churz zu ische zwei letschtu Aläss. 

Di zwei letschtu, hedär jetz komplett alli Hirnzelle anu Alkohol värloru, da isch doch nur nu där Abschluss gsi situm Ballianos, deichet iähr vieliet jetz. Abär nenei, ich bin klarer Sinne. Die Porretschchnäschär hent nu än üssärordentlichi Värsammlig ka vor dum Fasnachtsabschluss. Z Ballianos gad ersch ubärstandu, physisch und psychisch immär nu nit ganz ufum Damm, het mu d Hälfti Chnätschära bereits am Gigelimentag Ämabu wieder agitroffu. Jaja, tatsächlich hei wär 13 Chnätschär gizellt, wa am Giggelimentag Turtmann d Üfwahrtig gmacht hent. Sumi zwar, inklusiv Präsidentin, imene komischu buntu Fozzilkostüm, abär dadrubär lüäge wär jetz mal grosszügig drubärwäg. Die 13 Chnätschär wa schich üssärordentlich hiä gitroffu hent, hent d Fasnacht vor dum Abschluss gad numal so richtig wellu gniässu. Ischär Fotografin is sogar soviel wärt gsi, äs eigunds Ablum vär denu Abu azleggu. Und somit chumu wohl öi ich nit drum um, churz du Abu üs miner Perspektiva z schildru. Agfangu het die Schnapsidee mimene Biär bi z Leiggisch deheimu. Där Musikus het unbedingt wellu, där Sämy, het trotz Prüfig am Nahtag natirli nit wellu värzichtu, also het schi där Sebi miässu fiägu ;-). Äso is cho, daswär öi nu du Diego Master hei mägu ubärredu, d Stirrächnige doch mal än Tag spetär z värschicku und äbufalls mitzcho. Somit sind scho viär Chnätschära unnärwägs vär anu Giggelimentag gsi. Unnina acho is de öi nit lang gangu, bis wär komischi Gstalte in nu komischere Gwänder gseh hei, wa wär hei miässu feststellu, dass das öi Chnätschär sind. Ja, die Carole, die Barbara, där Sven, där Tschaggino und där Vicki hent z Privileg ka, mal nit so genau schi ani Teen miässu z haltu und sind scho där ganz Tag mit du Füüdini unnärwägs gsi und somit öi demäntsprächung zwäg. Ob jetz vollkommund awäsund odär nur mit mindere notorische Fähigkeite zellt nit, 5 plus, git bereits 9 Chnätschär in Turtmann. Churz druf isch öi nu d Fotografin gsichtuti cho, wa ja logischärwis da isch, wenns eppis lustigs z Fotografiäru git. Där Joni het nit d Welli ka, da schini mit de Unnärbächnär unnärwägs und där Xandi isch so frindliche gsi und het nisch gfahru. Macht also numal plus 3 = 12. Scheisse, äntwäder hani jetz eine dopplut gseh, was ja mit miär ab und züä bi z viel Konsum cha vorcho, odär ich hami vohär im Squashu absolut värüsgabt, abär ich chumu nur uf zwelf. Die, der odär das wani värgässu ha tüät mär leid, du hesch wahrschlienli eifach z wenig gwirkt. Na ja, wewär de halt gad ämal so zahlrich awäsund si gsi, het sus schich där Sämy natirli nit la nä, än Umfrag z startu ob wär de negsch Jahr nit mit där ganzu Müsig wiedär an du Giggelimentag welle. Z Ärgäbnis va där Umfrag wird schich de apa an där GV presäntiäru. Wiä dem öi si, äs isch än supär gmiäthliche Abu gsi, zwar bitz z lang wordu vär mine Gschmack abär genau äso wiä halt Fasnacht soll si, ungizwungu und lustig und bi der Massa an Mitgliedär definitiv än üssärordentliche Blogitrag wärt :-)

 

Der üssärordentlich Alass we ja zwar gar nit netig gsi, da wiär änand sowieso scho wiedär am Nahtag gseh hei, wenns gheissu het, wiär därfe üfspielu um d Fasnacht z värabschiedu. Der Alass isch abär wohl darum netig gsi, wills z letsch mal isch gsi, wa wär nu nit nisch alli wehmüätig hei miässu värsammlu, will die schönstusch Jahreszit z Änd geit. So han ich de am Zischtag ämabu äs letschts mal die Griselda üs irum Stärbebett gholt und mi richtig Sportplatz üfgmacht. Där Sämy het währunddessu z ersch mal wiä immär schini Pauke gsüächt. Abär öi der isch, wia alli andru Chnätschär, mitumene, wiä mär schint, doch ä bitz gidämpfte Gfühli am siebni vor dum Lokal ärschienu. Äs hent alli bereits gwisst, das d Saison hittu z Änd geit. Z erschtusch Biär fertig gitrüchu het öi scho där Musikus in schini Pfiffa gröhrut, schliässlich hei wär hittu nu äs gidrängts Programm ka. So hei wär nisch mit där Schlampa in Marschformation (Zweierkollonna) üfgmacht richtig Parkplatz, wa nisch scho ische erscht Gastgäbär där Remo, mitumene Hüüs, ergär belüchtut wa där Ballärmann, där Time Square und Las Vegas zämu, het ämpfangu. Schini Schwärmäri vär Philadelphia-Nutella Bortjini het nisch ja scho di ganz Fasnacht nit losgla und das het jetz mal sellu probiärt wärdu. Somit isch dum Remo die Iladig öi meh odär mindär üfgizwungu wordu. Abär wenigstens hei wär inu nit, wiä letsch Jahr z Tscherrig Lilly miässu üsum Näscht Trompetu und Trummu. Danke diär Remo vär die feinu Gitränki, d Lasärshow und natirli die kulinarischi Äntdeckigsreis. Mit Biär, warmum Wii und The (warum öi immär) und natirli äbu där speziellu Spezialität het är isch, nadume chleinu Ständchen gäru bi schich ufum Balkon üfgnu. Und ich müäss säge, äs schmäckt im Fall ä Stuck bessär als das tent, di Philadelphia-Nutella Brotjini. Scho hiä hent die Porretschchnätschär bim Gnuss va flüssigär und festär Nahrig ubär d värganguni Saison philosophiärt, viel glacht und Annektote värzellt. Und gad genau de, wenn nisch die Carina numal eppis uf irusch Flöta het wellu vorspielu hets gheissu ab die Post, wiär miässe witär (warum äch genau de?) ;-) Mit Rhythmus und Melodie, so lüt das nisch z ganz Derfji sichär kehrt, siwär witär ins Wolfji, wa nisch z Leiggisch bereits mit schich deheimu ämpfangu hent zum Fondueplausch, wa ischärs Komitee mit tatchräftigär Unnärstützig vam Hüsvorstand Sabrina (isch im Fall wirklich immär schi wa alls macht, wewär sturmfrie hei), bereits alls hent zwäg ka. So hei wär, im ganzu Hüüs värteilt, numal ische Mägu ä biz Bodu värschafft und öi chräftig wiedär naglescht, bevor das de am zähni langsam witär isch gigangu. Nach dum Motto, äs soll doch bitte z ganz Derfji eppis va schinär Guggumüsig ha, hei wär öi nu d Nordstrass in Agriff gnu. Unnärwägs, de Burgini nu du Voulez-vous gspielt, bevor wär traditionell vor dum Germanusbrunnu numal alli Lippe gnätzt und d Lunge mit Luft gfillt hei, fär äs churzus abär chräftigs Platzkonzärt z gä. Äs isch de somit öi scho wit nach de halbe elfe gsi, wewär ändlich mit ischum Expräsi Jogi si igitroffu. In schinum nigilnagilneuu Hüsi het är die ganz Sippa ämpfangu zum Abschlussapero. Äs isch mu darfär härzlich gidankt, vär du supär warum Wii, du fein Zopf und natirlich öi de vielne Foto üs Guggumüsigjahri, wa wiär alli nu nit mitärläbt hei, abär schi hent scho damals zimlich gwirkt die Chnätschär, wenn nit sogar nu meh alls hittu :-) Mittlärwil isch wohl öi dum letschtu Chnätschär klar wordu, dass äs langsam dum Ändi va där Fasnacht züägeit. Also numal schnäll ä Schluck näh, bevor wär nisch äs letschts mal vär dischi Saison alli zämu üf uf du Sporplatz mäche. Da acho hei wär nu lang nit wellu üfheru und vor de altbikanntu und ärschüüdrundu Abschlussteen hei wär nu zwei andri Stickär zum beschtu gigä. 

Und de, füüf Minüte vor dum Änd va där beschtusch Jahreszit im Jahr hent schich de abär die Posüne mägu därzüä durchringu denu, wohlbekannti und glichärmassu, zumindest vär jede Porretschchnätschär, schlimmu Ton azspielu. Där Ton wa där Fasnacht definitiv du Gar aus macht und där Ton wa z glichum du TNT lat la afa. Die Posüüne, scho fasch komplett üssär Atum, hent sus doch nu gschafft durchzhaltu, bis die Trompete äntlich igstiegu sind. Die hent schich dasmal schön därzit gla. Villie, willsch du Istig ins Stuck nit gfundu hent, was mine Vorschlag, negsch Jahr du TNT meh z iäbu plausibil lat la klingu ;-), vielehnär abär hani z Gfühl ischu güätu Trompetär hent eifach nit wellu afa, willsch genau gwisst hent, was de nach zweimal durchspielu wird passiäru. Sobald wa di Trompete nämlich mal agfehnt du TNT azstimmu wirds unweigerlich passiäru…

Vorär abär nu äs chleis Dankeschön. 

Joni, danke diär dasch du mit vollum Isatz und lütstarch dinum Register und dis Registär isch alle du Takt vorgäbet. Ämal z langsam, ämal z schnäll abär meistens doch äso das wär alli du Atum nit värliäre:-) Merci öi vär die zahlrichu Biär, du bisch mit Sichärheit där einzige, wa mär nit probiärt het äs Shot azdreju.

Duli, danke viel mal vär dini Fröindin, wa mich nu mit minär zweithegschtu Alkoholwarnstufa in irusch Auto dri lat und mi sichär bis vor d Hüsport fahrt. Und danke vär dini Puschte, wa die Trompete so richtig lat la schränzu.

La Blonde, merci viel viel mal, vär än unvärgässliche Gätschabu. Mit Luki und Petra im Schlepptau hei wär die Bühne unsichär gmacht und du därzüä nu dine Magu mit dem schrecklichu blauu stichigu Gsöff, ah ja, und merci vär SMS. Bini de scho froh gsi, das ersch nach Turtma im Bett äntschlafu und nit wiän ich ämal z Martini ersch ärwachet bisch.

Barbara, danke vär dine Isatz ane Chochdeckla und där Värsüäch zämu du Tschaggini z pflegu z Saas-Fee.

Päddy Wyss, da weiss mu ja gar nit wa afa. Danke bisch zrug cho va Adilbodu, odär is Wängu gsi, wannt du dinu Kollegu meh odär weniger friewillig värla hesch, vär mit isch z Saas-Fee du Üftrakt spielu. Wiä lang hent äch dinu Kollegu vor dum WC gwartet bisch gmärkt hent das nit dri bisch. Danke vär die vielu lustigu Foto, wennt di wiedär irgendwo hesch dargleit zum schlafu. Und merci dass du dich z Suschtu sälbsch zum Major giküürt hesch mit dinum Bäsu. 

Tschaggini, merci fär di Gschicht va dinär Heimfahrt üsum Saasärtelli, äs het mi fasch giboojut. Danke vär das mu schich an fascht jedum Fäscht nit ubär dich, abär mit diär va Afangsch bis am Schluss het chännu amüsiäru. Danke viel mal vär äs riesu Rätsel um äs chleis Foto. Und danke hesch dum Sämy ischum Jungu „üfgipasst“ :-)

Ah ja, Sämy, ja ich gibus jetz züä, mine Liäblingsbrüädär, danke vär unzähligi zum schiässu komischi Foto und z Foto des Jahres. Danke vär hundärttüsigi va unnetige abär wahnsinnswitzige Annektote und Üssprich va diär. Danke vär äs Video wa wär so schnäll nit wärde värgässu (Das sägi där, das värchäment nu alli zum gseh;-)) Danke bisch Mitglied vam „hertu Chäru“ wannt de nit appa zwenig zu isch Heim hesch igladu, wenns inär Garage isch z Chalt gsi. 

Natascha und Adrienne, so unzärtrännlich, dasch öi hiä miässent gmeinsam gnännt wärdu, danke vär ewi Berichrig an ischum Värei. Ich hoffu ewärs ersch Jahr hei che genausogüät gfallu wiä mindestens d negschtu zwänzig wanär nu mitmachet :-)

Vicki, alte Sack, danke machsch nu äs Jahr, d Fasnacht packt di halt glich immär wiedär. Danke vär dinu Fähigkeite am Bongo, ohni die fehlti definitiv eppis.

Päddy und Mela, merci ew vär das suppär feini Apero z Stäg, wan ich zwar värpasst ha abär wamu nur güäts kehrt het. Danke vär ewi Luft wannär ständig und ohni Unnärbruch üs de Lunga tricket und somit därzüä värhälfet das de Porretschchnätschär där richtig Ton niä üsgeit. 

Carina, merci vär dinu Strubbilfrisüre ämorgu im dri im Bus, so breit, dass scho fasch zwei Sitza brüchsch. Danke hesch du isch vorgfiährt, dass nit nur anär Trompeta, sondärn öi an dinär heissgliäbtu Flöta Talänt anu Ma bringsch. 

Ah ja, und de müäss natirli nachär d Sibylle cho, danke, dasi niä weiss wiäni dine Namo müäss schriebu, ich hoffu hiä stimmes :-) Merci vär die beidu Bijini wa niä üfghert hent z gwagglu das Jahr und vär dine Isatz inär ganzu Fasnach bim Melodieregistär.

Sveno, obwohl dass die ab und züä zu du Gfotzlutu triebt bisch doch im Härzu än Chnätschär und ane wichtigu Aläss immär därbi und unnärstitzusch ischärs Register mitäre Notukänntnis wiä sus susch niämär va isch het. 

Ivi, danke diär vär dini knappi Zit, want du, wenn immär meglich näbu zigil-, arbeits- und heiratsstress ischum Posünuregistär widmusch. Und danke vär dinu spitzu Bemärkige, wa keine so druf het wiä du.

Xandi, danke diär, triffsch di teifu Teen so güät wan ich nit cha. Das isch äbu Teamwork. Und äs grossus Merci vär d Organisation vam „Hertu-Chäru-Barli“ öi wennt nit immär bisch daxi, hesch därfir gsorgt, dass offu isch und immär gnüäg Flüssigs da isch. Ah ja und dank diär doch gad sälbsch, hent dinu siebu fettu Jahr agfangu:-) Du weisch wasi meinu. 

Mitsch, danke gits äs Sousi, danke gits somit z Intro vam Blues, z Zwischuteili vam Twist, uf das bisch nämli sälber immer spitz und die ewigu Jeisserije wiä schwer das doch dis Instrumänt isch:-) Merci öi vär di Gschichte und Annektote, sigs ubär z Uli ubär du Värei odär dich sälbär, wa di Zit bis där Bus ändli heimfahrt värchirzt hent:-). 

Diego, kei Trummla so wiä dini, danke vielmal. Diego kei Ironie bessär wa dini, värgältsgott und Diego kei Humor so stöibtrochune wiä dine, merci tüüsig. Und danke hesch du Raoul nam Mesireccas als Matratz missbrücht, so hetär wenigstens nit ganz so lüt schinu ABCs chänu singu. Öi du bisch eine vam „Hertu Chäru“ gsi, vär eis Biär hets eifach immär nu glängt.

Lucki, danke hesch du das uralt Porretschchnätschärtriggi wiedär ini Guggumüsig gibrungu und mi total niidisch gmacht:-) Merci vär dini Unnärstitzig im Posünuregistär und im „Hertu Chäru“, schliässlich hesch du nachär immär där längstusch Heimwäg ka, das laht uf all Fäll der Zickzackkurs la värmüätu. 

Petra, Tüüsigdank diär vär das immär und immär wiedär du wannabe va de Spice Girls agizättlut hesch, wa mittlärwil scho fasch Väreinshymna isch und wani därbi glehrt ha, findsch mal kei Porretschchnätschär, eifach wannabe wünschu und scho sind zäh uf där Bühna. Ah ja und härzliche Dank vär die zuckärsiässi Schadufröid want mär bereitut hesch, wennt mär ämorgu im füfi nam Gätsch gseit hesch du miässesch de jetz gad zär Schüäl. 

Janine, ischi Fotografin, wa sus in Sache Knipsu bald mit jedum Japaner z Zermatt chännti üfnäh. Danke viel viel mal vär di riesu Palletta an Fotos. Äs isch där glöib jede dankbar, dasär somit nach jedum Fäscht cha ga nahlüäge wasär alls gibosgut het. Ohni dinu Foto fehlti eppis uf ischär Page. Danke öi vär die zahlrichu Iladige zum Schminku, wani zwar jedi inu Wind gsetzt ha, sorry ha eifach niä därzit ka, abär nachär jedesmal mi üfgregt ha will alli andru so supär hent üsgseh. Danke öi vär du Mörderthe-Thesackji-Hochwurf Rekord.

Äs riesu grossus Dankeschön und da sprächi wohl vär ische ganz Värei, ischum Musikus. Danke vär die supär Üftritta und Umzuga want du stets so güät wiä halt wiär inär Värfassig si gleitut hesch. Danke vär jedi Iäbig wannt du bisch da gsi und ischum Hüfo bigibrungu hesch, odär z mindest värsüächt ;-), wiä mu Müsig macht. Danke vär z Ischpielu vam Nöiu öi wens mu vär das Jahr nu nit glängt het. Danke vär Turtman und vär du Abschluss am Zischtag, da hei wär alle gizeigt, dass d Altu öi nu mägend. Merci vär di Gidult, vär dini Pfiffa wanisch das Jahr üsnahmslos immär het la wissu wenn äs Stuck fertig isch und vär dini unvärglichlich Glassuheit mit so ämene Sauhüfo :-)

Ganz am Schluss natirlich nu där wichtigstusch Dank und das nit nur va miär, sondern va alle ische Mitgliedär. Danke ischum wundärbaru Komitee.

Kerstin, merci bisch schwangär und chasch nimme ufum Bodu robbund Shots trichu :-) Danke vär das supär Komiteeweekend wani das Jahr z letscht mal mit ew in dinum Asp ha chännu värbringu. Danke vär du Schlussil, wa immär im Briäfchaschtu isch wenn nu eppär brücht, und danke vär z Telefon, wannt immär abnimmsch, wenn Not am Mann isch.

Raoul, danke vär dinu SMS, wannt nisch immär mehrfach gschickt hesch. Am Schluss siwär ämil de immär alli zär rächtu Zit am rächtu Ort gsi. Danke vär du Summärüsflug ins Bietschi want vär nix füüf Litär Biär äbrüf gitreit hesch. Merci vär dini Organisation im Vorstand mit zwei Wiibär het mus scho nit liächt :-) Und, ich beröius jetz scho, danke vär z ABC-Liädji bi jedär Busfahrt, äs fägt eifach glich immär.

Madame La Presidence, diär danki ganz speziell. Merci hesch du mis Amtji ubärnu und scho im erschtu Jahr än wahnsinns tolli Fasnacht organisiärt. Danke vär die supär Zämuarbeit wawär bi där Ubärgab ka kei. Merci vielmal vär dine Isatz währund dum ganzu Jahr vär ische Värei. Diär und dinum Vorstand sägu ich im Namo vam ganzu Värei, värgältsgott vär jede Üftritt, vär jede Umzug, vär jedi Iäbig, vär jedäs Biär, vär jedes Müsigstuck, vär jedi Busfahrt (natirli öi danke dum Alain), vär jedi Asprach, vär jedes SMS, vär jede Chüächu. Churz gseit, vär die Guggumüsig Porretschchnätschär was ohni dich und dinu zwei Mitstritär nit gebi. 

…  Tja und so siwär jetz wiedär mim TNT wa mittlärwil zwei mal durchspielt isch und mit ihm die Fasnachtszit jetz z Änd geit. Där allärletschtusch Ton bis zum letschtu Tropfji Luft wan nu inär Lunga isch la üsklingu und de isch fertig. Churz nach Mittärnacht am Giggelizischtag 2012 is das Jahr so wit gsi, d Fasnacht het wiedärmal abbrupt üfghert. 

Im Aschluss, vär än ganz churze Momänt alli still, het isch ischi Presidäntin numal gidankt vär än tolli Fasnachtsaison 2011/2012, bevor wiär isch alli zämu nu äs letscht Fasnachtsbiär gigönnt hei. Naht is nah het schich Porretschchnätschär vär Porretschchnätschär värabschiedut in d Faschtuzit. Alli genauso wiä öi ich mitumene flännundu und ämene lachundu Öig. Flännund, will än supär Zit viel z schnäll wiedär isch värbi gigangu, lachend, will wär alli genau wisse das än hoffuntlich nu bessrig Zit scho in wenigär wa einum Jahr wiedär uf isch wartet. Ganz zum Schluss, äs isch scho fasch Äschärmittwuch amorgu gsi, also Faschtuzit, het där wirklich „Hert Chäro“, dasmal mit Unnärstützig va ganz Oben, jawoll där Madame La Presidence, die Port zum Lokal züägmacht und d Fasnacht somit unweigerlich beändut.

 

Minu liäbu Chnäschärinne, minu liäbu Chnäschär, iär wisset, äs chunt wiedär än Saison und iär wisset, wiär wärde alli wiedär da si. In dem Sinn will ich jetz öi nimme lang machu und das ganz gseita va dischum allärletschtu Blogitrag (va dem Jahr) mit de Wort abschliässu…

… danke eiw alle, weil wir so sexy sind. Ewe Webmaster

Solothurn, 24. Februar 2012

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Feischte Donnschtag, langsam geits z Änd

Wiä nu jedes Jahr, sits ischi Guggumüsig git, isch öi das Jahr där feisti Donnschtag cho, wa wiär vor ischum heimischu Publikum hei därfu üfträttu. So heisus wiär isch nit la näh, isch an dem Tag, wa nu ziemli lang isch wordu, am zwei am Namittag nisch ufum Parkplatz izfindu, vär dänu närrischte va de närrischu Täg mitume Umzug im chleinu Stil azfa. Gfolgt va Barbapapa, Barbamana, Barbabella, Barbaletta, Barbalala, Barbarix, Barbawum, Barbabo und Barbakus, hei wär nisch Schlampaspielund üfgmacht richtig Turnhalla. Nachdem wa wär de da nu eis zwei Stickär zum Bestu gigä hei, hent nisch d MUKI-Turnerinne, wa denu Alass immär organisiärent öi nu äs feins Harrass Biär spendiärt. Da hent schi di Porretschchnätschär natirli nit zweimal la Bittu und schich unisono inär Trunhalla anär Bar bifundu. Churz druf, gstercht vam Biär und/odär Warmum Wii mit Chüächu, hei wär ischum allärliäbstu Publikum öi nu äs zweits Ständchen gibotu. Natirli hei wär nur die bestu Liädär uf allärhöchstum Niveau presäntiärt. Vär d Sängärmanär immär nur z Besta. Nach dem wa wär de nu eis odär z andär Biärli gikippt hei, du Heinz offiziell als elteschtusch Mitglied im Värei üfgnu und du Sämi in Konfetti ärtränkt hei, isch der Namittag öi scho wiedär värbi gsi.

 

Gottseidank hei wär öi gar nit lang miässu Pause machu, bevor dass de am halbi achti witär uf Brig isch gigangu. Nei ische Partnärvärei, odär bessär gseit, z Vorbereitigscamp vär neui Porretschchnätschär, also d Sängärmanärjugend isch so frindli gsi und het nisch där Schlussil und d Amtsgwalt ubär ischur Lokal ubärgäh. Schnäll hent schich d Chnätschär somit im Jugi befundu. Wer nit uf dum Couch odär im Getränkedepot äntschlafu isch, odär andärwidig bischäftig, üsäre Pauke än Schnupfmaschina z machu, het där Kehle än witäri Chiälig värpasst. Schliässlich het mu ja öi mit dum Expräsi Jogi und dum Exglögglär Remo wellu astossu, wa isch nu beehrt hent. Letschtgnäntum is z värdanku, dasi che das Foto hiä cha präsentiäru.

 

Dem wa z eifach schnupfu nimme längt hiä z netig Rezäpt: Man nehme eine Pauke, 1 Paukeschlegil, äs Prisji Priis, und soviel Narru wiä schich um die Pauke mägend värteilu. Anschliässund sind nasugrächtig Häufchen z bildu, Die vorgfertigtu Forme sind uber de Häufchen z positionieru. Der grescht Saddist va där ganzu Gruppa nimmt de du Paukuschlegil und haut eismal, chräftig abär gezielt in d Mitti va där Pauke. (Alls Spinnär!!!) Wer jetz nu äs bizji Hirni ka het, het mu gad mitume Gsöff (Kreation natirli öi vam Remi), wa schlimmär üsgseht als 100 jährigs abgstandus, ARA-Wassär, chännu du Räscht gä. Mit där Ärkänntnis, dass mu schich vielliecht doch nit immär äs Vorbild an de Altu soll näh, will die, wenn nit nu hittu so de ganz sichär friähär zu irusch aktivu Guggärjahr, ästuck dummär gita hent und nu tiänt, hei wär nisch üfgmacht richtig Parkplatz, wa nisch där Alain scho parat gstandu isch, vär nisch uf Brig z bringu. 

Wer also jetz nu nit gnüäg het ka, bi dem wird’s definitiv nimme lang ga, will där Gätsch, wiä där Namo scho seit, het scho so mänge und mängi la värsumpfu. So hei wär de öi gad komplett uf än Retourbus värzichtut und äs het gheissu, hittu isch Frienacht und alli sellents sche fescht gniässu. Bevor daswär abär in die Frinacht gstartut sie, hei wär nu ei Pflichtpunkt uf ischum Programm ka. Där Üftritt bi de Pämpers ufum Sebastiansplatz vor där Sebastianskapälla. Nachdem wa wär nisch de also im halbi 11 äntlich ämal durch die Mänschumassa hei chännu durchkämpfu, hei wär dum värsammlutu Publikum ischärs Repertoir zum Beschtu gigä. Än solide Üftritt, wa nach dem feuchtfröhlichu und vär«schnupft»u Namittag nit sälbvärständlich isch gsi. Abär äbu, wenns druf a chunt, nämment schi di Porretschchnätschär im richtigu Momänt halt gad churz zämu (meistens ämil).Därna hets natirli keis Haltu me gigä. Die Bare vam Gätsch hent die ganzu Porretschchnätschär, eini nam andru värschlickt. Än genaui Wiedärgab va all dene ganzu Gschehnissi isch darum öi nimme meglich. Teils wägume z hochu Promillewärt, vor allum abär willi minu Öige und Ohre nit immär und ubärall zär glichu Zit cha ha, het schich minum Blick und Hörfäld doch einiges änzogu. Was sichär gibliebu isch isch där Tschaggini, wa du ganz Abu schini Manuela üsgfiährt het. Schini nöi Flamma het nu so sehr beschäftigt, dasch sus sogar värmägu het, du Bann vam immär glichu Foto z brächu. Äso het d Janine sus tatsächlich, nur ei Blogitrag va där Rätselüflesig äntfärnt nit gschafft, irusch Compagnon vär z hittig Pflichtfoto z mobilisiäru. Und das obwohl daschmu ständig uf du Färse isch gsi. Abär z Tschaggini und schini Manuela sind halt immär gad ei Schritt vorüsgsi und darum hets de schlussändlich nimme glängt. Ohhhhhhhhh!!!!!!!

 

Än Bar därnäbu, zwischudri odär drubär, je nach dem wa z Tschaggini halt de gad isch gsi, het die Carina probiärt midumene Flötuspiel zu eppis Gäld, odär z mindest zu meh Flüssigum z cho. Abär das isch ra de wohl nit ganz glungu. Nur für Minüte nadem wa z Luki das putzig chlei Flötji gseh het, het sus äs scho ine Plampe ka und nachär hani där ganz Abu du Tetanus ine Ohrini ka. Tja scho die Carina het schi mit irusch Spiel ja nit gad ön goldigi Nasa värdiänt. Abär där Luki de ganz und gar nit. Weri Human Rights Watch da gsi, mu hetti nu üfgfordrut sofort Schmärzunsgäld z zahlu. Und so värwundrus mi, das das Flöti sus doch tatsächlich bis zum Luki heim gschafft het, wa sus de die Carina ine negschtu Täg wiedär cha ga abholu. Müäsch sus also nimme deheimu süächu und dinum Fröind tschuld gä är heis värloru. Abär mach mär ei gfallu und gib so eppis niäme dum Luki in d Fingra. Ä Bar witär links hei schich übrigens anschienund öi där Raoul in schinär Ehr, odär zumindest in schinum Hörsinn, värletzt gfühlt. Die Müsig legi är schich nit la biätu hedär la värlütu und isch auf und davon. Gsichtut hani nu de ersch spetär, ämorgu früäh wiedär, wanär schi müättärschselluäleinzig imene Zält, wa d Müsig glöib nit wirkli bessär isch gsi, amene giftig üsgsehundu blauu Gitränk probiärt het, wa zwar inär Nasa stichegu, abär uf där Zunga abgegi wiä än Party. Nur d La Blonde het de mit immu Mitleid ka und het schich öi va dem Gitränk la ubärzügu. Eis het ra de abär glängt und schi het schnüärstracks de Bei unnär d Händ gnu, vär ufu erschtusch Zug. Wiä lang das där Raoul nachär nu älleinzig da gstandu und wiäviel va dene giftigu Gitränk är nu igschittu het, änziäht schi vollkommu minär Känntnis. Öi sämtlichi andru Mitgliedär wani de nu gfregt ha, heint kei Ahnig. Die sind vielmeh därmit beschäftigt gsi, schich witär va Bar zu Bar durchzkämpfu, bim Katärfrüästuck im Couronne äs Domino mit de Barhockär z värastaltu, odär abär die Bahnhofstrass spielundu rauf und runter z hoppsu. Ja das isch äbu där Gätsch. Jede isch schich sälbsch am negschtu und üs de Grücht und Ärzellige, wa üs dem Sumpf vam Gätsch lislig wiedär üftöichent, cha schi ja de jede sälbär schine Rheim machu. Äs isch uf allu Fäll wiedär äs supär Fäschtji gsi, odär bessär gseit zwei supär Fäschtjini wewär där Namittag öi nu miträchne, wa wiär Chnätschärinne und Chnätschär wiedär, mehrheitlich zämu und mittenand hei chännu ärläbe. OK, im Gätsch isch glöib jede Mal värloru gigangu, abär bis hittu hei wär ämil de alli wiedär gfundu. Nur schi het sus nit gschafft du Gätsch heil z värla und äs isch än wahri Tragödie, das wär du nachfolgundi Nachrüäf hiä miässe publiziäru:

Ein Nachruf, in dankbarer Erinnerung
Wir haben die schmerzliche Pflicht, Ihnen zur Kenntnis zu bringen, dass uns viel zu früh und unerwartet, unsere geliebte und hochgeschätzte Griselda verlassen musste.
Griselda ist als junges Instrument, verlassen in einem Musikgeschäft von Sebastian aufgefunden worden, welcher sie fortan gut behütet und liebevoll aufzog und sich Ihrer jungen unverdorbenen Seele angenommen hat. Schon früh erlernte sie das schwierige Handwerk als Guggenmusikposaune. Griselda zeigte schon im zarten Alter von einem Jahr, dass sie als Schränzerin geboren wurde. Dass Sie in Ausübung ihres geliebten Hobbys, viel zu früh ihr Leben aushauchen würde, vermochte zu diesem Zeitpunkt noch niemand zu sagen. Stets gut gekleidet und voller Tatendrang vermochte Griselda den Klang der Porretschchnätschär mit ihrer einzigartigen Stimme zu bereichern. Als bessere Hälfte des damaligen Präsidenten schaffte sie es, sich an jedem Auftritt von ihrer besten Seite zu präsentieren. Ihr schwieriges, und von zahlreichen Schicksalsschlägen gekennzeichnetes junges Künstlerleben, bezahlte Griselda bereits in ihrem zweiten Lebensjahr mit dem Verlust Ihres Zugbogens. Fortan schritt Griselda mit einer Prothese durch die Oberwalliser Fasnacht. Aber ihre Willensstärke und ihr Durchhaltevermögen liessen die gute Griselda nicht davon abbringen auch weiterhin an der Seite ihres geliebten Bläsers zu verbringen und mit ihm, Jahr für Jahr die Fasnacht zu beehren. Als eines von vielen Instrumenten war Griselda stets bemüht, den Klängen der Porretschchnätschär zu ihrer Vollkommenheit zu verhelfen. Immer ihr bestes zu geben, war Griseldas Lebensinhalt und so konnte Griselda auch noch weitere 3 Jahre erklingen, bevor sie durch einen tragischen Unfalltod im zarten Alter von 6 Jahren das letzte Mal ertönte. Griselda ist in den frühen Morgenstunden des 16.02.2012, vermutlich an den Folgen eines zu dicken Arsches, welches sich einfach so auf sie draufsetzte, verstummt. In Ausübung ihrer geliebten Pflicht als Guggenmusukposaune durfte uns Griselda in ihrer liebsten Jahreszeit verlassen. Ihren Klang und die Unverwechselbaren Schränztöne werden wir stets in guter Erinnerung bewahren. In unseren Herzen wird Griselda als treue Freundin, geliebtes Instrument und zartbeseitete Hüterin der fasnächtlichen Klänge weiterleben. Wir danken dir für 6 unvergessliche Jahre im Dienste der Porretschchnätschär St. German. In liebe und dankbarer Erinnerung, dein Sebi.

 

Tja, mitgnu va dem tragischu Värlust han ich miär än witäre Tag am Gätsch nimme wellu atüä. Vielie andri Mitgliedär va ischär Guggumüsig hent abär du Üftrittfrieji Fritagabu gnutzt, vär witärhin Fasnacht z betriebu. Natirli am Gätsch in Brig. Äs het de ersch am Samstag wiedär gheissu auf geht’s Porretschchnätschär und zwar anu Balianos Ball in Baltschiädär. Mit dum wohl beschtu z Nacht va der Saison hei wiär denu Üftritt am Samstag ämabu tärfu startu. Vär die feinu ufum Punkt kochtu Älplermaggarone mit de knusprigu Zwieble därzüä, ubärgibu ich symbolisch de Ballianos du goldig Fasnachtschochleffil. Eiditig der kulinarischi Höhepunkt va dischär Saison. Wenn also z Ässu so super isch, cha ja där Abu nur nu bessär wärdu. Als erschti Guggumüsig an dem Abu hei wiär scho am zähni därfu uf där Bühna üfspielu. Wohl im Wissu, dass das där letschtusch Üftritt vär dischi Fasnacht vor Publikum wird si, hei wiär Porretschchnätschär numal alls gigä. Und mit dum Stand up, dum Schlüpfär, dum Leila dum Twist und dum Ägen und där Schlampa die Turnhalla grockt. Äs het richtig gfägt numal mit ew d Lunga üs dum Körper z posünu und uf där Bühna abzgah. Sogar där Tschaggini und där Sveno hent schi das nit wellu la äntgah. Ä halb Stund vor dum Üftritt nu im Leetschu am Füdinu, hent sus schi doch tatsächlich nu gschafft nach halbum Üftritt, zwar mit dum grüssigu Fozzilchleid va de Füüdinu, abär immärhin mit irusch Instrumänt in ische Üftritt dri z platzu und denu mit isch fertig z spielu. Wohl im Wissu, dass wär där letscht Üftritt hei, hent die Chnätschärinne und Chnätschär nu im Instrumäntudepot d Schlampa numal durchgspielt, bevor daswär die Üftrittssaison, umrahmt mit dum schönstu und lütuschtu Ziggizäggi definitiv biändut hei. Nach dum Üftritt het das mit dum värpatztu Foto va där Janine und dum Tschaggini natirli nu wellu besprochu wärdu. Äs het schich doch de tatsächlich nu härüsgstellt, dass där Steve Jobs seelig öi nu schinu Fingra mit im Spiel het ka bi der ganz ominösu Fotogschicht. Will sälbschvärständlich het ischi Fotografin d Janine alls meglicha unnärnu, vär du Tschaggini zu dem Foto z biwegu. Nachdem wasch nu afa im ganzu Gätsch gsüächt het, hetsch mu mit irusch I-Phone äs SMS gschriebu. Där Tschaggini schinärsitz het natirli öi alls dra gsetzt, die Fotosach hinnär schich z brinug und het sofort nach dum Ort nahgfregt. Natirli öi mit schinum I-Phone. Wiä schich de jetz abär üssagstellt het, het d Janine das SMS niä värcho. Soviel zum I-Phono Monopol inär Handybranche und zär doch sehr fragwürdigu Imischig vam Steve Jobs seelig. Abär löiget doch eifach sälbsch.

 

Die Gätschbisässunu va isch sind de nachär bald ämal ämüf uf das Brig, währund dem dass där Räscht va ischär Müsig schich sus inär Undärgrundbar bequem gmacht hent, wa wär de öi bis ämorgu im dri nimma ämüssa si cho. Mit ganz viel Flüssigum und bereits jetzt in Ärinnrige schwelgund hent die Porretschchnätschär du Abu mit de Ballianos numal gnutzt vär die schönstus Jahreszit z zelebriäru, bevor nisch där Alain äs letscht mal sichär het heimgibrungu. Ich uf Sängärma, Raron und Stäg und du Mitscho uf Fickdorf, wiä där Viktor festgstellt het:-) Das mittlärwil kei Biär meh inär Garage het, het schich där hert Chäru üfgmacht zu z Leiggisch heim, was zum Abschluss nu feini Tomatspagetti gigä het. 

Minu Liäbu Chnätschärinne und Chnätschär, än Gnuss vär alli Sinne isch dischi Saison 2011/2012 wiedär gsi. Nu gad is ja nu nit ganz fertig drum ärspari mär än witäre Emotionsschwall bis am Tsischtag, wewär de wirkli z letsch mal vär dischi Fasnacht zämu wärde d Nachtrüäh steru. In dem Si wünschi che nu än flotte Sunntag, gniässet där Räscht va där Fasnachtswucha, die wa ämil därzit hent und nit miässent schaffu und bis am Giggelitsischtag zum Üsklang.

Und der nu gad wills so luschtig isch :-)

 

Ewe Webmaster.

Sängärma, 19. Februar 2012

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Wiär hei än Major… und, äs Gheimnis wird üfglest

Vär eis mal hent die Porretschchnätschär an dem Wuchunänd nur am Sunntag miässu/därfu/sellu üsricku. Wiär sie z Gast gsi am Leiggär Fasnachtsumzug, als eini va 35 Gruppe. So hei wär also mal Zit ka, am Fritag und am Samstag gmiähtlich üszspannu, Bei hochlagru, ufum Couch vor dum Fernseh liggu und äs The z trichu. Odär abär, wiär heis nit üsghaltu deheimu und si privat uf Visp an d Fasnachtsäröffnig. So zumindest hent sus 95% va isch Mitglieder gmacht. Schi hent schich d Fasnacht nit la näh und sind ab dri uf Visp in die Beize und uf die Gass. D andru 5% sind äntwäder z lang vor dum Fernseh gsi, heint anstatt The äs Glas z viel Wii ka odär heint unfriewillig an d Vispär Fasnachtsäröffnig provisorisch äs Fänstär miässu ga flicku. Und so is de halt cho, dass die Porretschchnätschär, obwohl, dasch doch eigentlich praktisch äs fries Weekend ka hent, am Sunntag Namittag alli zu 100% z huddil und kaputt im Bus vär uf Leigg ghocket hent. Nichtdestotrotz hei wär ischi Sach natirli güät wellu machu. Also hei wär nisch zämu gnu, äs Kontärbiär ämbrigschlitzt und nisch uf Leigg richtig Umzug bigä. Leidär, und das isch somit öi gad das einzigi Manko an dem Tag gsi, heint sus nit alli Mitgliedär bis uf Leigg gschafft, so daswär ziemlich dezimiärt hei miässu durch die Gasse va Leigg löifu. Abär nu de het mu nisch güät kehrt, wiä wär zär Schlampa agsetzt hei und die bis zum Schluss vam Umzug durchgizogu hei. Anschliässund hets de mal eppis vär z Gmüät gigä, also wiedär äs Biär, bevor wär vor dum Restaurant Traube nu zwei dri Stickär dum Publikum hei zum Bestu chännu gä. Sogar där Voule-vous het das Jahr üfghert wenär und wiänär het sellu. So siwär de, so güät wiäs geit gwermt va du letschtu Sunnustrahle, richtig Sustu üfgibrochu vär du zweitusch Teil va dem grossu Umzug.

Öi da hei wär nisch de wiedär alli zämu igfundu vär numal de zahlrichu Fasnachtsbegeistrute Mänschu mit närrische Kläng izheizu. Und siehe da, wer hettis gideicht, plötzlich steit doch tatsächlich z Wyss Pädi doch öi nu da. Di Pauke hetär zwar nit gfundu, odär bessär gseit, di isch in einär Garage igschlossu gsi, währunddem das där Schlussil därfir inärä andru Garage igschlossu isch gsi, odär irgendwiä so. Abär är het darfär än Bäso mitka (warum öi immär) und so hets de tatsächlich sellu si, dasswär nach Jahri, sit de Zite vam Tino, ohni Major, äntlich wiedär eine ka hei. Z Pädi het das sehr souverän gmacht, abär bitte Päddi, ä chleini Abmahnig müäss si, där Schämdihüät am feistu Donnstag und mindestens än rundi Biär vär alli. So isch där das wohl, nit zum erstu, abär sichär zum letschtu Mal passiärt. Unnär där Leitig vam Major Päddi also, hei wär de öi nu z Sustu ä chleine Üftritt vor dum Elite gigä, bevor das där offiziell Programmteil vär das Wuchunänd fertig isch gsi. Was nachär nu gigangu isch, äntziäht schich minär Känntnis, will wenn ich scho wiedär unnärwägs richtig Grüäziland bi gsi, hent die Porretschchnätschär, so schintz zumindest uf de Foto, fescht mit Biär und Mördärthe witär gfahru. Abär lüäget doch bitte sälbsch :-)

 

So viel zu ischum traditionellu Üftritt an där Leiggär Fasnacht. Viel wichtigär wiä bereits im letschtu Blogitrag ärwähnt, isch d Üflesig vam Rätsel zum immärglichu Foto. Wiän ich ew ja scho ha la wissu, süäch ich sit där Mesireccas nach dum Grund, warum immär und immär wiedär z glich Foto in ischär Gallerie üftöicht. Äs wahrs Mysterium, faszniärund und beängstigund z glichum, hets mich nimme losgla. Tage, nei Wucheland hani kei Schlaf gfundu und immär und immär wiedär is mär bigägnet. Urplötzlich, de wenis am wenigstu ärwartut hetti is mär wiedär ubär du Wäg gluffu. Minu Gidanke hent schich nur nu um das Bild gidreht. Ich ha nimme chännu schlafu, nimme chännu ässu, an schaffu isch ja scho gar nimme z deichu gsi. Nur eis het mi interessiärt. Was will miär das Foto nur säge? Is än beschi Vorahnig uf äs kommunds Äeignis? Vielliecht än Warnig uf än Unfall wa z Janinsch und z Tschagginisch notorischu und geistigu Fähigkeite so wärdent ischränku dasch de so wiä ufum Foto üsgsehnt? Is än Vorbote vär die drohundi Apokalypse wenn där Mayakaländär z änd geit? Is vielliecht än Computärfehlär, wa immär und immär wiedär z glich Bild lat la äntstah? Und warum d Janine und z Tschaggini. Schi wa doch susch immär hinnär dum Fotoapparat isch und är wa schi doch susch vär jedäs Foto drickt. Bin ich där einzige was gseht odär is öi andre üfgfallu? Und wenn ja, hent di zämu mit miär die Gabe in die Züäkunft z gseh? Odär is viellicht än Nachricht üsäme unbekanntu Universum, Üssärirdischi wa nisch eppis wichtigs wellent mitteilu? Ich bi mu eifach nit druf cho. Ich ha gstudiärt. Ich ha Notize gmacht, Zitpunkt und Ort vam Foto, Üsrichtig va där Kamera, Liächtistrahlig, irgendwelchi Schatte wamu nit sellti gseh. Ich ha sogar scho fasch du Stephen Hawking wellu ischaltu um schich der Sach aznäh. Äs het mi fasch wahnsinnige gmacht. Und de, amene absolut unschienbaru Momänt im Sanpanchos het schich das Rätsel vär mich glüftut. Äs hells, anziähuds Liächt isch üfgigangu. Ich ha mich gidreht. Minu Öigu hent schich wiet göffnut. Minu Pupille värängunt schich um nur der Momänt z fokkusiäru. Im ganzu Rüm wird’s still, nur nu mine Härzschlag kehr ich stetig und im Glichschlag im Ohri. Bubum, bubum, bubum. Di Zit bliebt stah, d Mänschu um mich herum sind ärstarrt wiä ufume Gmälde. Äs sind nur nu die Werter wa nahhallend in minum Gidächnis. Die paar wenigu Wertär wa äs grossus Rätsel hent värmägu üfzlesu. Schi durchschwirrend minu Gidankugäng, mis Hirni värsüächt scha z formu zudäre eifachu Glichig. Und am Höhepunkt va dem Momänt, bevor das alles wiedär schine giwohnt Löif nimmt, stellent schich miär minu Haar üf und ich värchumu Hännuhüt. Mitumene Grinsu ufum Gsicht, wiän äs chleis Chind wa äs Schoggoladji find stahni da und gniässu die Ärlesig, obwohl dasch än bittärschweri Äntüschig isch.

Tja minu liäbu Chnätschera. Ich würdi che ja jetz gäru säge, das die Üflesig va dem Rätsel tatsächlich eini va de obgnänntu Värmüätige als Grund het. Ich würdi che gäru mitteilu, das d Üflesig spannundär isch als jede Thrillär odär zumindest so genial wiä z Büäch Illuminati. Ich würdi che gäru mitteilu das schich vär mich dadurch än ganz än neui Wält ärschlossu het odär dasi därmit z mindest än mittilschweri Kathastorpha ha chännu värhindru. Abär, äs isch eifach… (ich chumu gad druf abär lüäget che zersch numal d Fotos a)

 

Tja, äs isch tatsächlich eifach nur – än fittladummi Schnapsidee va där Janine und dum Tschaggini gsi.“Äs isch wiedär Zit vär ischär Bild Tschaggini, de chum ich öi mal wiedär uf äs Foto“. Das sind die Wertär wa alles üfglest hent. In Saas-Fee äntstandu, will d Janine gmeint het, schi si halt so wenig uf Foto, will scha ja schi immär macht, mächent d Janine und där Tschaggini sitär in jedum Fäscht zglich Foto. Eifach so, wills luschtig isch. Nix mit Värschwörig, Üssärirdische odär Vorhersehige. Eifach äbu än Schnapsidee wasch zämi bim Gnuss va (z)viel Schnaps ka hent.

In dem Sinn, minu Liäbu, studiäret nit ubär Chlinigkeite nah, was gar nit wärt sind. Äs chat ja nur än riesugrossi Äntüschig gä:-) Gniässet liäbär di Zit bis am Donnstag, wenns de richtig los geit, ab dri in d Fasnachtswucha, wewär als erschtes ischum iheimischu Publikum wärde d Üfwartig machu.

Bis de, än schöni Zit und ubärastränget che nit. Ewe Webmaster

Solothurn, 13. Februar 2012

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

2 auf einen Streich

Mimene ischchaltu Biär in Stäg agfangu und mitume heissu The z Sägerma beändut. Soviel zum strängu letschtu Guggumüsigweekend. Also, de bis negsch Wucha, ewe Webmaster.

Solothurn, 06. Februar 2012

Ah ja, ich ha ja jetzt das was zwischudri gsi isch värgässu :-) Also fe wär mal mim Biär z Stäg anna. Das isch wirklich eiseskalt gsi. Bi Minustemperature im zweistelligu Berich hei wiär nämli das mal das asträngund Wuchunänd gstartut. So het isch där Patrick am früähu Fritagämabu bi ihm deheimu igladu vär äs chleis Apero und än Sterchig vär das Marathonweekend. Merci afa mal an der Stell dum Patrick und schine Hälfer. Gstercht und äs chleis Bitzi üfgwermt hei wär nisch de Richtig Restaurant Sport bigä, wa wär so schnäll wiä meglich inu Umzug si gstartut, so das nit numal die ganzu Instrumänti igfrert. Fri nach dum Motto, liäber durchgehund spielu, statt immär wiedär ändischu, het nisch ische Musikus küm Zit gla, ga Luft z holu, scho hei wär ärneut zär Schlampa odär zum Tiger d Lippe gspitzt und agsetzt. Nach dum Umzug isch ja de öi immär vor dum Üftritt. Uf denu hei wär abär an dem Abund lang miässu warte. Als zweitletschti Guggumüsig hei wiär hittu ersch am viärtil ab eis du Üftritt ka. Heisst also vär isch irgendwiä di Zit bis de ubärbriggu und ja nit z viel laffu. Schliässlich hei wär ja das dum Präsi voräre Wucha in Raron värsprochu. Was chamu also machu. Zersch mal „fein“ ga z Nacht ässu. Wiä jedes Jahr hets bi du Sanpanchos Penne gigä. Und öi wiä jedes Jahr, si wär de gar nit ärstünt gsi, wiä „supär güät“ das die sind gsi :-) Also güät, nam ässu het mu scho eis Biärli värdiänt. Eis geit ja scho, äs geit ja öi nu lang bis zum Üftritt. Währund dem das inär Fästhalla bereits die erstusch Guggumüsig üfgspielt het, isch därnäbu im Partyzält bereits mit herte Beats vam DJ die Post abgigangu, so das wohl va jedum Chnätschär z Tanzbei va sälbsch het afa schwingu. Nach üsgidehnte Tanzphase, gipaart mit lütstarche Gspräch, will mu ja änand fasch nit värstandu het, hets de doch öi nu äs zweits Biärli vor dum Üftritt gigä. Schliässlich het mu ja jetzt z erschta gad wiedär vollständig üsgschwitzt ka und sowieso än furztrochuni Kehla, also chä wer nisch scho nu äs zweits gönnu. S geit ja schliässlich nu lang bis viärtil ab eis isch. Churz druf het ja de öi im Fästzält nu Allpot Futsch afa spielu und so het schich än Grossteil va ischär Gruppa hiä wiedär igfundu und fescht mitgröhrut. Und we wär doch gad alli so schön zämu si, müässmu ja fasch mitenand astossu. Also, hole wär nu du drittusch Bächär vär hittu (ich weiss, die vam Apero und vor dum Umzug hani jetz nit mitgrächnut. Abär die zellent schliässlich öi nit). Nam erschtu Schluck än Gidanku an du mahnund Präsi, abär die isch ja gad niäna inär Nechi, also üstrichu und witärtanzu. Ob jetz das schlussamänd 2 odär 3 Biär vor dum Üftritt sind gsi, macht ja du Bratu öi nit feistär. So isch de die Zit öi relativ schnäll värgangu und pletzlich is uf z Mal viärtil vor eis gsi. Also, nu schnäll äs Biär ga holu vär uf där Bühna, da müässmu ja schliässlich scho zwischu drit d Lippe nätzu und di Kehla spiälu. Nei, de näme wär sogar gschiedär zwei, falls eis unnärwägs in der Chelti igfret odär nu schlimmär z Bodu kiet. So hei wär nisch de alli am Eis im Instrumäntudepot igfundu und siehe da, äs sind sogar nu beidi Biär ganzi gsi. De magi abär appa scho fasch eis scho jetz trichu, will z Instrumänt und zwei Biär uf die Bühna trägu isch ä bitz miählich. Abär ich fühlu mi ja nu fit und griffsichär, also värtreits das füfta sichär öi nu. Und ubärhöipt bini ja schliässlich nit där einzige, wa nit ganz niächtärs die Bühna biträtut. Imärhin, z Värsprächu an die Presidäntin hei wär die ganz Zit im Ohri ka und wohl öi darum ab und züä än Schluck mim Tanzu värschittut und so hei wärs doch nu alli de Umständ äntsprächund, körperlich und geistig in Hochform uf die Bühna gschafft und hiä ischär Konzärt wiä gäng das Jahr mit dum Stand up agfangu. Folgerichtig nachär mit dum Schlüpfer und dum Leila witärgfahru, z Gscheichji zum 20 jährigu Jubiläum va de Sanpanchos ubärgäh, Gratulation zu dem Jubiläum übrigens, und nach nu eis zwei andri Stickär gspielt, bevor wär die Bühna mit där Schlampa wiedär värla hei. Und äs isch, wiä chäntis öi annärsch si, wewär alli uf d Chefi lose, än richtig güäta Üftritt vär die spati Zit gsi. So isch de öi d Lektion va dem Abu gsi, dum Präsi wird glosut und gfolget, aber was sie nicht weiss, macht sie nicht heiss. Und solang was im Mass bliebt isch ischi Müsig doch immär vär Kompromissa bereit.

Nachär hets de abär keis Brämsu meh gigä und so hei wär die Stund bis am dri de nu in volle Zig gignossu bis nisch där Alain pünklich wiä immär in schinum warmu Bus ämpfangu het. Vieli hent de du diräkt Wäg vär Heim abär nit gnutzt und spetär odär bessär gseit inä friähu morgustund du ÖV gnutzt odär die wa nit so äs Glück hent ka, irusch chaltu Fiäss. Im Bus is nämlich ganz schön still gsi vär eis mal. Wer het äch da gfehlt? :-) Deheimu acho het de du hert Chäru scho di blanki Panik ärgriffu. Där Alexandär fehlt. Wa ge wär de jetz? Abär där Läx we nit där Läx wenär nit organisiärt hetti, das nisch schini Schwestär die Garageport chunt ga üfmachu. So het de also doch nu z Sämi där Diego, ich und die Petra als Trompetuvärträgig und Quotufröi vär die Gschlächtärglichstellig z wahru, nu äs letschts Biärli in ischigär Chelti gignossu, bevor das öi vär isch gheissu het, ab in d warmu Fädre, moru bzw. hittu miässe wär ja schliässlich scho wiedär fit si.

 

12 Stund spetär, än Brilla wenigär (värdammti Chelti) und zwei neui volli Harasse Biär spetär heint schich die Porretschchnätschär bereits wiedär im Bus igfundu und sind Richtig Leigg unnärwägs gsi. Där Üftritt mit de Schnägguschränzer an irusch jährlichu Guggärball isch agstandu. So siwär am halbi achti d Leiggär Burgschaft spielundu äbrüf richtig Fäschtzält marschiärt, vollär Vorfreid uf än neue lustige Abu mit ischär Truppa. Öi wenn där eint odär där andre nu d Nachwehe vam vodrigu Abu ine Chnoche gspiert het, hei wär sus doch gschaft, das wär am Üftritt, wa vär eis mal wiedär im viärtil ab nini, also ziemlich früäh isch gsi, komplett awäsund sie gsi. Darfär mal äs chleis Komplimänt. Wenn alli 27 Nase uf där Bühna sind, de cha ja das nur güät cho. Tatsächlich, obs jetz wäg där füähu Zit odär där komplett aswäsund Mannschaft isch gsi, hei wär än hüärre Güäte Üftritt dargleit. Sogar ischum kritischu Musikus hets gfallu und het nisch globt und das Lob chä wär dum Steffi sichär nur zrug gä. Mit dum Stand up, där Schlampa, dum Voulez-vous, dum Twist und dum Again, dum Blues und uf Wunsch vam Speakär öi nu mit dum Leila hei wär dum Publikum im Zält igheizt und si komplett üssär Schnüf und än halb Stund spetär wiedär im Studäntudepot, ä Instrumäntudepot, (sorry wiä chumi äch uf denu Värsprächär?) gsi, wa där Raoul lüthals und absolut värdiänt äs Zigizägi het durchgigä. Mis persönlich Martyrium het de churz druf agfangu, wani nachume Plätzli, wa beschi Zunge behöiptent das heigesch äxtra värgiftut willi scho letsch Jahr äso blöd ubär z Ässu reklamiärt ha, (wer het de scho gäru äs Plätzli wa nur üf Fett bisteit) agfangu. Mit unärträgliche Maguchrämpf het dische hiä d negschtu dri Stund, zämugikauert, wiä än Schluck Wassär inär Kurva, ufum WC värbrungu und vam Fäscht so ziemlich ubärhöipt nix meh mit värcho. So värmagi jetz öi nit z värzellu wiä de das Fäschtji nu värlufu isch. Äs isch mär abär z Ohri cho, das nu ziemlich feucht fröhlich isch witär gigangu. Biär hets immär gnüäg ka, da wär scha gad Harrassuwies bstellt hei. Natirli nur, dass där Sämi, la Blonde und z Tschaggini hent chännu äs Kunststück probiäru, wa de abär in d Hose und die dri Artischtu wiä än Sack Härpfil z Bodu sind gigangu. Alls andra va dem Abu miässedär halt jetz sälbär mit viel Fantasie üs de Fotos va där Janine interpretiäru. Am dri ämorgu, ich natirli froh, äntli Heim chännu z ga, het nisch de där Alain öi wiedär abholt. Ä Busfahrt wirkt abär ab und züä öi Wundär, so das ich de z Stäg unnina mis värgiftut Ässu uf värchertum Wäg wiedär ha chännu los wärdu. Danke Alain hesch so schnäll mägu stellu :-)

Z Sängerma acho hani vär eis mal du diräkt Wäg richtig Bett gnu und nit nu uf die Garage gizielt. Und das obwohl där Raoul und d Janine schich öi mal zum hertu Chäru hent chännu zellu. Das het mi de scho bitz hert ka, weni da so älleinzig im Bett bi gliggut. Abär äs isch de nit 5 Minüte gigangu hani z Hüstiri kehrt üfgah und scho het schich än Meuta Chnäschär ins Leiggisch Hüs befundu. Die bescht Äntscheidig, da d Leiggini ja sturmfrie hent. Ime Hüs is schliässlich wermer als inär Garage und eppis z Ässu hets öi nu. Nachdem was miär de nach där unfriewilligu Nahrigsmittelabgab eigentlich wiedär güät isch gigangu hani mi de halt öi nu vär äs heissus Himbeerthe zum hertu Chäru gsellt. Där Sämy het de nu gseit är choche nu vär alli eppis und scho het schi där Läx inär Chuchi igfundu und Spagetti vär alli ubärgita:-) Gässu hent de abär numu 3 vam Hertu chäru. Zwei hent sus vorgizog witärhin uf dum Couch z ärniächtru und där andre het schine Mago nit scho wiedär vor än Herüsfordrig wellu stellu. Und so is de doch öi scho ämorgu im 6 gis, wan ich mis Bett gseh ha und där Raoul und d Janine du Heimwäg agiträttu hent.

 

Dadärmit hei wär äs witärs Wuchunänd Guggumüsiggschicht gschriebu und ich freuu mi scho uf z negschtusch Kapitel wa heisst, Umzug 2012 Leigg-Suschtu. Ich freuu mi uf ew. Än güäti Zit und bis bald, ewe Webmaster.

Ah ja, z Rätsel mit dum immär glichu Foto in ischär Gallerie hani de mittlärwil chännu üflesu. Abär das isch än andri Gschicht und würdi jetz definitiv du Blog sprägu. Ich bringus de z negsch Mal. Let che la ubärraschu...

So jetz aber, Solothurn, 06. Februar 2012

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Die Nacht der Rekorde...

Liäbi Chnätscherinne und Chnätschär

Wiär si scho z mitscht dri inär Fasnacht 2012. Scho in 2 Wucha starte wär in Fasnachtswucha. Zersch ämal hei wär abär am letschtu Samstag wiä jedes Jahr mit ische Nachbüru, de Mesireccas därfu z Gast si. Wiä gäng isch ja öi das Jahr kei Bus uf Raro gfahru und so het schich z Sängermaner Fraktion va de Chnätschär am siebni ämabu bi där Garage vam Xandi igfundu. Eis Biär als Afangssterchig und mindestens 2 igipackt vär uf du Wäg, hei wär nisch de ä viärtil Stund spetär wellu üfmachu Richtig Raron, bis de abär där Sämy, gschnälle wiän är isch gmärkt het, das schis Instrumänt ja gar nit da isch. So het är schich also nu uf d Süäch nach schinär Wumma gmacht, mit tatchräftiger Unnärstitzig vam Xandi und wiär andru hei du Wäg unnär d Fiäss gnu, dass wär de öi pünktlich z Raron ufum Dorfplatz hei chännu acho. 

5 Minüte z spat und trotzdem nu d erschtu siwär im Getummil vor dum grossu Umzug ufum Dorfplatz z Raron igitroffu und scho bald het nisch ischi Präsidentin mitume Schmunzlu begriässt und mitgiteilt, dass wär de hittu gar nit zrughaltund miässe si, sondern scho jetzt mit dum Laffu chänne afa, da wär ja scho am 20 ab 9ni ische Üftritt wärde ha. Abär das mit Laffu gälte de nur unnär där Bedingig, daswär de d negsch Wucha am Sampanchos alli trochu bliebe bis zum Üftritt. Also bitte nit värgässu:-) (Das wird zwar schwer, abär wiär wärde nisch Miäh gä Carol) Getreu nach dum Motto, was där Präsi seit, wird schnüärstracks üsgfiährt hei wär nisch also nu vor dum Umzug äs Biärli zwei gnähmigt, bevor dass de mit där Schlampa Richtig Schibumoos isch maschiärt wordu. Küm inär Wermi hei wär nisch de ä güäti Stund spetär bereits wiedär im Instrumäntudepot igfundu und nisch uf ische achsofrüäh Üftritt vorbereitut. Na Glick isch d Halla bereits zu dem Zitpunkt güät gfillti gsi, so dass äs öi zu der früähu Stund het Gspass gmacht mit dum Stand up die Bühna z beträtu. Zackig und ohni grossi Värschnüfpause hei wär dum Publikum än sehr güäte Üftritt mit dum Schlüpfer, dum Leila, dum Voule-vous und där Schlampa gibotu und hei de güäti 20 Minüte spetär total värschwitzt, abär mit dum Gfühl ä supär Üftritt ka z ha di Bühna wiedär värla. Där Sämy, mittlärwil wieder mit Wumma, hets sus so genial gfundu, dass är schich agmassu het, gad z Ziggizäggi z ubärnäh. Das het schi där Raoul aber nit wellu la biätu und het sus äs zweits mal gad dopplut so lüt gibrungu. Nach dem güätu Üftritt hei wär z Pflichtprogramm va dem Abu ärfolgrich abgschlossu und si de ämi in d Halla vär du Durscht z leschu und du Abund mitänand z gniässu. Und äs isch öi wirklich än Abu zum gniässu gsi. Nei, äs isch die Nacht der Rekorde gsi. Nit nur will z Tschaggini där halb Abu mitäre anderhalb Litär Cocafläschu um du Hals rekordvärdächtig d Üsdühr va schine Halsmuskle demonstriärt het. (Ja äs isch im Fall wirklich nur Coca gsi). Nei, öi will där Sämy eiditig demonstriärt het, das är die gregschtusch Schnurra, und das büächstäblich, vielliecht zwar nit va där ganzu Wält, aber im mindestu va de Oberwallisär Guggumüsige, het. Und darmit het är öi gad z Foto vam Abu vär schich reserviärt.

 

Zwei jungi Schnare hent wennsch das gseh hent gad öi miässu probiäru obsch susch äbufalls chännent. Schliässlich, so het ja eini va bedne gseit, dass cha mini Kollegin öi, die bringt alls ins Mül. Und weni nit nu so Paff va z Sämisch Riesuschnurra weri gsi, hetti mi die Üssag gad zudumu derbu Spruch la värleitu. Wie dem auch sei (und ja äs isch Ehruwort nur Coca gsi, ich ha äxtra öi probiärt) anu Sämy isch an dem Abu niämär me dra cho. Äso dehnbar isch kei Normalstärbliche. Die Karriera wierdi witärhin mit grossär Üfmärksamkeit värfolgu. Abär darmit is nu nit alles gsi. Mit äre Eleganz und Liächtigkeit, wa di delfinänlichu Schwimmbewegige vamene Michael Phelps und die hochwohlglobtu Piruette vadäre Denise Bühlmann absolut inu Schattu stellent, het d Janine im Mördärthe-Thebeutil-Hochwurf punktgenau und immär wiedär ins Ziel gitroffu und darmit du negsch Rekord üfgstellt. Weri di Disziplin olympisch, d Janine würdi als "die" Schwizär Medalliuhoffnig im Summär uf London fleigu:-) Abär öi die bereits bekannti Üsdür va de Porretschchnätschär isch an dischum Abu rekordvärdächtig gsi. So hent schich öi im viäri ämorgu nu än grosse Hüfu gälb kleiduti Chnätschära meh odär wenigär torklunt inär Cubabar igfundu, vär hiä nu äs Mördärthe meh z trichu. Natirli nur darfär, dass z A-Kadär va där Mördärthe-Thesack-Hochwurf-Schwizär-Nationalmannschaft irusch Training het chännu fortfiähru. So is de halt cho, dass irgendwenn öi inär Cubabar sind d Liächtär agigangu und d Securitas langsam üfdringlich sind wordu. Där Sämy, het schich de churz vär uf „WC“ värabschiedut. Und hetti ich nit so än güäti Mama, wa appa öi mal an irusch eltrusch Sohn deicht, weri där Sämy klangheimlich müättärschseeluäleinzig inu gross Cheep igstiegu und heim gfahru (Das wärde wär där so schnäll nit värgässu). Abär dum Eli, und ämene sackstarchu Vibrationsalarm va z Sebisch I-Phone isch z värdanku, dass de so öi nu di letschtu Chnätschära doch nu äs Auto vär Heim hent ka. Will wenn de d#r Sämy, die Monstärschnurra, Leiggenär de scho ufum Bifahrärsitz gipennt het, het die bescht Mama va där Welt, ira kehrt än Oscar, nei än Nobelpries värleiht, gideicht ich ärkundigu mich doch gad mal nach alle andru und nimu di öi nu mit. So siwär de also z siebt richtig Sängerma, via Visp gfahru. Vär eis Mal isch de also nit där Alain, sondärn z Eli ischi güäti Seel gsi, wa nisch alli sichär heim gibrungu het. Und obwohl, odär vielliecht grad wills das mal kei Bus isch gsi, sondärn äs total ubärfillts Auto, het z Partyhirni vam Raouli öi dasmal z Signal vär z ABC-Liädji an schinu Stimmbändär witärgigä. Äs Bildji vär d Ewigkeit, wiä där Raoul um Luft ringund zum negschtu Ton üsghohlt het. Nit dasär z wenig Sürstoff hetti ka, abär äs isch halt nit so liächt lüthals die schönstu Liädär azstimmug wenn där Diego z Gfühl het, du sigesch än Matraza und Astalte macht, dass öi in volle Zig üsznützu. Z Visp acho is de wiedär ä biz gmächlichär züä und här gangu. Z Diegi het die sanfti Schultra va där Petra gfundu zum schi azlähnu, im Auto is wiedär rüähig und viel meh Platz gsi und öi där Samuel het schich wiedär unnär du Läbunde befundu und per Whats up nach där allgemeinu Befindlichkeit va du Mitgliedär nahgfregt. Wiä die isch gsi, wellti che nit voränthaltu. Hiä bitte schön.

 

Promillegladu und meh gits dadärzüä glöib nimme z säge :-)

Ä schöni Wucha wünschi che und bis am Fritag. Ewe Webmaster.

P.S. Äs isch de wirklich nur Coca gsi, glöibet märs und cha mär bitte mal eine ärkleru wiäs därzüä chunt, das in ischär Galläri jedes Album mit dum glichu komischu Foto afat?

Solothurn, 30. Januar 2012

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Mit Ach und Krach am Bärg in Üssärbärg

Witär geits im Programm vanär Fasnachtssaison 2012. Nur ei Wucha nach dum üsschweifundu Fäscht in Saas-Fee hent schich die Porretschchnätschär wiedär gitroffu. Dasmal bi ische nordöstlichu Nachbaru, de Grabatzuchlepfär in Üssärbärg. Bereits am viärtil ab 6i hei wär nisch inär Fästhalla igfundu. Schnäll hei wär chännu feststellu, das wär alli gsund va Saas-Fee si heimcho, susch weri ja nit alli öi hittu wiedär da gsi. Sogar z Tschaggini het du Wäg uf Üssärbärg gfundu. Mittlärwil wiedär där Herr va schinum Flachma und där Pauke und nit z värgässu im Vollbsitz va schine körperlichu und geistigu Fähigkeite, het är nisch schis Martyrium va Saas-Fee zrug in schis Bett värzellt und nit ohni z schmunzlu hei sus wiär zär Känntnis gnu, wohl mit dum Hinnärgedanku hittu vielliecht eis odär öi zwei Biär wenigär z trichu, dass nisch nit uf z mal de genau glich wird ga:-) Obwohl, das mit eis zwei wenigär trichu het mit dum Schminkclub va ische Porretschchnätschär wohl öi scho zu der früähu Zit nix meh gibrungu. Multitasking sei dank, hent schi scho wärund dum Schminku meh odär wenigär teif ins Glas odär bessär gseit inu Churze glüägt, so das einige scho wennsch cho sind, an där Koordination gfehlt het. Aber alles halb so schlimm, äs git ja kei Umzug und de chamu bis zum Üftritt nu biz ärniächtre und mit feine Penne Bodu güätmachu vär spetär. 

Öi das mal hei wär scho wiedär früäh uf die Bühna därfu, miässu, sellu. Äs Zeichu, das ischi neu Präsidentin, sus wohl um einiges Bessär im Griff het z losu als z Sebi. Darfär is abär öi ä Stuck länger gigangu. Am Achti isch z losu gsi, Präsi und Vize hei wär abär erscht am Nini wiedär agitroffu. Was schi ä ganzi Stund lang zwischu dri mitänand gitriebu hent, das bliebt wohl irusch Gheimnis, aber schi hent sichär nit än Stund lang Loosjini gizogu :-) Wie dem auch sei, am viärtil vor 10ni hei wär nisch alli im Instrumäntudepot igfundu und si de mit Ach und Krach, äso wiäs halt öi soll si bim Krach am Bärg zär Bühna marschiärt. Mim Stand up si wär öi das mal uf di Bühna und güäti 20 Minüte spetär total värschwitzti mit där Schlampa wiedär drap. Zwischu dri du Leila, där Schlüpfer und du Twist und nit z värgässu än wahnsinns Asprach va ischum Vize, hent ische Üftritt dasmal abgrundut. Obär jetzt güät, super oder ehnär nhhnja isch gis, sei mal dahingestellt und isch und bliebt doch immär wiedär än Diskussionspunkt nam Üftritt im Instrumäntudepot. Äs Ziggizäggi hets ämil am Schluss de doch nu gigä und so hei wär nisch uf z räschtlich Fäscht an dem Abu chännu fröiuu.

 

Und das isch de öi gad feuchtfröhlich witärgigangu inär Halla und därnäbu im chleinu Chälli, wemu dem so darf säge. Da ja kei Bus heim isch gigangu het öi jede so lang chännu machu wiän är het wellu, odär zumindest, bis de d Müsig üfghert het spielu und d Liächtär alli sind agigangu. Spetestens de hent nämli öi ische Musikus und z Diegi gmärkt, das där Krach am Bärg vär 2012 fertig isch und hent schich z Füäss richtig heimwärts bigä. Ich vär mine Teil ha scho bald ämal va minum Körper die zweithegstusch Alkoholwarnstufa miässu z gspieru värcho. Higg, het mis Zwärchfäll gmäldu, higg, där Pegill isch langsam am ubärlöifu higg. Gottseidank, higg, hani nu churzerhand, higg äs Auto gfundu, higg, und hami darmit so schnäll wiä meglich heimghigginut. Tja, das isch halt äbu Fasnacht. Drum värmagi jetz öi nit z säge, wer wiä, wenn und wodurch isch heimgangu, abär äs Vögeli het mär gizwitschrut, dass glöib där hert Chäru sus vär eis Mal nimme ini Garage gschafft het. Zum eintu wohl darum, will där Wäg gad nit da durch gfiährt het, zum andru abär sichär öi, will zwei „Hertchärumitgliedär“, obwohl dasch bereits im dri ämorgu z Üssärbärg gstartut sind, du Sängermanerbodu ersch am 6i ämorgu hei unnär du Fiäss ka. Die Info isch aber nach wiä vor ohne Gewähr und müässi mär de zersch nu la bestätigu. Wer nechärs dadärzüä weiss, z Gästebüäch isch vär jede Hiwis zu dem ominösu Zwischufall z ha :-)

Nichtsdestotrotz hoffi iär heigit alli ewe Wäg zrug Heim gfundu, ob mu jetz darfär 20 Minüte odär dri Stund brücht isch ja nit va Belangu. Jetz wünschu ich ew erscht mal än schöni Wucha und äs ärholsams, Üftrittfries negsch Weekend. Ärholet cha güät, will scho am 28. Februar geits witär bi ische südwestlichu Nachbaru de Mesireccas an irusch scho fasch traditionell Fasnachtsnacht. Nit värgässu, öi uf Raro wird kei Bus fahru. Viellicht geit där eint odär andre du Wäg uf Raro und zrug ja scho mal bi Tagesliächt ga inspiziäru.

Bis bald ewe, Higg, Webmaster

Solothurn, 16. Januar 2012

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

De starte wär appa mal bi de Saasini...

Liäbi Chnätscherinne und Chnätschär

Jetzu si wär definitiv in d Fasnacht gstartut. Mit ischum Üftritt z Saas-Fee bi de Feer-Nola si wär an dischum Samstag in ä strängi aber garantiert güäti Fasnacht üfgibrochu. Nach dem wa am viärtil (ok, 20 ab 6i) d letschtu Mitgliedär picobello gschminkti im Bus hei chännu begriässu, hei wär di langi Fahrt ins Saasärtelli gnu, wo wär de am viärtil ab 7ni öi alli gsund si acho. Voller Motivation hei wär nisch richtig Turnhalla bigä, natirli nit ohne zwischudri nu imene Baarli halt z machu. Schliässlich müäss mu doch du Flüssigkeitshüshalt ständig im Öig bhaltu. Nach ämene feinu z Nacht, wa vär eis Mal nit värchochti Penne sind gsi (deschi gits de das Jahr nu gnüäg), si wär im schönstu Schneetriebu mit samt Instrumänt zrug uf du Postplatz vär nisch vär du Umzug zwäg z machu. Nach dem wa wär ischu Instrumänt igwermt und ischu Körpär mitume Glasji Warme wiedär üfgwermt hei, si wär de öi scho mit dum Tiger in du Umzug gstartut. Nur churz hei wär nachär chännu durchschnüfu bevor dass wär de scho am 10ni uf die Bühne inär Halla hei sellu ga üfträttu. Zum erstu Mal si wär mit dum Stand up uf die Bühne igmarschiärt, was sicher allne freit gmacht het, will wär denu doch sooo intensiv giäbt hei. Mit dum Voulez-vous hei wär de dum Publikum du Ton agigäh, bevor wär mit dum Rammlär (zugegeben mit ämene ziemlich fragwürdigu Abschluss) jedes Tanzbei hei zum schwingu gibrungu. Där Leila, mitäme super Trompetusolo am Afang, und där Schlüpfer hent ischärs Programm abgrundut. Gäru hetti wär öi nu d Schlampa zum bestu gigä, abär da wär d Üftrittszit bäreits ubärzogu hei, was nisch där Speaker dezänt durch die Blume het la wissu, hei wär de nachär die Bühne värla und ische Üftritt mit dum obligatu Ziggizäggi abgeschlossu. 

Was amene so früähu Üftritt güät isch, isch dass wär jetz ohni Hämmige hei chännu eis ga ziä, vär nit zsäge ga z süffu. Äs paar va isch hent de die Gläguheit wellu nutzu und z Saasär Nachtläbe in de Pups ga testu. Nit ubär lang sind de plötzlich abär wiedär alli Chnätschära inär Halla, z vodrusch an där Bühna gstandu und hent lütstarch vam DJ z Spice Girls gfordrut. Dadruf hei wär de aber nu gfühlti 5 Biär miässu wartu. Bis ämorgu üs hei wär de, so wiäs soll si, alli zämu, im Egg zwischu Bar und Bühna mitänand gfäschtut und d Fasnacht gignossu uns nisch nu sportlich bimene Füässballmatch betätigt, bevor dass nisch de där Alain im dri ämorgu wiedär abholt het, vär nisch sichär Heim z fahru. z ABC-Liädji eis Mal va vorna bis hinnärna durchgsungu und scho si wär z Visp gsi. Va da a is de wesentlich liesligär witär uf Sängerma gangu (Wora dass das wohl gläggu het?) Ich glöibu ich müäss nit ärwähnu, dass där hert Chäru.... na ja, iähr wisset ja, äs isch wiedär mal spat wordu.

Somit wünschu ich ew än agnähmi Wucha und freuu mi scho uf negsch Samstag, wenn's de heisst, Krach am Bärg in Üssärbärg. Unnärandrum und vor allum öi mit isch Porretschchnätschär.

Bis de, ewe unvärdiänt Schämdihüätträger

Solothurn, 09. Januar 2012

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Fasnachtsüftakt mit Schnaps(zahl) :-)

11.11.11, was vär än Schnapszahl. Tja das Datum hei wär als Guggumüsig zwar värpasst, was abär nit soll heissu, das die Porretschchnätschär nit doch die neu Fasnachtssaison iglitu hent. Wer nit scho äbu am 11.11 d Schnapszahl mit Schnaps bignossu het, der het de definitiv am Samstag dum 12.11. darmit agfangu. 

Öi das Jahr isch ischi Guggumüsig mimene Üftritt bi de Schattuschlickär z Agaru in d Narruzit gstartut. Agfangu mit ämene Umzug, wa wär vär eis Mal ohni ische Musikus hei miässu üscho, hei wär öi im Aschluss z Platzkonzärt mit Surfer und dum Rammlär einigermassu ubärstandu und nisch de üf gmacht du Abu richtig z gniässu. Mit Biär und Vodka und andre nit nechär bezeichnute aber allsitzbekannte Flüssigkeite hei wär zämu uf die neui Saison agstossu. Nit ubär lang, nadem wa öi där Stefan und där Jonas schich nu zu isch gsellt hent, hei wär de öi gmärkt, dass wär doch tatsächlich ämal wirklich där ganz Värei awäsund si (Komplimänt). So hei wär nisch güät vorbereitut um die halbi eis üfgmacht ins Instrumäntudepot, wa wär nisch uf ische erst Bühnuüftritt vorbereitut hei. Am 10 vor 1 is de so wit gsi und die Porretschchnätschär sind uf die Bühna inäre vollu Turnhalla z Agaru gibättu wordu. Ab dri und los hets also gheissu und scho sind d Chnätschära uf där Bühna gstandu und hent mit dum Blues losgleit. Där erst Bühnuüftritt va där Saison isch natirli immär speziell abär äbu öi asträngund und so het schich ische, fürsorglich um schinu Müsikär kümmrunde, Musikus vär äs churzus abär intensivs Programm äntschiedu. So het öi jede va isch alls gigä, bevor d Chnätschära schich de wieder alli im Instrumäntudepot zum obligatu Ziggizäggi zämugfundu hent. Där eint odär andre weri ja viellie liäber nu biz länger uf där Bühna gstandu und dische odär jene isch doch froh gsi, daswär nisch bim „erschtu Mal“ nu biz zrugghaltu hei. Wie dem auch sei, so glöib ich het där Musikus schinu Müsikär eis Mal meh richtig igschetzt, so daswär än güäte erste Üftritt hei zämu chännu ärläbe und äso hets öi nu glängt, daswär zämu vär isch sälber nu eis Liädji im Depot hei chännu spielu, wa natirlich nimme ganz zo perfekt het miässu si, sondern, wa d Freid am spielu im Vorärgrund het gstandu. Wiä där änglisch Dirigänt, Tomas Beecham schön gseit het, „Das Wichtigste ist: Zusammen anfangen und zusammen aufhören“ Und so isch äs doch immär nu z gmeinsam Müsiziäru wan isch alli Jahr vär Jahr wiedär ufu Sportplatz z Sängerma und an so mängum Fäschtji wiedär zämu bringt.

Instrumänt also wiedär värümt is sofort wiedär witär in z Barzält odär in d voll Turnhalla gigangu, um die, vam müsiziäru, trochunu Kehle mit chaltum Biär odär ämene gspritztu Wiesse z nätzu. Schnäll, nei viel z schnäll ist de plötzlich öi scho morgu am dri gsi. Die gross Mehrheit het de z Agibot vam Porretschbus sehr gäru agnu und schich uf du Heimwäg gmacht. Die wa sind da gibliebu hent sichär nu lang und üsgibigt uf d füft Jahreszit agstossu. 

Deheimu z Sängerma acho het schi gizeigt, das die letschtjährig igfiärti Tradition, inär Imsängischu Garage nu där letscht Absacker ga z näh, Bestand het. Obwohl z Joni ja jetz nimme bis uf Sängerma fahrt het där Alexander das Amtji va schim Brüädär ubärnu und isch die Port üfgmacht und nu äs Biärli spendiärt. Hiä där hert chäru, wa inär neuu Saison wiedär fasch glich üsgseht, wiä am Änd va där altu Saison (nit nur va de Persone här, sondärn öi va de Züästand:-) ). Im Wissu darum, dass jetzde ziemlich lang geit, bis zum negschtu Porretschchnätschärüftritt, hei wär nisch de tatsächlich nu bis im halbi füfi ämorgu därzit gla, bevor wär nisch in ischu heimeligu Betti bigä hei. 

 

Ich danku alle Mitgliedär vär denu schön Fasnachtsüftakt. Vor allum die Tatsach, dass wär alli, wirklich alli sie da gis het Freid gmacht. Das där Sven nu vor dum Üftritt leider het miässu gah und dadärbi die Bilanz ganz wenig gfälscht isch, värzelle wär jetz nit. Ich danku ew alle vär die müsikalischu Leistige, was nit soll heissu, das wär di kommundu Iäbige gitrost chänne üslah, nei die näme wär öi nu voller Elan und Isatz. Und ich danku dum neuu Komitee unnär där Leitig va där Carol(e) (neu glöibi wiedär mit e, abär das kleri nu ab) vär die supär Organisation, uf dass die negschtu Üftritta öi so ribigslos ablöifent. Und zum Schluss abär nit z letscht ischum Musikus dum Stefan, wa nach ämene langu Müsigkonzärtabu öi nu där Wäg uf Agaru gfundu het um isch ohni Problem durch du Bühnuüftritt z fiärhru (Gäbet mu di goldig Trillärpfifa). 

Somit freui mi jetz scho uf du 7. Januar 2012, wa wär de voll in d Fasnacht wärde startu und obena bi de Saasini wärde üfspielu. 

Bis de, vollär Vorfreit, ewe Webmaster.

Solothurn, 14. November 2011

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Und zum Schluss nu där TNT...

Liäbi Chäntscherinne und Chnätschär

Und scho wiedär isch än Saison durch. Die einuzwänzigsti va de Porretschchnätschär. Und wiä die zwänzig vorär, (ich cha zwar nur vär d letschtu 6 Jahr redu) hets schich öi das Jahr sichär wiedär vär ew alli glohnt. Wiär hei va miär üs gshe wiedär än Hammärfasnacht ka. Am Gigelizistag hei wär scha de abär leidär scho wiedär miässu beändu.

Darum hei wär wiä immär där Fasnacht än gibührunde Üsklang gibotu. Ämabu im siebni hent schi z letschtusch Mal vär das Jahr die Porretschchnätschär ins mittlärwil zum Teil „schwiidräckig“ Kostüm gizwängt und schich mit de Instrumänt zumene Apéro inär Apérogarage igfundu. Nu bevor das d Chnätschära agstossu heint, hentsch scho ubär die värganguni Saison sinniärt, zmindest die wo nit vorzuna alls värgässu hent. Am halbi achti siwär de gstartut, vo där Garage richtig Wolfji. Da het z Leigginär Eli scho du ganz Namittag fesch du Chochleffil gschwungu, das de di Porretschchnätschär appa öi eppis warums zwischu di Beisserchen värchement (Äs grossus värgältsgott därfir, nit das schi sus scho gnüäg hetti mit zwei Chnätschära wa ra jedes Wuchunänd d Hitta mit Konfetti värsauent, nei schi isch sogar bereit die ganz Müsig la z cho, jetz chunts ja sowieso nimme drufa, odär). Zu däre grossu Portion Älpermaccarone, hei wär de numal d Fotos vam vodrigu Weekend z Plaffeien aglüägt und hei nisch mit dum eintu odär andru vor Lache fasch nimme mägu ka, odär äs isch dum Fotosujet grad d Schamesröti ins Gsicht gstiegu :-)

Scho bald hei wär nisch de üfgmacht, vär du Rundgang durch die Porretschchnätschärheimat witärzfiähru. Abär halt, da isch doch nu eppis gsi, chunt pletzlich där Carol zi. Will du Abu vorär am Gigelimentag z Turtma het ja z Tscherrig Lilly nu gross plagiärt, dass die Porretschchnätschär immär än grosse Bogu um irusch Hüs meche. Das hei wär natirli nit uf isch la sitzu, und will ja z Lilly, züävärlässig wiäsch isch sichär scho z Biär und du Wii ufum Tisch het, hei wär churzärhand ä Routuändrig vorgnu und si schnüärstraks vor z Tscherrigs Hüs ufum Raso gsi und hei eine zum bestu gigä. Abär ersch we wär de so richtig gitröötut hei, het plötzlich äs schüchs, bereits im Pyama steckunds Lilly zum Feistärli üsaglüägt. Mu chännti gad fasch annäh, schi hei z Gfühl ka wiär chäme sowieso nit. Abär bi der Härzlichkeit wa schi isch de nachär in irusch Chuchi empfangu het isch das ganz sichär so giplants gsi. Meh wa viär Biär brüchts ja öi nit vär ä Guggumüsig :-) Äs grossus Danke dum Lilly und dum Beni vär z spontan üftischu. Negsch Jahr cheme wär de wiedär, das hei wär mit Präsidialvärfiägig gad zär Tradition ärklehrt.

Där Zitplan isch mittlärwil öi scho ziemlich gstraffte gsi, schliässlich het nisch ja nu die Kerstin und där Chrigi bi schich ärwartet. Also si wär de schnäll mal wiedär das värdammt steil Stutzji wiedär äbrüf gigramet und füf Minüte spetär siwär scho wiedär vorume Biär und äre Platte Hobilches ghocket. Schnäll dum Chrigi nu zum XX. Giburtstag äs Ständli gsungu und Chost und Logie gignossu hei wär nisch de abär tatsächlich scho wiedär ufu Wäg miässu machu. Susch bringe wär nämlich du Rundgang bis z Mittärnacht nit fertig. Ich weiss nit obs de dra glägu het, das d Mitgliedär vor Dunkelheit d eigunu Instrumänt nit gfundu heint odär am Fiäbärblattärli vam Musikus, abär plötzlich heint alli äs annärs Instrumänt wa irusch eigunda ine Händ ka. Darfär müäss mu natirli eifach lütär spielu, de fallt das gar nit üf. Und so hei wär uf dum Räscht vam Wäg meh odär wenigär äs Revival im Miniformat vam Monstärkozärt Plaffeien gigä, also jede spielt eifach irgend ä Ton und de machtmu ja öi Müsig :-) So hei wär nu ufum Dorfplatz zwei Stickär zum bestu gigä und sie de nachär mehrheitlich spielundu ufu Sportplatz zum definitivu Abschluss gluffu.

Churz het där Präsi de nu (das Mal wirklich zum letschtu Mal) z Wort an die obärmegasupär-Chnätschär grichtut und allne vär die tolli Fasnacht gidankt und de is de öi scho so wit gsi. Mit ämene lachundu und flännundu Öig hei wär mit dum TNT d Fasnacht 2011 mitume hüärre Krach värabschiedut und nisch z glichum scho uf die kommundi, negschti närrisch Zit gfreut. 

Jetz gits ä chleini Pause was sichär einigi brüchent und ganz sichär alli värdiänt hent. Zum Schluss wellti mi numal bi allne bedanku vär geili Üftritta, äs Hammär Highlight innär Üssärschwitz, viel Lache und nu meh Gspass. Iär sit di Beschtu und ich freuu mi scho wenn am 11.11.2011 am 11 ab 11 wiedär ä neui Fasnacht därhär chunt. Hoffuntli wiedär mit ew allne zämu.

Bis bald und gniässets 

Ewe Präsi

Solothurn, 9. März 2011

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Sprachlos und schlaflos in Plaffeien…

Odär, warum dum Raoul währund dum Spielu z Pipi isch cho, där Sämi bi schinär Froschkönigin abgiblitzt isch, s dum Sven du Bodu unnär de Fiäss gnu het, där Schämdi hüät ufum genau richitgu Chopf isch gsi, där Präsi im Schlafsack du Bodu giputzt het und Plaffeien das Schwizär Dorf mit där hegschtu I Like Button Dichti isch? Odär Churz gseit, d Antworte uf d Frage wa gar niämär gstellt het. 

Liäbi (hammärobärmegageiliiärwelltsuswissuundnimmeüfherudfasnachtgniässu) Chnätschär. Z letschtusch Fasnachtsweekend va dischär Saison heiwär numal so richtig ginossu. Und als ob wär wisse, das di schönstusch Zit vam Jahr jede Momänt värbi isch, (wisse wär ja tatsächlich) heidär d Fasnacht numal so richtig wellu läbe. Abär fe wär doch va ganz vorna a.

Där feist Donnstag isch das Jahr spat gsi, abär natirli nit z spat, vär das d Chnätschära scho nimme megi. Wiä jedes Jahr si wiär an dischum Tag ischum Dorf treu giblibu und hei am Namittag im zwei du Umzug ufu Sportplatz agfiährt. Där Start inäs strängs abär ärfolgrichs Wuchunänd het also agfangu. Ufume güät gfilltu Sportplatz mit bessär gfillte Mänschu (natirli nur zum Teil), hei wär de öi nu zwei dri Mal äs paar Stickär va isch zum Bestu gigä. Vor dum Iheimischu Publikum, so wiäs soll si, mit viel Applaus. Üfgwermt mit warmum Wii, wasch nisch de öi nu in Petfläsche mitgigäh heint, siwär am früähu Abu de witär richtig Saniglas, ähhh, ich meinu uf Brig zum Pampersfäscht. Will nach vielne treue Jahr bi dä Gufärjoopini hei wär nisch hier mal gideicht, wieso de nit diräkt inu Gätsch? Viel chani allärdings zu dem Abu nit säge, nei ich bi nit glaffne gsi und weiss nix meh. Im Gäguteil, ha am Fritag wiedär därfu ga schaffu und bi drum ganz seriös am 10, nachume güätu Üftritt ufum Sebastiansplatz vor där Sebastianskapälla (schöne Namu), ab Heim ins Bett. Das het mär sälbschvärständlich so güät wiä niämmär nah gmacht und so wiän ich ärfahru ha, het där Gätsch nu gfätzt. Will lüt mine Insiderinformantu sind gad mal 3 Lit de am dri mit dum Bus heim, und där Räscht het witär eine durchgigä. Üssärdem selle gi anschienund währund där Instrumäntuschnitziljagt, fasch ä Wand umkiet si, will än Halbschlafunde Chnätschär wohl schis Rhythmus- odär Blasgrät da hinnärna värmüätut het. (Tja, där gschiedäre git na) :-). Hani das so richtig ubärgibrungu Informant? Wie dem auch sei, wiä jedes Jahr heint im Gätsch di meistu ersch Heim gfundu, wenn de d Sunna wiedär isch üfgigangu, abär äbu im Dunklu findut mu ja öi du Heimwäg nit, also normal. Ob schliässlich alli z Bett gfundu hent odär einigi gad im Gätsch sind gibliebu wissen die Götter, soviel chani säge, am Samstag sind z mindest wiedär alli Topfit (Haha) zwäg gsi vär ischärs Highlight va dischär Fasnacht.

Pünktlich wiä immär am zwei het nisch där Rene ufum Parkplatz z Sängerma üfgladu und „pünktlich“ wiä immär 5 Minüte spetär, isch öi z Steffi züägstigu und där Bus het de als erschtes d Instrumäntuschnitzeljagt chännu beändu, indem daswär uf alle Näbustrasse nu entluffuni Bongos, Paukes und Sousis zämugläsu hei. Scho bald siwär abär de komplett biladu öi scho uf där Autobahn gsi. Knapp uf Hundärt bischlöinigt hent schi öi scho die Brunzbäbe vam Diänst gmäldut vär än erschti Blasuäntleerig. Zwei Brunz und Sigäretpause, än Ärklerig, das äs Lavabo keis Pissoir isch, än ständig jeissunde Sven, ä schuppu nimme volli Biär und nu viel meh I Like Buttons spetär si wär de im schönu Fribourgerland in Plaffeien dum Bus entstiegu und hei zersch mal äs Packigsdepot par Exellence üfgibuwt. Nachdem wa nisch de där Padu Nr. 1 fa där FAKO Plaffeien härzlich, abär mime skeptischu Blick, in Ämpfang gnu het, hei wär de öi scho di Zimmär in ischär 5-Stäru Residänz bezogu. Där Sämi het diräkt z obär Stockbett gnu, än grosse Fehlär wiä schi de spetär het üssagstellt. 

Mit de Instrumänt beladu und bereit alls z gäh hei wär nisch de ufu Wäg zär Schlörgge-Höhli gmacht, wa im Dorf „Oberschrot(t)“  z findu isch gsi. Där Dorfnamu het de abär definitiv schinum Namo nit alli Ehr gmacht. Will der Abu isch alls andra wa schlächt gsi. Nachume wirklich feinu z Nacht (und das will eppis heissu wenn die Werter mis Mül värlehnt), hei wär de öi scho fasch miässu startu vär die Beizutour. Där Päscu Nr. 2 (odär där Einzig und wahri Schämdihüätträger) het nisch de vor där Schlörgge-Höhli in Ämpfang nu, und eigentich värsprochu där ganz Abu u isch üfzpasse. Nit 5 Minüte spetär hei wiär vor där erschtu Beiz chännu innär chelti warte und där Schämdipäscu het inär warmu Spunta äs heissus Kaffee-Fertig gschlüft. Irgendäswenn hei wär de abär öi inu exklusiv Alpuklub chännu, wa nisch bereits äs enthusiastischus Publikum und viär mobili Dusche hent zum erschtu va vielne Üftritta hina ämabu bigriäst hent. Spetär hei wär de nu in Ärfahrig gibrungu, das där Alpuklub unnär Insider eigungtlich die „Gastlose“ gnännt wird. Abär nit so an dischum Abu. Nachdem wa de z Pädi und z Pädi halbnackt (mu geit ja öi nit agleits ini Dusch) än Pseudowäsch absolviärt hent, hei wär de öi scho wiedär witär miässu. Retour ins Fäschtzält in Oberschrot(t). Hiä hei wär am halbi zähni voräme ärstünt grossu Publikum zu der früähu Zit där Üftritt uf där Höiptbühna gigä. Där Schämdipäscu hei wär de hiä z letschtusch Mal eiguntlich richtig gseh, meh vam Programm het är de nämli nimme kännt. Gottseidank hei wär abär nu än üssärüs fähige Lehrling ka, wa nisch tapfär witär va Beiz zu Beiz gfiärt het. 

Küm sind de d Lippe wiedär ärholt gsi, d Lunge wiedär mit gnüäg Luft gfillt hei wär de öi scho wiedär im Lil` Vietnam du negscht Üftritt gigä. Sogar du Twist (mine Liäblings) het nisch där Stefan hiä la spielu. Ä chleini Ärfrischig zwischu durch und witär, ja wiär hei äs strängs Programm ka di Nacht. Abär mittlärwil si wär de öi scho mit där zweitletschtusch Beiz gsi. Im Hirschen hei wär inär megamässig gfilltu Beiz chännu üfträttu und öi da hei wär numal alls gigä, im erschtu und im zweitu Stock und im Stäguhüs und vor dum Restaurant. Jetz siwär in Fahrt gsi. Schnäll is gigangu und tatsächlich hani de im letschu Beizji nu dum Schämdipäscu där Schämdihüät wiedär chännu abluxu. Susch weri är glöib nu hittu im Zickzack in Plaffeien unnärwägs, so wiä där Raoul wohl öi nu hittu würdi WUMBA WUMBA singu, hetti wär nu nit gstoppt. Z offiziell Programm isch de im eis ämorgu durch gsi. Abär das isch kei Grund vär die Porretschchnätschär Heim z ga. Ersch rächt nit, wewär mal inär Üssärschwitz si. Nei die Porretschchnätschär heint nu lang gmacht und gwirkt. Där Sämy isch unnunärbrochu bimiäht gsi, öi dum letschtu Fäschtbsüächär nu än I Like Button azmachu. Öi schinär Froschkönigin hetär eine wellu uf z Butti chläbe. Abär leidär isch mu där Rock de z vor cho unnär die chleinu fettu Tschagge und de het där Sämy anstat d Froschkönigin, du Bodu giküsst. (Äs Königrich vär dasi das hetti chännu gseh). Darfär han ich än andre geile Sturz chännu mitärläbu. Gäll Sven das gits halt wennt där Zug nit sichrusch. De schräkt di halt z Insrumänt nach hinnärna, steisch där churz schnäll uf du Rock und scho hesch z Biär im Gsicht anstatt im Magu :-).

Vär mine Teil isch de am 3 ämorgu fertig gsi und ich hami uf äs paar Stunde schlaf gfreut. Abär wiä das so isch, mit ischär Müsig isch nit an Schlaf z deichu. Küm im Schlafsack dri und d Öigu züä, het (scho wiedär där Sven) z Gfühl ka ich gäbe än güäte Wischmopp ab. So hani de im Halbschlaf än Gratisrundi durch die Turnhalla därfu dreju. Ok, jetz abär bitte ä bits Schlaf. Abär wiäs halt so isch, ä Schutz nix und de där Sämi. Schis Kajütubett hetär de doch nit wellu beziäh. Miäd nach umene Strängu Chläbervärteilmarathon hetär de ämorgu im füfi numal alli miässu wecku, nur das är jetz an schine Schlafsack chunt. Abär güät, näme wärs so hin. Näme wär öi du Tschagini hin, wa ä knappi Stund spetär in einer Lütsterchi alle chunt ga zileggu, das ja hiä im Schlafschlag än hüärre Rüäh isch, und är darum jetz nu eine geit ga schnappu. Ä churzi Nacht also vär alli. Sumi heint sus sogar gar nimme bis ini Turnhalla gschafft und hent sus schich zwischu zwei Pauke bequem gmacht odär sind wiä där Pädi, hina geit nixme, Wyss, ubäröipt nit Heim cho.

Mit ämene wirklich sensationellu Frühstück hent de doch ärstünlichärwis ganz vielni va isch Chnätschär du Sunntag scho ämorgu im Nini im Hirschen agfangu. Früäh hei wär üfmiässu, will wiäs där Namo scho seit isch z Frühschoppenkonzärt ämorgu früäh. Fär die Porretschchnätschär het das gheissu, dasch als erschti Guggumüsig am halbi elfi ämorgu dum Publikum därfent iheizu. Churz abär chräftig Gas gä und nachär lang lang d Sunna gniässu und du vorgängig Abu la Revue passiäru. 

Nach äs paar Nahtagsbiär isch de z Chopfweh öi bi dä letschtu wäg gsi, odär äbu ersch cho. Und de hei wär numal so richtig därfu därbi si. Am zwei siwär inu Umzug gstartut und ich ha scho Angsch ka, das die Porretschchnätschär du Umzug zämu ufum Cardinalwagu wird abfahru. Abär leidär hets zwenig Biär ka, das vär du ganz Umzug und vär alli glängt hetti und so siwär de doch z Füäss und mit där Schlampa spielund dum supär gfilltu Dorfplatz ängäggugrüädrut. Vor sichär mindestens 1400 Lit (soviel Chläbra het där Sämy z värteilu ka), hei wär de diräkt aschliässund anu Umzug numal äs paar Stickär va isch chännu Pris gä. Abär va Ärschöpfig keis Zeichu. Där Börnär isch nämli de ersch cho. 

Wiä vär mich is wohl öi vär vielni andri Chnätschär z erschtusch Monstärkonzärt va irusch Karriera gsi. Där Stefan het sus därfu äröffnu, und so hent alli Guggumüsige ische Tiger zum Beschtu gigä. Alli Guggumüsige zämu hent de va jedär Guggumüsig eis Liäd gspielt, und spetästens wenn där Tornero isch cho is de glöibi öi um du letschtusch Chnätschär gscheh. Dum Raoul is sogar so igfahru, dasmu währund dum Spielu z Pipi isch cho. (Kei Angsch, natirli nur z Öigupipi). Ä wundärbare Momänt vär jede fa isch und absolut unbeschreiblich, drum probiärisch ersch gar nit. Ich bi eifach sprachlos zum Ersten gsi. Fasch wäggiträttu vor Freid hets de leidär öi scho gheissu ga d Sache packu. Z Üssärschwitzärwuchunänd isch värbi gsi, abär het schi vär ewigs in mine Hirnwindige festgsetzt. Unbeschreiblich, abär ich probiärus glich. Hiä mine Momänt va där Fasnacht 2011: 

Total kaputt setzi mi inu weich Reisekonfort-supär-Standart-Sitz. Där Bus fahrt langsam zwäg, ich realisiäru das äs lang giplants Weekend äs Änd nimmt. Vor miär äs Hammär- Sunnuunnärgangspanorama und äs Biär. Hinnär miär die geilscht Guggumüsig am ABC-Liädji singu (Abär där Raoul het gschwiget). Minu Gidanke, ca. 1 Stund hinnärna dri in Slowmotion numal am gniässu.  Ich märku wiäni mär d Üssicht uf immär iprägu und schaltu di Näbugrüsch in minum Chopf uf gidämmt. Und de chunt das Gfühl. Kännedär sus? Eppis oberhammermässigs isch durch abär mu cha sus nit la wägga. Und du chlammrusch di in Gidanke dra und eiguntli fühlsch di so güät und trotzdem müäsch fasch än Träna odär zwei värtricku. Alli dinu Sinna sind jetz gschärfti. Dinu Öige fent Bildär i, wamu öi mit dum beschtu Fotoapparat nit chännti festhaltu. Där Hörsinn schaltut schich jetz komplett ab, sogar d Nasa nimmt alls üf und spichrut sus unnär unvärgässlich ab. Du gspirsch wiä där schi jedes Haarli üfstellt, nimmsch numal än teife Atumzug und lasch dine Momänt eifach diär la kehru. Ich hoffu vär ew iär kännets öi, will susch fehlt che eppis. Das chunt sältu gnüäg vor und ich ha so freit, dasmär mit minär Guggumüsig het därfu passiäru.

Immär nu ganz üfgwiählt nach zwei Stunde agnähmer Fahrt, und man höre und staune, mit nur einer Pinkilpause, heiwär de am friächu Abund öi scho d erschtusch Chnätschäri ischärs Marielle die (Meer)jungfrau z Turtma abgladu. So siwär de va Dorfji zu Dorfji und die letschtu im Bus, heint zu de Kläng va Lady in red vam Chris de Bourgh (mittlärwil übrigens im Wiedärholigsmodus uf minum I-Phone) am halbi achti irusch und du Plundär wa d andru värgässu hent inär Garage vam Joni abgladu.

Där hert Chäru, d.h. z Joni und zwei Leiggini heint de nu z mitlärwil traditionell Biär inär Garage gitrüchu und öi schi sind de z friedu nach ämene längu und hammärmässig sensationellu Weekend Heim gigangu.

Ich värzichtu uf än witere, sentimentale Wortschwall und sägu eifach nur äs grossus DANKE. Interpretiäret da dri wasär wellet, ich bi mär sichär iär sprächet mär üsum Härzu. Bis moru wenns leidär scho heisst, wiär fire du Abschluss vanär Fasnacht 2011

Ewe Präsi

P.S. Das müässi nu säge "Lyra". Ich chas immär nu nit ärkleru was dara lustig isch, abär di was ageit, heint jetz ä Smile ufum Gsicht :-)

 

Solothurn, 7. März 2011

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

..... SPEECHLESS, DANKE VIELMAL :-) >>>>>

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Äso hei wär du Voulez-vous nu niä üfghert, definitiv nit. 

Da bini wiedär, vär z letscht Wuchunänd numal la Revue passiäru. Ich hoffu z ABC-Spieli het che z Wartu ärträglich gmacht, und will wär ja das jetz scho durch hei, miässe wär das afa am Sunntag va Plaffeien zrug nimme machu:-). Agfangu am Samstag ämabu in Raron. Da hei wiär a där Dorffasnacht mit Beizutour därfu därbi si. Mitäre leidär ä bits chleinu Truppa, hets am halbi siebni im Bärgheim gstartut. Ä churze knappe Üftritt vor umene ehnär chleinu bis winzigu Publikum wa wär hiä hei chännu gä, siwär nachär öi scho witär. Där äng Zitplan het nit gross Platz gla, vär äswa gmiätlich z si. Abär wiär si ja cho vär d Lit z unnärhaltu und das hei wär de doch sichär gschafft. Nach Üftritta im Burg, Rarnerhof, Rilke, Wiichüäfa und im Motel hei wär de du Chreis, komplett durchnässt, am halbi 12 chännu schliässu. Dene wa sind da gsi, wellti bestens danku. Iär heit eifach d Lippa äs bitzji feschtär gnätzt, d Schlegra äs müü lütär gschlagu und die Zunga äs paar Mal meh g spitzt und scho het mu die eppis värchleinrut Truppa gar nit wirklich gmärkt. Nachume letschtu Mal zämu astossu im Motel heint schi de alli ufu Heimwäg, bzw. uf d witäri Achs gmacht, will richtig Näscht sind nit mängi gigangu. Schnäll isch de öi äs Instrumäntudepot z Mitsch im Restaurant gstandu, scho heint schi di meischtu wiedär in Visp bi där Fasnachtsäröffnig wiedär gfundu wa mu schi de meh odär wenigär nu bis in d friähu Morgustunde het amüsiärt.

Nachume churzu aber heftigu Powernapp hei wär de du Bus wiedär bessär chännu villu und bereits am viärtil ab eis im Sunntag siwär ab uf Leigg-Suschtu an du gross Fasnachtsumzug. Nu schnäll alli Instrumänti gsund, bis uf z Sousi, im Motel abholt, het där Umzug nimme uf schich la warte. Gottseidank isch z Wättär am Afang nu einigärmassu güät gsi, so das z Warte nit gad ganz so unangnähm isch gsi. Nachume güätu erschtu Umzug hei wär de aber trotzdem nu im Rägu miässu Müsig spielu. 

Extrem Wättärgfrustut hei wär nisch de churz druf wiedär watschnassi alli inu Bus gsetzt und sie vär du zweitu Teil äbrüf uf Leigg gfahru. In dem Momänt hetti schi nit wenigi gfreut, chänntisch doch die Zit äs paar Stund vorstellu und ganz sichär alli heint schich, viellicht z erscht Mal, mit irusch Kapuza doch nu chännu afreundu ;-)

Där Petrus het de abär ischu Stossgibäti richtig Wolchudecki doch nu ärhert und küm siwär üs dum Bus üsgstiegu, und nahdem wa d Janine ändlich irusch Dachrinnufetisch het pris gigä, hets scho wiedär üfgita. Tja mit där beschtu Guggumüssig lachet äbu öi där Himmil. Und de sind de doch numal alli so richtig ins Fäschtu cho. Eis zwei Biärlini und där eint odär annär Sandwiche odär Bratwurscht spetär heint schich alli ämil wiedär z friedu zwäg gmacht vär du zweitusch Umzug durch die Burgschaft va Leigg. Nach dum Umzug isch wiä immär vor dum Üftritt. So hei wär de zum Abschluss numal äs paar Stickär vor dum Restaurant Traube zum beschtu gigä. Und eis müässi eifach säge, äso hei wär de also där Voulez-vous definitiv nu niä üfgehrt ;-) Das het abär värgott niämärt gmärkt. Wiä bi där beschtu Blaskapällä isch doch das eiditig äs Degreschendo gsi und kei Fehler, halloooo, wiär und Fehlär, zum lache. Mehrheitlich zfriedu, abär ganz sichär froh, scho bald üs du nassu Schüäh chännu z stiegu siwär de därna öi schnäll ämal im Bus gsi richtig Heim und wiär hei nisch sogar nu chännu ärholu, nix ABC.

Tja, wiäni scho gseit ha, jetzt ersch Rächt. Geit jetzde die eiguntlich Fasnachtswucha los. Ich freuu mi uf du Donnstag, und du Samstag und du Sunntag, und du Tsischtag und öi du Mittwuch weni de ändlich im Bett bi. Bis bald

Ewe Präsi.

 

Solothurn, 01. März 2011

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Hallo liäbi Chnätschärinne und Chnätschär,

Vorab schomal danke vär äs ärneuts cools Üftrittsweekend mit ew, z zweitletschta va dischär Saison. Fär dasärmär nit nu värruckt währdet und z gfühl heit ich sige gstorbu (odär äswa am Schlussil süächu), will där Präsiblog nit zär gigwohntu Zit wird im Nätz si, wellti che jetzt scho um Geduld bittu. Äs git än strängi Wucha d negschta. Will bereits moru hei wär scho wiedär Üsgang, wiär fiere z 25-jährig Bestehen va ischum Kolleg Andy. Das, obwohl ich nach wiä vor z Gfühl ha, är sige am Ninuzwänzigschtu giboru und därfe nur nit säge dasär doch eigentlich ersch viäri isch. Wie dem auch sei, drum hani halt moru nit därzit vär du obligat Präsiblog z schriebu. Ich värsprächu che abär, dasär scho im Tsischtag ämabu ärneut chent cho lüäge und de gits där neuschtusch Rückblick üs erschtär Hand vam Präsi persönlich. Bis de bittu ich um Entschuldigung und äs bitzji Patience und vär d Ubärbrückig va där langu Zit und das che ja nit längwilig chunt, hiä äs chleis Gidults, / Gedankuspiel, drum sägi,

NTSCHULDIGNG, kännt eppär äs Liädji mit...

 

grübel, grübel, denk, denk

Also, bis scho bald, ärholet che güät und vär alli wa jetz scho frie heint und gar nimme chänt abschaltu, eifach nit z viel va allum.

Ewe Präsi

Solothurn, 27. Februar 2011

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Iiiihhh ich sägu där, miär sind die Grime gigangu…

Minu liäbu Chnätscherinne und Chnätschär,

Äs isch wiedär äs Fasnachtsweekend värgangu, und de nu was vär eis. Där Fritag het afu mal ganz gmächlich miteme feinu Apero bi där Barbara und dum Sven agfangu. Äs feins Glasji Wii und Eiguproduktionssandwiches a la Sven hent nisch Bodu värschafft vär äs asträngunds Wuchunänd. (Darfär afa mal äs härzlichs Värgältsgott) Am halbi achti hets de agfangu mit dum gigwohntu Umzug bi de Sanpanchos zum Stäg. D Schlampa (darmit meini z Liäd) het nisch bigleitut bis zum Benken. Grad im Aschluss de än Jamsession zum Partyplatz wa die Party het chännu startu. Wohl will wär genau gwisst hei, daswär ja scho am Nini du Üftritt hei, hets de öi keis Haltu meh gigä und scho schnäll ämal sind de öi die erschtu va dene neuu super Trojkashots ischi Kehle äbri grunnu. Mini natirli nit, iär kännet ja alli mini Abneigig gägu Minigitränki mit Maxiwirkig, abär ich chumu nachär numal druf zrug. 

Wiä scho gseit, am Nini hei wär uf där Höiptbühna de chännu üfträttu und natirli dum Yvi zum Geburtstag gratulliäru (ca. z zähntusch Mal an dem Abu). Där Üftritt isch de öi wiä immär viel z schnäll värbi gsi, und nahdem wa alli irusch Instrumänt wiedär ine zwei Instrumäntudepots värsorgets hent ka (Welle Luxus, Rhythmus gitrännt va de Bläser:-)), hei wär nisch de öi scho schnäll wiedär alli zämu anär Bar igfundu. Där Räscht vam Abu wird wohl am Beschtu durch ischi Gallerie dokumentiärt, ich sägu numu ein Bild sagt mehr als tausend Worte und viele Bilder machen sprachlos:-)

Womit ich doch grad wiedär, wiä värsprochu, zrug zum griänu Gift im 2cl Glasji chumu. Abgläggu sindsch, die güätu Porretschchnätschär. Zersch ufu Büch, de z Gsöff ins Müll und nachär ä rundi toti Chüä. Hoffuntli hets che wenigstens gmundut, will abgseh va de Choste und und schwidräckige Kostüm, wa de übrigens bi 30 Grad und ohni Schlöidru än Wäsch chännent värträgu, hent einigi öi am Samstag där Tag durch nu mit grosse Glichgwichtsproblem und Magurebellion z kämpfu ka. Tja, ich has mittlärwil afa glehrt. Finger wäg va allum Neonfarbigu in Glesär wa chleiner sind wa mis Mundstück. Abär äbu, sgit öi settigi wa schwer va Bigriff sind odär sus eifach bis am Nahttag värgässunt, willsch schich sälber miässent ufu Nahtag konzentriäru. 

Ä schuppu toti Chiä und und Hirnzelle, natirli öi tot, spetär, hets de öi scho wiedär gheissu Abmarsch Chnätschära. Und ich chas eifach nit gnüät säge, im Dri, im Driiiiiiiiii fahrt de Bus. Abär wahrschinlich hets eifach nur dara gliggu, das eine, zwei nu vär z Bundesamt vär d Statistik die Breiti vanär Strass het miässu ärmittlu, daswär öi das mal wiedär äs Müüü z spat si abgfahru, odär äs ligge de dara, das alli wiedär gmeint heint äs löife so wiä Väru, und schi nit z früäh heint wellu ufu Wäg machu, dasmu nachär wiedär ewigs wiä in „Verschollen im Eis“ müäss ufu Bus warte. Man weiss es nicht.  Abär uf du Alain und schis Team isch halt Värlass (Öi darfär ämal äs Dankeschön) D Chauffeuru erträgend sus nämlich sogar ohni z Murru, wennt d Chnätschära amorgu im Bus nu äs Ständli vär schich sälber gäbend. Und das isch de wohl öi där erschtusch Vorbote vär du neu Tag gsi. D Lippe komplett üsgspielti, abär z friedu und lustig glühnt, hei wär de apa so ze viäre, (ja, ich weiss sus öi nimme so genau), z Sängerma du Bus chennu värlah. Heim ga, sichär nit. Joni mach di Garage üf, will jede abu isch nämli bald wiedär äs neus Mitglied da, wa schich nu vär äs Biärli laht la gwinnu. Obwohl, die Kerstin het de nur nu ä schüche Blick nach innina grichtut und isch Schnüärstracks abär appa bitz im Zickzack richtig vorgwermuts Bett. Öi där Chäru het de hittu nimme so mägu und so ischmu de relativ bald ämal öi richtig Heim gstartut, will moru isch ja öi nu än Tag mit Üftritt und Umzug. (Ah ja Sämy, äs geit eiguntlich öi lislig, wenn kei Müsig meh löift müäsch öi nimme so briälle).



Ok, chleine Zitsprung susch wird’s z lang. Kaffeegschmack värschwummus Bild vor du öigu und än stächunde Schmärz im Chopf, - momänt das isch zwenig wit - . Witäre Zitsprung. -  Keis Chopfweh meh, wiedär äs Biär ine Händ und uf z Steffi am warte. -  Jawoll jetz siwär wiedär ufum Parplatz (Apropos, z Steffi isch de dasmal pünktlich gsi, äs het nur gad so güät inu Satz gipasst :-)). Z Chopfweh isch Gschicht, di zwei Aspirin heint sus wiedär voll gibrungu. Z mindest miär. Abär ich ha scha schliässlich öi gschlickt und nit inu Hosusack gita (Säääämyyyy, so funktioniärt das mit de Medikamänt eifach nit, odär hesch appa gmeint äs sige Zapfjini? Das sind Analgetikum nit Anaalgetikum.

Jedufalls siwär alli ämel wiedär gstartut vär de Leiggär zum Viärtiljahrhundärt z gratulliäru. Und scho im Umzug hani gmärkt, das is hittu. Ok, beschi Zunge behöiptent jetz, nam Sanpanchos isch där Chopf klarär wewär z Leigg si, abär ich bi ubärzigt, dass schich di 17 Iäbige, mit immär fasch alle Mitglidär, voll üsgizahlt hent, will där güät Umzug hei wär mitumene sensationellu Üftritt zär sensationellu Zit am 11, inär sensationell vollu Hallu absolut gitopt. Äs isch so där Wahnsinn gsi, daswär nit hei chännu üfheru und än riesugrossi Zugabe nu obina im Instrumäntudepot gigä hei. Vär mich definitiv „der Moment“ va dischär  Saison 2011, bis jetz. Ich danku che alle va Härzu vär das üssärplanmässig Hammärkonzärt. Das sind Momente die bleiben. D Janine het sus de uf du Punkt gibrungu „Miär sind die Grime gigangu“. Ich glöibu dadärzüä gits nix meh z säge, eifach gniässu und witär so. Spontan isch eifach immär nu am beschtu. Die Euphorie het schi de so ziemlich bi allne öi bis am Schluss ghaltu und nu inär Garage vam Joni, vär das wär das öi wiedär dri hei, namäne tiptopu Heimliefärservice, heint nu alli va dem Momänt gredut. Ich glöibu ich chännti jetz nu Stunde lang schwärmu und chännti sus trotzdem nit so ubärbringu, wiä sus ich und wahrschlinli öi iär alli gspirt heit.
Mini Chnätschär, äs isch eifach geil gis, danke vielmal Ich gfrewu mi scho ufu negschtu Samstag, jetz ersch Rächt und hoffu uf äs witärs supär Fäscht mit minär Truppa. 

And last but not least, the Schämdigüät goes to ….. Tja die freit lahni mär jetz nit la nä. Iär wärdets erfahru.

Bis bald ewe stolz Präsi.

Solothurn, 21. Februar 2011

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Wer sus nit im Hirni het, het Bei…

Liäbi Chnätschärinne und Chnätschär

Öi an dischum Wuchunänd hei wär ischu Instrumänt gipackt und sus gwagt z ische Nachbüru ga än Üftritt z gä.

Pünktlich ämabu im siebni (Ha ha) hei wär nisch alli z Raro ufum Dorfplatz gitroffu und nisch zehrsch mal mit ämene Biärli odär ämene Glasji Warmu uf Betriebstämperatur gibrungu. (Unglöiblich abär wahr, öi där Mitsch het de doch nu, gfühlti 5 Minüte vor dum Fäscht tatsächlich schinum Susi nagfreht. Dum Joni sei dank wartet z Instrumänt nit nu hittu im Bus.)  Där Umzug, zär Abwächslig mal mit relativ viel Publikum und demzufolge enorm vielne Konfetti im Instrumänt, im Mül und im Biär, hei wär de am achti hinnär isch gibrungu. 

Nach dum Umzug isch gleich vor dum Üftritt und drum hei wär nisch alli schön bi där Getränkewahl zämu gnu, dass de das uf där Bühna zu spetär Stund öi nu eppis wird. Na ja, zumindest heint das fasch alli gmacht :-).

Nichts desto trotz hei wär än solide Üftritt chännu uf z Parkett leggu nd hei dum Publikum unnär andrum mim Voulez-vous, där Schlampa und dum Schlüpfär igheizt. Där Üftritt het gändut wiä immär mit dum Ziggi-Zäggi vam Raoul, und nit wenigi sind de appa öi froh gsi, fahrt hittu mal kei Bus. Ämal äs Wuchunänd ohni ABC- Liädi und dri Mal z Kumbaja my Lord, bzw. Qumbaja my Lord, odär mine Favorit Gumbaja my Lord :-). Und die waschi trotzdem ufe Bus gfreut hetti, dene chani nur säge, immär z positiva gseh, än luschtige Abu, „open End“. Jedufalls sind d Händ wiedär frie gsi und heint regilrächt nach ämene Biärli Üsschau ghaltu.

 


Fri nach dum Motto ab dri und ubär ani Baar, sind de bis ämorgu zu nachtschlafundär Zit nu äs paar Litär gflossu. Ich vär mine Teil ha mis Bett ämil ersch am 6i, wenns scho agfangu het Tage gfundu. Wil öi das Mal het där, ich sägu mal, hert Chäru, nu du Wäg ins Jonisch Garage gfundu. (Wird äch das nu zär Tradition?) Schlussändlich sind de abär appa alli nu einigärmassu güät und gsund heim cho. Die Beschwärde heint de apa ehnär spetär agfangu.

Z mindest bi miär het die gross Ubärrasschig nu uf schich la warte bis am Sunntag. Hiä drum nu än Tipp/Vorwahrnig/wiä-chamu-nur-so-dumm-si-Ärzehlig. An all jeni, wa du Hüsschlussil, willsch genau wissent, dasch nu susch värliärent, deheimu bi de Eltru ufum Schüäschaft lehnt. Z erschta wanär gfälligsch machet wenär z negsch mal vam Üsgang heim chämet, egal wiä glaffni dasär de sit, isch dasär denu värdammt Schlussil sofort in eiwi värflüächt Jaggutäsche ami tiät. Susch steisch nämli am Sunntag Namittag im füfi öi z Solothuru und freusch di scho ubere gmiätliche Abu, und nur 5 Minüte spetär wärtesch wiedär ufum HB ufu negschtu Zug richtig Wallis und nimmsch zum dämlichu zweitu Mal am glichu Tag die genau glichi eländ Reis in Agriff und bisch de afa mal am viärtil vor zwelfi ämabu z hudil und z fätzu vorär Wohnigstiri want jetzt ändlech chasch üfmachu. Tja, wers nit im Hirni het, het Bei, seitmu doch so schön, abär das isch än Gschicht vär äs annärs Mal…

Also de, bis zum negschtu ubärüs strängu Weekend, ich gfrewu mi uf ew,

ewe värgässlich, dämlich Präsi :-)

Zum drittu Mal zwischu Visp und Solothurn, 13. Februar 2011

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Säg, hei wär eigentli alli va Saas-Grund zrug gibrungu ?


Jetz geits richtig los, jetz hets ändlech agfangu. Mini Chnätscherinne und Chnätschär, ab jetz bis am März siwär jedes Weekend unnärwägs. Där erscht hei wär scho hinnär isch. Z Wurschtzipfilfäscht isch Gschicht und äs het gfätzt. Mim Üfrtitt zwar nit ganz z vordrusch dabei, darfär mim Fäschtu definitiv uf de Podestplätz, hei wär z Saas-Grund glöibi alli güät gwirkt. Ämil eis Leiggi het bis jetz nur va schich la kehru „FILMRISS“. Abär wells, wiär hei eifach z viel va dene Leiggis, da herrscht de appa nu Üfklehrigsbedarf :-). Hiä d churz Zämmuffassig:

Am viärtil ab sägschi ämabu si wär, wiä immär z spat, gstartut richtig Saas-Grund (ich glöibu das weis nu jede). Knapp acho hets öi scho wiedär gheissu ämüs in d Chelti vär du Umzug vam Tipi zär Halla. Gesagt getan und nachär z erchtusch Biärli gnähmigu. De zwei de dri odär viär und scho geits zum Üftritt uf die Bühnu. Zu däre humanu Zit, wiä mu müäss säge, (ich danku mär sälbsch), hei wär de äs paar va ische Stickär dum Publikum därfu zum Beschtu gä. Unnär andrum hei wär öi ischu zwei neuu Stickär gspielt und ich ha freit ka, daswär du Schlüpfer und du Stand up zum erschtu Mal vor Publikum hei chännu zum Beschtu gä. 

2 bis 3 witäri Biär spetär (jetz fent langsam värschwummunu Bildä a),

si wär, odär zumindescht ich, de öi scho zum negschtu Hungärrascht cho. Da chunt doch äs Plätzli im Brot gad genau richtig. Abär hallooo wiäviel mal müässi nu säge bitte ohni Fettischliss. Abär än ehemalige 5-Stärnu Choch isch natirli öi schwer z Friedu z stellu. (Ja ich weiss Eigenlob sticht, abär gottseidank schmäckt mu ja im Nätz immer nu nix) Abär där Chrüttärbutter isch de feine gsi. Abär genug der Gourmetkritik, nahrhaft is gsi und wiär hei nisch nachär wiedär dum Fäscht chännu widmu. 

Viel z churz spetär hei wär de öi scho du Raoul värzwiflut nach ämene Liädi mit AAAA kehrt süächu. Wa siwär de jetz, scho wiedär im Bus vär Heim. Va Saas-Grund bis uf Visp durchgsungu, ich glöib das isch än neue Rekord.

D letschut viär, hiä in Bild und Farb,hent schi de nu mim Joni inär Garage än Schlummärtrunk gigönnt und wädär da nu bis jetz chänne wär mit absolutär Sichärheit säge, ob wär eiguntlich alli vam Zipfilball zrug gibrungu hei. Hoffe wär jetz mal äs sigi so, dass wär öi am negschtu Samstag wiedär komplett im Mesireccas chänne Gas gä. 

Ich sägu danke, freuu mi scho ufu Samstag und winschu che alle än ärholsami Wucha.

Bis bald, ewe Präsi.

Solothurn, 7. Februar 2011

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Hallo Liäbi Chnätschäri, hallo liäbe Chnätschär

Nach äre längeru Pause fat de jetz öi ändlich di neui Saison anna. Agfangu hei wär scha das Jahr mit ämene Üsflugsweekend uf Vercorin am 28. Und 29. August.  Küm z Vercorin acho hei wär ischi Awäsuheit schön ubärsichtlich, abär durchüs unabsichtlich mitäre grossu rotu Wiilachu markiärt. Där feini Tropfu wa wär als Gscheich zum Jubiläum hei värcho hei wär ämabu eiguntli nu üs Glesär wellu gniässu..., jetz ischär halt ufum Gudro z Vercorin värluffu. Janu, äs isch ja nit so, dawär zwenig z trichu hetti mitgnu, wiär hei nisch sus sogar nu chännu ärlöipu än Teil vam Mineral ufär Strecki la z liggu:-)


Äs wundär siwär de wenigstens alli Mitgliedär güät im Schlag acho. Schnäll hei wär nisch sus inär wirklich schönu Unnärkunft gmiäthli gmacht, is de öi scho los gigangu. Ab ini und uf di Böima. Äbrüf chlätru, in äs Nätz springu. Mitumene hüärre Tämpo än Trioline abri gleitu und andri Hindärnis ubärqueru, da druf hei wär jetz scho sit där GV gwartut und äs het du Mitgliedär öi sichtlich Gspass gmacht. Sumu gad soviel, dasch fasch ganz sichär va äxtra immär Riggvora sind acho, dasch de öi so richtig dräckigi chämunt. Abär isch ja värständlich, so Sauereie het mu ja sit dum Chindärgarto nimme chännu machu:-)

Nach der hertu Asträngig het där Hungär de öi nit lang uf schich la warte und wiär hei feini Grillade chännu gniässu. Schad het z Wättär nit optimal mitgspielt abär öi innuwändig hent d Würschtli und die Plätzli gschmäckt. Merci dum Grilleur und dum Chuchiteam.

Im Aschluss is de mit trichfreudige und lustige Spieli witärgigangu. Z‘ UNO und d Janine hent zwar ziemlich glittu, nur mit dum Unnärschit, dasmus dum UNO am Nahtag wenigär het agseh. (Ich meinu de darmit z Bei, nit appa susch eppis:-) ) Zum Abschluss und bevor dass de alli üssär die Carol sind miädi gsi und ins Bett hent wellu, het där Wolf im Guggumüsigschlag gitopt. Güät gnährt und unnärhaltu und sichär mitumene Schluckji zviel im Blüät sind de die letschtu ämil öi nu churz bevor das d Sunna wiedär üfgigangu isch ga liggu.

Am Sunntag isch de öi dementsprächund ehnär än spati Tagwacht gsi, so das üsum Früähstuck de doch äs Mittag isch wordu. Na dum Früähstuck het de öi jede, allfälligi brummundi Chepf und värletzti Bei odär Muskilkatär zär Känntnis gnu, und schich darmit arangiärt und scho hei wär de ans üfrümu gideicht. Därna hent natirli nu die räschlichtu Biär unär de ziemlich raru Sunnustrahle miässu gignossu wärdu und zum Abschluss is vär vielie mit dum Monstärtrotti zrug uf Vercorin gigangu.

Ich danku allne Mitglidär wa an das Weekend sind cho und freuu mi scho, ew widär zu där erschtu Iäbig in dischum Jahr am 12.09.2010 ämabu am 6i chännu z begriässu. In dem Fall bis de, und leht ches güät la ärga…

Eiwe Präsi

Turtmann, 30.08.2010

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Hallo liäbi Chnätschärinne und Chnätschär

Es ist vollbracht. Z letschtusch Fasnachtsweekend va dischär Saison kehrt jetz öi scho där Värgnaguheit ana und äs het numal gfätzt.

Agfangu hets scho am Donnstag mit ischum traditionellu Üftritt vor ischum iheimischu Publikum in Sängärma. Am Namittag hei wiär ä flotte Umzug und äs paar va ische Stickär de Sängärmanär chnännu zum beschtu gä. Aschliässund sind de ufum Sportplatz scho di erschtu Biär gflossu und mit güätum sälbschgmachtu Chüächu hei wär Bodu gschafft vär ische Üftritt ämabu in Zaniglas. Vär da äbrüf siwär de öi scho im sächsi gstartut. Öi hiä hei wiär wiedär än supär Üftritt ka, wiä so vieli mal in dischär Saison. Am dri ämorgu is de mit dum Bus wiedär richtig Heim gigangu. Da sind de abär gad ämal dri Mitgliedär acho. Alli andru hent sus schich nit la nä, bereits z Visp umzstigu, vär nu ab dri inu Gätsch. Där Abu isch de vär d letschtu öi ersch am Fritag ämorgu zwischu nini und zähni (Die genaui Zit weiss leidär niämar meh) z änd gigangu. Äs ziemlich feuchtfröhlichs Fäscht.

Abär am Fritag ämabu hent ja de alli chännu ä chleini Pause ileggu, will där negsch Üftritt isch ersch am Samstag wiedär ufum Programm gsi. De hei wär nämlich ische Guggumüsigkollegu va Baltschiädär zum 20-jährigu Jubliäum chännu gratuliäru. Där Üftitt hiä isch de wohl eine va de Beschtu gsi an dischär Saison. Nit z letscht vielicht öi wägum Lando, wa schi nu mit schinum Ärschinu het beglickt. Äs supär Fäscht öi hiä. Allärdings nit vär alli, will ämorgu am eis het där Präsi nu mit där Andrea inu Notfall miässu. Schockschwere Not, was isch de da passiärt? Tja, di Dominique, die Eisenfaust, Brux, het in irusch Tanzwahn gmeint, schi miässe ä neue Move üsprobiäru und het churzär Hand ischär erschtu Trompeta d Nasa gibrochu. Heieieiei!!! Abär wiän iär hiä gseht sind beidi scho im Spital wiedär meh odär weniger wohl üf gsi.

 


Vär zrug ins Fäscht hets de abär nimme glängt. Und d Andrea hei wär fasch miässu deheimu afesslu, willsch unbedingt nu, trotz Schmärze, anu Gätsch het wellu. Gäru hetti che jez hiä ja nu di detailliärtu Röntgubildär gizeigt, abär leidär chani di CD nit üfmachu. Wie dem auch sei, das Weekend und die Dominique hent igschlagu wiä ä Bomba und ich bi froh, dasi öi dischi Fasnacht wiedär mit ew ha chännu gniässu. Scho fasch wehmüätig stelli fescht, dass das jetz öi wiedär isch gsi. Abär ei Alass bliebt ja nu, där Abschluss am Dienstag ämabu in Sängärma. Ich fröiu mi scho. Und schliässu wellti jez dische Bitrag mit ämene Üszug vam Spitalzentrum Oberwallis zär Patientenaufnahme vo där Andrea:

DIE PATIENTIN STELLT SICH PRIVAT AUF DEM NOTFALL IN VISP VOR. SIE WURDE VON EINER KOLLEGIN (DOMINIQUE, DIE EISENFAUST BRUX) VERSEHENTLICH AUF DIE NASE GESCHLAGENJ

Bis bald mini Chnätschär

Ewe Präsi

Turtmann, 14. Februar 2010

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Hallo Chnätschära

Äs isch wiedär äs bombastischus Weekend gsi. Am Fritag hei wiär zämu wiä jedes Jahr in Stäg am Sanpanchos Fäscht därfu üfträttu. Obwohl där Üftritt ersch am spetru Abu und die Teilnähmärzahl ä bits teifär wa susch isch gsi, hei wär dum Fäschtzält doch nu so richtig igheizt. Vor und nah dum Üftritt isch de abär öi viel los gsi. So het z Viki und die Carol nam Umzug äs chleis Apéro in irusch Garage offeriärt. Merci vielmal darfär. Einigi sind de öi gad fasch där ganz Abu inär Garage gibliebu. Abär keis Wundär, bi dene feinu Getränk. Am dri siwär de doch alli ziemlich miäd und durchgfroru gsi und hei heim wellu. Nun ja, das isch de scho äs schwierigärs Unnärfangu gsi. Pünktlich wiä immär J hei wiär uf du Bus gwartet. Nadisna sind alli Guggumüsige in irusch feinu, warmu Busa gstiegu, nur die Porretschchnätschär hent immär nur im Schnee miässu warte. Und wenn de öi där letschtusch Bus isch wäg gsi, hei wär de gwisst, eppis stimmt nit. Gottseidank isch de där Bus doch nu cho und die Porretschchnätschär hent die am Bodu agfrornu Bei losgrissu und sind in d Wermi gigangu, und de doch öi nu heim cho. Ich hoffu iär heigit öi alli nu so schöni warmi Dusch vorgfundu wiän ich. 

Am Samstag is de scho früä ämabu witär uf Leuk gigangu und äs het mi sehr gfreut, hiä ganz vieli ehemaligi Chnätschära chännu z begriässu, wa isch musikalisch unnärstützt hent. Ich glöibu vor allum z Duli isch sichär äns froh gsi J Öi der Abu isch mit ämene supär Üftritt ubär die Bühna gigangu, das obwohl, z Biär vorär gad Harassuwis gflossu isch. 

Ich danku ew alle vär du Isatz, wünschu än ärholsami Wucha und gniässet z negscht Weekend, wa mal nit so Üftrittslastig wird si. Wiär gseh nisch de am Sunntag in Leuk-Susten bim grossu Umzug.

Liäbe Grüäss, ewe Präsi

P.S. Man(n) ist ohne Handy und Laptop einfach absolut aufgeschmissen!!! Ein Erlebnisbericht. 

De han ich also am Fritag Namittag fri gmacht, mine Laptop und z Ladegrät vär z Natel uf Sängärma gnu, vär vor dum Üftritt nu d Homepage z aktualisiäru und hami vam Papa uf Sängärma la fahru, wili ja ämabu mit de Chnätschär mim Bus bi gfahru. So wit so güät un so viel zär Vorgschicht. Ah ja, z Natel hani übrigens de värgässu üfzladu. OK, also und jetz än grosse Zitsprung… Där Sebi ärwachet also am Samstag ämorgu am 10, steit gmiätlich üf und geit ga duschu. Was steit de hitu ufum Programm? Ja klar, Üftritt in Leuk abär was mache wär vorär nu? Apa ämuf uf Sängärma ga warte. Schnäll als zwäg machu, Gwand agleit und scho stani ufum Parkplatz näbum Auto. Nun ja, blöd nur chunt mär ersch hiä zi, dasi doch där Autoschlussil inär Jacka ha, wani gestär z Sängärma ha gla, und schlau wiä z Sebi isch, isch där Ärsatzschlussil vam Charru im Charru!!! OK, keis Problem, vär eppis het mu ja z Mammi. Schnäll äs Telefon und de chunt di mich sichär cho holu. Also nimi z Natel üsa doch värdammt, kei Reaktion!!!! Aku leer, Akukabel in Sängärma. Mist!!! Na ja, näme wär halt där negstusch Zug und Bus uf Sängärma. Mal ga lüäge ob ubärhöipt eine fahrt. www.sbb.ch. Also löifi zrug, di ganzu Stäge z Füäss hoch will där Lift nit geit. Ab in d Wohnig, i inz Wohnzimmär, abär Momänt, wo isch mine Laptop. Neeeeeeeiiiiiii, der isch ja öi z Sängärma. Was machi jetz? Kei Laptop, keis Handy, ich sitzu fescht. Gottseidank gits ja immär nu väreinzelt die komischu Kabine, wa äs Telefon dri heicht. Also wiedär in d Schüä und ab richtig Post. Acho, nimi där Gäldsack üssa, packu än Füflibär üs und süächu där Gäldschlitz, abär da isch kei Gäldschlitz. Ach du schande das funktioniärt nur mit Charta. Öi das nu, dummi moderni Wält. Sälbschvärständlich will mär ja jetz Glück gad ubärhöipt nimme hold si und äs funktioniärt nit ei einzigi Kreditcharta vo miär!!! Also zrug zär Tankstell und de di Frag, wa d Värchöifäri lüt irusch Blick wohl di letschtu Hundärt Jahr nimme kehrt het: „Heit iär öi Telefoncharte vär die Telefonkabina“? Und de hets de doch nu giklappt. Danke Swisscom. Mu brücht die viäreggigu Dingär äbu de doch nu siä. Und ew solls än Lehr si, wärdet nit abhängig va dene Maschine, tiät där Ärsatzschlussil ja nit ins Auto und chöifet uf jedu Fall vorsorglich än TelefonchartaJ

Turtmann, 31. Januar 2010

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Hallo mini liäbu Chnätschärinne und Chnätschär

Ich hoffu iär heit ew va de Strapaze am letschtu Weekend ärholt und heit güät in die neu Wucha chännu startu.

An dischär Stell wellti isch ew alle viele viele Dank säge vär ewi tatchräftigi Hilf an ischär 20-jährigu Jubiläumsparty. Äs het gfätzt und de wiä. Där Üftritt isch eifach genial gsi. So eppis hani ja nu niä ärläbt. Iär sit alli supär gsi. Merci öi de Ehemaligu wa isch unnärstützt hent. Und nit värgässu, d Fasnacht geit nu lang und iär sit an jedes Fäscht härzlich igladu.

Die Porretschparty sälbsch isch in alle Belangu än volle Ärfolgt gsi, und das isch nur ewum Isatz z värdanku. Unnär där supär Leitig vam Jogi und schinum OK hei wiär äs Fäscht uf die Bei gstellt, wa so schnäll niämär wird värgässu. Bis jetz hani eiguntli nur positivi Rückmädlige värcho. Na där Party sind de öi, wiä chäntis annärsch si, äs paar herrulosi Gäguständ üfgitöicht. Iär findet di unnär ischär Rubrik "Jubliäum". Wennär appa kehrt heit, das eppär eppis värloru het, chändär nu ja dadruf üfmärsam machu. Ei Gägustand in ischär Rubrik Lost and Found isch dische hiär:

 

Gegenstand: Äs Letschi, ca 180 cm gross, noch nicht ganz nüchtern, Fundort, eine Garage in St. German. Wer dieses Letschi vermisst meldet sich bitte beim Vorstand der Guggenmusik Porretschchnätschär.

Nei seich, Z Letschi het natirli am Sunntag ämorgu früäh öi als letschte Guggumüsikär nu heim gfundu. Mine Held vam Tag:-)

Und hiär nu eppis vär Z Päddi Wyss: Der Vertrag isch de bindund. Ich freuu mi scho uf d' Iäbige negsch Jahr:-)

 

Also, äs nöis Mitglied hettei wär de fär z negsch Jahr öi scho gfundu. Nach der tollu Party freu ich mich jetz scho uf du räscht vanär Fasnacht mit ew. Äs wird sichär supär, vor allum jetz wa wärs richtig chänne gniässu. Iär wisset scho, keis Üfstellu und Abrümu und am Nahtag du Rüsch üsschlafu.

Wiär gseh nisch, scho am negschtu Fritag anär Mesireccas-Night.

Bis de, ewe Präsi

Turtmann, 19. Januar 2010

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Hallo Chnätschäri, hallo Chnätschär, liäbi ehemaligi Mitglieder

Hei sind die 3 letschtu Iäbige genial gis odär was?!!! :-) Miär hets uf alli Fäll äns Gspass gmacht. Mit vielne ehemalige Mitglieder z zellu und vor allum öi Müsig z spielu. So hets schich de ärgä, dass wiär pletzli nimme numu ischu aktuellu Stickär giprobt hei, nei wiä hei öi Liädär wiä där Tequilla oder du Ten Years after mal wiedär gspielt. So cool.

Äs ligt jetz nu ei Iäbig vor isch und de isch öi scho wiedär Wiähnächtu und churz druf geits de gad bald ämal los mit där Fasnacht 2009/2010. Ich ladu ew darum alli numal i, öi am Samstag, 19.12.2009 an ischär Iäbig teil z näh, nit nur wäg dum Training vam müsikalischu Können, nei äs findut anschliässund an die Iäbig öi nu ä chleine Wiähnachtshock im Lokal statt. Es würdi mi also gfrewu dich da öi z gseh.

Vär alli was mit der negschtu Iäbi leidär nix wird, wünsch ich äs schöns Wiähnachtsfäscht und än güäte Rutsch ins 2010. Und ischär Guggumüsig wünschi ä sensationelle Rutsch ins 2010 mitäre hoffuntlich genialu Jubiläumsparty am 15. & 16. Januar 2010. Värbi z lüäge lohnt schich.

Also uf bald,

ewe Präsi

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Hallo Chnätschäri, Hallo Chnätschär

Ändlech het d Fasnacht öi vär isch agfangu. Mit ischum erstu Üftritt vanär Saison in Agaru hei wiär d'füft Jahreszit iglitu. Bsundrig is sichär öi vär d' Marielle und du Sven gsi, wil vär schi zwei isch das irusch erstusch Üftritt mit där Guggumüsig Porretschchnätschär gsi. Iär heit das güät gmacht. Kei Spur vo Lampufiäbär:-)

Äs isch än glungne Abu gsi. Güät mu hetti sichärlich öi ehnär chännu du Üftritt ha, abär iär kennet ja eiwe Präsi, der ziäht eifach immär falsch. Die Party sälbär isch zwar extrem nass gis, abär darfär äns lustig. Darfär wellti ich ew alle danku und fröiu mi scho uf d negschtu Üftritta.

Nun ja, so weit so gut. Där einzig Wehrmüätstropfu isch gsi, dass eine wa mit isch mim Bus isch mitgfahru (keine vane Porretschchnätschär, will di wissent wiä schich binä), het miässu inu Bus chozu. Dasch afa schlimm gnüäg, abär nachär nit ämal di Courrage ha und schich z mäldu, das findi isch där absolut Gipfil vanär Frächheit.

Wiä öi immär, wiär Porretschchnätschär heis ja susch lustig ka. Gniässet jetz än relativ längeri Fäschtärholigspause, will ab dum Januar geits de so richtig los.

Ei einzigi Bitt hetti nu an eiw. Chämmet nu zahlrich an die negstu Iäbige, dass de där 3 Tage Bart öi wirklich sensationell tent an ischum Jubiläum.

Beste Dank und dem Fall bis am negschtu Sunntag.

Eiwe Präsi

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Äs geit ändlech los...

Liäbi Chnätschäri, liäbe Chnätschär

Mit ischum Iäbigsweekend am 07. und 08. November 2009 si wiär ändlich in d' Fasnachtssaison 2009/2010 gstartut. Und dasch nit eifach ä Fasnacht, nei äs isch d Fasnacht zu ischum 20 jährigu Jubliäum.

Ich wellti alle Teilnähmär vam Iäbigsweekend danke säge. Äs isch äs intensivs Weekend gsi, mit viel viel Iäbu. Miär tient nu hittu d'Lippe we :-) Abär äs het schi glohnt. Wiär hei nit nur ischu ältru Stickär wieder istudiärt, nei där neu Dreitagebart het doch gägu ändi züä öi ganz kapabel gitent. Ok, där Schluss entspricht nu nit gad dä Vorstellige va ischum Musikus, abär das kriäge wär öi nu hi. Äs het mär übrigens äns Spass gmacht, daswär öi ämabu alli zämu si gmiätlich gsi. Wölfli sei dank. Ja ich weiss, ich has nit güät chännu :-) Abär äs isch lustig gsi.

Ich hoffu iär heiget che mittlärwil vam Weekend ärholt. Ich zu minum Teil scho. Ha nämlich am Mentag värschlafu und bi Stund z spat zär Arbeit cho. Abär isch schliässlich wichtig daswär fit si, wil am 14.11.2009 starte wär scho zu ischum erstu offiziell Üftritt an dischär Fasnacht. Wiär bsüäche nach 2 Jahr, mal wiedär ischu Kollegu in Agaru als Äröffnig va ischär Fansnacht zum Guggerball va de Schattugschlickär.

Ich freu mi scho. Ach ja, bitte pünktlich mim Bus si :-)

Eiwe Präsi

Leukerbad, 09.11.2009

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Liäbe Chnätscherinne und Chnätschär

Där Summär neigt schich langsam dum Ändi züä. Üs de Filp Flops wärdend Turnschüäh, die churzu luftigu Summärshorts wärden wiedär gägs di längu Jeans-Hose üsgitüscht und ubär dum T-Shirt treit där eint odär där andre scho wiedär äs wermunds Chilet.

Wiä d Vegil zu dischär Zit im Instinkt hent, schich uf de Stromkabel z sammlu und schich langsam auf gen Süden z machu, so weiss jede Chnätschär und jedi Chnätschäri, das äs langsam wiedär Zit isch, Z Instrumänt z näh, und schich am Sunntag ämabu gen Sportplatz in St. German z bigä.

Jawohl, ischu Iäbige vär d Fasnacht 2009/2010 fent bereits am 06.09.2009 ana. Ich gfreiwu mich ew alli de wiedär z gseh.

Also, machet che zwäg. Ab geits ine neui Saison!!!

St. German, 30. August 2009

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Hallo liäbi Chnätschärinne und Chnätschär und Bsüächär va ischär Homepage

Äs isch "Zwischusaison" vär di Guggumüsige. Abär im Hinnärgrund löift viel. So koordiniärt där Vorstand d Üftritta vär d negscht Fasnacht, informiärt di neuu Mitgliedär, fiärt di Bischliss va där Generalvärsammlig üs und und und.

Iär värchämet värmüätlich danufa nu nit viel mit, abär sälbstvärständlich steit ew där Vorstand fär alli Frage gäru zär Värfiägig, odär iär findet alls wichtiga hiä uf där Homepage va de Porretschchnätschär.

Bereits hei wiär öi scho z Datum fär ische Summärüsflug. Am Weekend vam 8. uf du 9. August 2009 geh wiär ins Val d`Annivier. Ich freuu mi scho ew bald wiedär z gseh.

Bis bald, ewe Präsi

St. German, 1. Juli 2009

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Mittlär

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Es ist vollbracht …

Liäbi Chnätscherinne und Chnätschär und Partygängär vanär 11. Rocknacht im Hangar

Öi das Jahr het am Ostärsunntag im Hangar z Raro wiedär d Rocknacht stattgfundu. Mitlärwil ja än feste Bestandteil vam Üsklang va där Fastuzit. Und an dischär 11. Üsgab hent die Porretschchnätschär d Organisation ubärnu. Wohl totmiäd sind zu dischum Zitpunkt alli Chnätschär deheimu inär Heija und tröiment vamene rüähigu, stressfriu Ostärfäst im nechstu Jahr. Abär ich wellti an dischär Stell, bevor ich öi todmiäd umkiju nu Danke säge.

DANKE,

dum OK unnär där Leitig vam Gsponer Andy vär die perfekt Organisation vam Alass. Und perfekt heisst mit isch, zum Schluss müäss mu gli nu churzfristig afa improvisiäru :-) Nei Seich, d Organisation ist wiä immär optimal gsi. Iär heit früä agfangu che d Chepf z zärbrächu und äs het schich glohnt. Ohni ew chännti wär hittu nit uf än supär 11. Rocknacht zrugblicku. Nachär,

DANKE,

de freepower, das schi öi das Jahr alles rund um die Bühna und d Müsig wiedär zwäg gmacht hent. Freepower kehrt zär Rocknacht wiä d füst ufs Öig. Natirlich im ubärtragunu Sinn und nit wortwörtlich. Apropos Bühna,

DANKE, 

Silent Voices, Rämis Spontan und Free falling. Ohni Rock kei Rocknacht und iär heit das Jahr definitiv im Hangar alls gigä. Ganz speziell in Ärinnrig wird sichär där Üftritt va freefalling bliebu. Äs isch nämlich där letzte ubärhöipt gsi. Ew wellti ich vär ewi persönlich Züäkunft alles Güäta winschu und hoffu iär wärdet där Müsig witärhin treu bliebu.

DANKE,

de friwilligu Hälfär va de Samaritär vo Raron. Im tiäfu Hinnärgrund vam Fäst spielet iär eini va de wichtigstu Rolle und nit wenigi wärdent ew sichär klangheimlich und ohni grossus Üfsehu nu lang nach dum Fäscht dankbar si. Obwohl, müäss mu säge het d Medizin das Jahr än zentrali Rolla gspielt.

DANKE,

dum Notfallteam vam Spital Visp will iär isch zwei mal nit allzu lang heit la warte. Ah ja, und d Andrea weiss de jetz was akut beditud :-)

DANKE,  

de Buschauffeuru vär die Gidult wan iär jedes Jahr mitbringed. Iär leht che eifach durch nix la üssär Rüäh bringu.

DANKE, 

där Türkisch – Deutschen Sprachverständigung und in dem Zämuhang äs härzlichs värgältsgott vär denu wa nisch nu churzfristig äs Zältji het zär värfiägig gstellt, dass vär Dürüm und Dönär isch gsorgets gsi. (Ä chline Insider, müäss mu nit värstah).

DANKE,

natirli alle Partygängär. Ohni ew hettis sälbstvärständlich keis Fäscht gigä und wiär hoffe, äs het ew öi das Jahr gfallu. Iär heit du Hangar grockt. Sumi vielie ä bits zviel, abär mittlärwil sellti doch öi där letschtusch Nahtag abgiklungu si. Ich hoffu d Müsig hei ew gfallu, die Gitränki gmundut und z Ambiente igfrahru. Natirli zelli uf äs Wiedärsehu am nechstu Ostärsunntag. 

DANKE,

alle Gönnärinne und Gönner. Ich hoffu öi iär sit alli am Fäscht gsi und heit sus gignossu. Finanziell heit iär isch wahnsinnig güät unnärstützt und ich hoffu iär heit darfär eppis zrug värcho.

DANKE,

dum Strassuputzmaschinumanji. Wennt du da bisch, gseh wiär äs langärsehnts Ändi.

DANKE,

alle wanisch in irgänd äre Form Material zär värfiägig gstellt hent. Ich hoff iär heit alles heil zrugfärchu 

DANKE, 

dum Hani und dum Wernär vär di supär Värpflegig. Jedes Jahr zöibret iär z feinschta uf di Tällär und schittlet sichär ä siä du Chopf will nit alli Zitplän so üfgent wiä wiär isch das vorgstellt hei. 

DANKE,

dum Team vam Restaurant Burg z Raro. Iär sit di beschtu und heit nisch än chräftige Zuckärschock gigä, wewär scho fasch nimme hei mägu. Iär sit eifach die allärbeschtu im Obärwallis. Äch was sägi, inär ganzu Schwiz :-) Und zu guter Letzt,

DANKE, DANKE, DANKE, UND MERCI VIELMAL,

alle Chnätschär und Chnätschärinne sowiä Hälfär und Hälfärshälfär. Iär sit z Zentrum und z Härz va där mittlärwil 11-jährigu Rocknacht und nit wenigi va ew sind öi scho sit där 1. Üsgab därbi. Ohni jede einzelne löift nix und würdi öi in Züäkunft nix löifu. Ich danku diär ganz speziell du Chnätschär, du Chnätschäri, vär dine Isatz zum Glingu va ischum Fäscht. Ich hoffu öi diär hets gfallu. Ich danku ganz bsundärs diär, liäbe Bekannte, Värwandte oder dummärwis ubär du Wäg vamene Chnätschär Glufune, wa nit het chännu Nei säge und schlussändlich schine Bitrag inäre Schicht anär ellftu Rocknacht gleischtut het.

So, jetz bini öi definitiv groggi. Ich hoffu ich hei niämärt värgässu und falls doch tüäts mär leid. Abär äs sige öi diär härzlich gedankt.

Där stolzi Präsi va där Guggumüsig Porretschchnätschär!!!

Gewidmet,

in dankbarer Erinnerung an 

DANI DEN DACHS

Er war flink, der Bus flinker

Seine Füsse waren zu kurz für diese Welt.

St. German, 13. April 2009

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Hallo liäbi Chnätschärinne und Chnätschär und Freunde va där Guggumüsig

D Fasnacht isch mittlärwil sit güät 2 Monat värbi und äs hent schich wohl alli wiedär meh odär wenigär därfa chännu ärholu. Natirli schlaft där Värei abär währund dum Jahr nit. Nei äs git immär eppis z tüä.

Z negsch gross Event vo ischär Guggumüsig isch sichär die 11. Rocknacht, wa am 12.04.2009 (Ostersonntag) z Raro im Hangar ubär die Bühna geit. D Vorbereitige löifent uf Hochtoure und ich wellti an dischär Stell dum Andy und schinum Team bereits Merci säge vär d Organisation. Öi das Jahr ärwartent di Bsüächär vo där Rocknacht wiedär 3 Liveacts. Mit vo där Partie im 2009 sind Silent Voices, d Rämis Spontan und die sagenhaftu Free Falling. Speziell zu dischum Act isch z säge, dass Free Falling anär 11. Rocknacht du vorläufig letschtusch Üftritt wärdend ha. Wiär fröie nisch daruf natirli scho extrem. 

Damit z Fäscht än Erfolg wird, wellti ich scho jetz alle Mitgliedär ans Härzl leggu, schich z ganz Ostärweekend fri z haltu, damit z Andy und schis Team uf jede va isch chännent zellu. Äs wird sträng, Arbeitslastig, abär sichär öi lustig. Und nit z letscht därfe wär öi nit värgässu, äs isch vär ische Värei. Ich freuu mich uf all Fäll scho jetz uf äs supär Fäscht, wa bestimmt än Ärfolg wird. Natirlich hoffe wiär öi uf dis Cho.

Äs isch abär nit nur die Rocknacht wa löift. Öi z Väreinsjahr müäss ja nu abgschlossu wärdu. Z Komitee het an schinär letschtu Sitzig churz vor där Fasnacht du Termin vär die GV provisorisch uf du 05.05.2009 agsetzt. Inär negschtu Wucha wird schich där Vorstand träffu und löige ob das Datum nu äs Thema isch. Im Witäru wärde wiär öi di Traktande vär die GV asetzu. Hesch öi du eppis, want an där Mitgliedärvärsammlig speziell willt vorbringu? Schrib mär äs Mail und wiär wärde öi das bi ische Traktande berücksichtigu. 

Soviel va miär vär du Momänt, wiär gseh nisch spetestens an där 11. Rocknacht am 12.04.2009 im Hangar Z Raro.

Bis de, heid che Sorg und gniässet du Fröähling. 

Ewe Präsi

St. German, 29. März 2009

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Hallo Chnätschärinne und Chnätschär

Heute war unsere letzte Übung vor den Auftritten an der Fastnacht 2009 und ich freue mich auch dieses Jahr wieder mit euch die Fetzen fliegen zu lassen.

Und nicht nur die Fastnacht läuft auf Hochtouren, bereits stehen die Daten für die diesjährige Rocknacht und unser Jubiläum im Jahr 2010 fest. Die Rocknacht ist wie immer am Ostersonntag, dass heisst dieses Jahr am 12. April 2009. Unser Jubiläum findet dann am 15. und 16. Januar 2010 statt. Für beide Feste arbeiten die OK's auf Hochtouren und ich möchte mich an dieser Stelle bei allen Organisatoren für die bereits getane und die bevorstehende Arbeit bedanken.

Im Besonderen die Rocknacht steht ja schon bald vor der Tür und heute hat uns das OK Gönnerbüchlein ausgeteilt. Also Leute, zeigt Enthusiasmus und sammelt Spenden damit dieses Fest und auch das Jubiläum ein Erfolg werden.

Ich freu mich jetzt auf Unterbäch am nächsten Freitag und wünsche euch eine schöne Woche.

Euer Präsimit einem RIESEN Dank an alle!!!

Leukerbad, 18. Januar 2009

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Langsam aber sicher wirds ernst. Eine intensive Fastnacht steht uns bevor. Gut gerüstet gehen wir unsere Auftritte an. Während einer kurzen närrischen Zeit werden wir wieder mehrere Auftritte und Umzüge miteinander erleben. Ich freue mich bereits, auch dieses Jahr mit euch eine einmalige unvergessliche Fastnacht zu verbringen.

Bis Bald

Euer Präsi

St. German, 11. Januar 2009

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Und beim ersten Auftritt gleich zwei Mal auf der Bühne. Das die Bilanz unseres ersten Anlasses an der Fastnacht 2008/2009. Das, und viele müde Augen, 100derte zurückgelegt Zugkilometer, 50 Blonde25 auf der Hinreise und 0 bei der Rückfahrt.

Der erste Auftritt ist geglückt und wird sicher in Erinnerung bleiben, denn endlich, nach langer "Üsserschwitz"-Abstinenz waren die Porretschchnätschär zu Gast bei Freunden an der Guggi-Night bei den Buchsi-Schränzern in Herzogenbuchsee. Nach einer mehr oder weniger kurzweilig ausfallenden Zugfahrt, konnten wir bereits um 15.40 Uhr auf dem Bahnhof den Organisator und Ansprechpartner für das Fest "Dr(.)" Mario begrüssen. Anschliessend bezogen wir die Unterkunft. Der Fussmarsch dorthin dauerte gefühlte 2 1/2 Stunden und nicht wenige fürchteten den Weg in der Nacht nicht mehr zu finden.

Anschliessend lud der Vorstand in die Pizzeria Sonne ein, wo das Abendessen serviert wurde. Danach konnte es mit dem Festen und Feiern losgehen. Bis dann um 00.00 Uhr die Porretschchnätschär selbst die Bühne stürmten. Als letzte Guggenmusik des Abend heitzten wir den Publikum noch ein Mal so richtig ein. Ein besonderer Auftritt erfolgte dann noch gut eine Stunde später, denn einige ehemalige Mitglieder der Guggenmusik, welche uns beim Festen unterstützten betraten die Bühne und zeigten uns, dass Sie ihr können an den Instrumenten noch lange nicht verlernt haben. Na ja, ist halt wie Velofahren. Es hat auf jeden Fall allen Spass gemacht und dieser Auftritt wird in Erinnerung bleiben.

Der Rest des Abend blieb offen zur freien Verfügung und nicht wenige schafften den Gang ins Bett nicht vor dem Morgengrauen oder wie Raoul, Diego und die zwei neuen Trompetendamen überhaupt nicht. Wahrscheinlich trauten diese sich den langen Fussmarsch einfach nicht mehr zu. Stattdessen belästigten Sie schon um 05.00 Uhr die Kioskdame am Bahnhof zweck Wärme und Dehydration infolge Biermangels.

Schlussendlich fanden aber alle Chnätschär am Sonntag Morgen den Weg in die Bäckerei, wo uns die Gastgeber zu einem super Frühstück einluden. Die anschliessende Zugfahrt, so schien mir, wurde von allen ersehnt, denn ein Zug (auch die zweite Klasse) kann ja soooooo gemütlich sein unter gewissen Umständen.

An dieser Stelle ein herzliches Dankeschön an Mario und alle Buchsi-Schränzer für die Einladung und Organisation des Anlassen. Es war ein riesen Spass. Auch ein Dankeschön an alle Chnätschär und Chnätschärinne für die Teilnahme. Ich freue mich schon auf den nächsten Auftritt.

Ewe Präsi.....

St. German, den 07.12.2008

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

So Iär Chnätschärinne und Chnätschär und alli Interessiärtu va ischär Guggumüsig

Mittlärwil hei wär doch rächt viel an ischär Homepage chännu schaffu. So das wiär jetzt öi alli relevantu Date fär d negscht Fasnacht hiä chänne väröffentlichu. Hiä ä chleini Fiährig durch die Homepage vo ewum Präsi:

Rubrik Gästebuch


Hiä chänt iär alls Mitglieder oder Bsüächär vo där Homepage gäru ewe Kommentar iträgu. Das isch de ärsichtlich vär alli Bsüächer.




Rubrik Guggenmusik


In dischär Rubrik gits viel z gseh. Unnär Andrum wärdend hiä ischu Registär genauer vorgstellt. Iär ärfahret und chännt gseh, wer aktuell im Komitee isch. Und chänet inär Gschicht vo ischär Guggumüsig 18 Jahr zrug ga. Unär där Unnärrubrik "Vorstand" findet iär öi die diräktu E-Mail Adrässe vam Komitee. Heidär ä Frag odär susch äs Aligu, schriebet dum beträffundu Vorstandsmitglied doch gad äs Mail und wiär wärde das zämu besprächu.




Rubrik News


Das isch vor allum vär d Mitgliedär än wichtigi Rubrik und sellti of bsüächt wärdu, will hiä sind immär d Aktuellu Üftritta druf. Öi informiärt hiä där Vorstand ubär schini Bschliss. Und, inär Unnärrubrik "Ankündigungen" stehnt 1 - 2 Wuche vor jedum Üftritt die genauu Details vam Üftrtitt drina, dasär öi ganz sichär niä z spat da sit.




Rubrik Statuten


In der Rubrik findet iär die Statute va de Porretschchnätschär. Di aktuellu Statute sind üsum Jahr 1998. Die Statute sind jetzt also öi scho 10 Jahr alt und drum welle wiär die ärneuru. D' Mitgliedär hent darum öi d Möglichkeit in dischär Rubrik Vorschläg vär Ändrige ine Statute mittils Formular diräkt dum Komitee bekannt z gä. Die Vorschläg wärden de öi inär GV vär Statutuändrige besprochu.




Rubrik Shop


Än interessanti Rubrik vär Üssustehundi. Vor allum andri Guggumüsige. Hiä wärde wiär ischu Kostum zum Värchöif abiätu. Momentan isch där Shop nu leere, är müäss zersch nu igrichtut wärdu.




Rubrik Links


Unär dischär Rubrik wärde wiär in Züäkunft uf andri interessanti Internetsite värwiesu. Vor allum uf andri Guggumüsigsite.




Rubrik Präsiblog


Da befindusch du dich jetzt gad. Hiä gibu ich, där Präsident, ab und züä äs Paar Wort bekannt. "Rede zur Lage des Vereins":-)
Sälbstvärständlich biäte wiär öi hiä de Mitgliedär vom Värei interaktiv mit z machu. Bisch du Mitglied vo de Porretchchnätschär und hesch luscht, öi dinu Ärfahrige vo där Fasnacht odär eifach so vam Läbe mit alle Bsuächer va dischär Sita z teilu? Gäru richte wiär öi diär ä Blog i. Nimm Kontakt üf unnär praesi@porretsch.chund scho bald hesch du dine Blog uf porretsch.ch




Rubrik Galerie


And last but not least. findusch natirli öi Bildär vo Ischär Guggumüsig unär där Rubrik Galerie. Im Momänt sind d Fotos va ischum Iäbigsweekend z Reckingu druf. Äs wärden natirli nu vieli folgu, abär äs lohnt schich scho jetzt.


Das also ä chleini Fiärig vo miär persönlich gsi. Äs fröit mich, dich hiä bi isch chännu z begriässu. Hesch du witäri Tipps vär dischi Homepage? z.B. witäri Rubrike wamu sellti uf z Sita üfnäh, nimm per Mail Kontakt mit miär üf, und wiär, där Vorstand tiä das gäru priäfu.

Und jetzt witärhin vil Spass bim surfu uf ischär Sita und hoffuntli gseht mu di öi mal persönlich amene Üftritt vo där Guggumüsig Porretschchnätschär!!!

Z Sebi

St. German, den 23.11.2008

XXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXXX

Hallo Liäbi Chnätschärinne und Chnätschär uf där Homepage va ewär Guggumüsig

Än paar va isch hent ja mittlärwil ischi nigilnagilneui Websita ändeckt. Wiä iär ja gseht isch di Sita no im Üfbuw. Heit also ä bits Gidult, wennär nu nit ubärall das findet was drufsteit. Wiär bimeihe isch so schnäll wiä möglich, die Sita uf vordärma z bringu.

Im Momänt hei wär die aktuellu Date immer nu uf folgundum Link druf, wa wiär öi löifund aktuallisiäre. Wennär also eppis ubär d Üftitta wellt ärfahru, miässe där im Momänt nu uf denu Link züägriffu:

  http://sites.google.com/site/porretsch/home

Äs git abär sichär öi uf dischär Sita bald Neuigkeite und wiär hoffe, scho bald die erschtu Fotos chänu z zeigu. Öi di hei wär im Momänt nu äswa anärsch värströit und zwar unnär

picasaweb.google.de/porretschchnaetschaer/

Viel Värgniägu und bis bald.

Ewe Präsi !!!